Trump Threatens: ଭାରତ ଉପରେ ପୁଣି ଟାରିଫ୍‌ ବଢ଼ାଇବା ପାଇଁ ଟ୍ରମ୍ପଙ୍କ ଘୋଷଣା, ରୁଷିଆ ଠାରୁ ତୈଳ କିଣୁଥିବାରୁ ଖପ୍ପା

ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ଭାରତକୁ ଧମକ ଦେଇଛନ୍ତି। ଏକ ସାକ୍ଷାତକାରରେ ଟ୍ରମ୍ପ ଭାରତକୁ ଏକ ଖରାପ ଟ୍ରେଡ୍ ପାର୍ଟନର ବୋଲି କହିଛନ୍ତି । ୨୪ ଘଣ୍ଟା ମଧ୍ୟରେ ଟାରିଫ୍ (ଶୁଳ୍କ) ବୃଦ୍ଧି କରିବାକୁ କହିଛନ୍ତି। ଟ୍ରମ୍ପ କହିଛନ୍ତି ଯେ ସେ ଆଗାମୀ ୨୪ ଘଣ୍ଟା ମଧ୍ୟରେ ଭାରତ ଉପରେ ଟାରିଫ୍ ବୃଦ୍ଧି କରିବେ କାରଣ ଭାରତ ରୁଷିଆରୁ ତୈଳ କିଣୁଛି।

ତାଙ୍କର ମତରେ, ରୁଷିଆ ସହିତ ଭାରତର ଶକ୍ତି ସମ୍ବନ୍ଧୀୟ ଆମଦାନୀ ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ। ଟ୍ରମ୍ପ ଆମେରିକୀୟ ବ୍ୟାଙ୍କଗୁଡ଼ିକ ମଧ୍ୟ କଡ଼ା ସମାଲୋଚନା କରିଛନ୍ତି । ସେମାନଙ୍କ ଉପରେ ରାଜନୈତିକ ଭେଦଭାବର ଅଭିଯୋଗ ଲଗାଇଛନ୍ତି ଏବଂ ସେମିକଣ୍ଡକ୍ଟର ଓ ଫାର୍ମାସ୍ୟୁଟିକାଲ୍ସ କ୍ଷେତ୍ରରେ ବଡ଼ ଘୋଷଣା କରିବାକୁ ଇଙ୍ଗିତ ଦେଇଛନ୍ତି ।

ଡୋନାଲ୍ଡ ଟ୍ରମ୍ପ ଏହି ସାକ୍ଷାତକାରରେ କହିଛନ୍ତି ଯେ ସେ ଆଗାମୀ ୨୪ ଘଣ୍ଟା ମଧ୍ୟରେ ଭାରତ ଉପରେ ଟାରିଫ୍‌ରେ ‘ଯଥେଷ୍ଟ’ ବୃଦ୍ଧି କରିପାରନ୍ତି। ଏହା ସହିତ ସେ ଭାରତର ରୁଷିଆ ସହିତ ଚାଲୁଥିବା ଶକ୍ତି ସମ୍ପର୍କକୁ ଏକ ପ୍ରମୁଖ ବାଧା ଭାବେ ବର୍ଣ୍ଣନା କରିଛନ୍ତି।

ସେ ଦେଇଥିବା ସାକ୍ଷାତକାରରେ କହିଛନ୍ତି, ‘ଭାରତ ଏକ ଟ୍ରେଡ୍ ପାର୍ଟନର ନୂହେଁ କାରଣ ସେମାନେ ଆମ ସହିତ ବହୁତ ବ୍ୟାପାର କରୁଛନ୍ତି କିନ୍ତୁ ଆମେ ସେମାନଙ୍କ ସହିତ ବ୍ୟାପାର କରୁନାହୁଁ। ତେଣୁ ଆମେ ୨୫ ପ୍ରତିଶତରେ ଏକ ବୁଝାମଣା କରିଥିଲୁ, କିନ୍ତୁ ମୋର ମନେ ହେଉଛି ମୁଁ ଆଗାମୀ ୨୪ ଘଣ୍ଟା ମଧ୍ୟରେ ଏହାକୁ ଯଥେଷ୍ଟ ବୃଦ୍ଧି କରିଦେବି କାରଣ ସେମାନେ ରୁଷ ଠାରୁ ତୈଳ କିଣୁଛନ୍ତି।’

ଆମେରିକୀୟ ରାଷ୍ଟ୍ରପତି ଭାରତ ଉପରେ ଭୁଲ ବ୍ୟାପାର ପରମ୍ପରା ଜାରି ରଖିଥିବାର ଅଭିଯୋଗ ଲଗାଇଛନ୍ତି। ଏହା ସହିତ ସେ ଚେତାବନୀ ଦେଇଛନ୍ତି ଯେ ଯଦି ଏଥିରେ ସୁଧାର ହୁଏ ନାହିଁ, ତେବେ ତାଙ୍କ ପ୍ରଶାସନ ଦ୍ରୁତ କାର୍ଯ୍ୟାନୁଷ୍ଠାନ ଗ୍ରହଣ କରିବ। ଯଦି ଆମେରିକା ଏପରି କରେ, ତେବେ ଭାରତ ସହିତ ବ୍ୟାପାର ସମ୍ପର୍କରେ ଆହୁରି ତିକ୍ତତା ଆସିବାର ଆଶଙ୍କା ରହିଛି।

ଟ୍ରମ୍ପଙ୍କ ଦାବି ଅନୁଯାୟୀ ଗ୍ଲୋବାଲ ଏନର୍ଜି ମୂଲ୍ୟରେ ହ୍ରାସ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ୟୁକ୍ରେନରେ ସାମରିକ ଅଭିଯାନ ବନ୍ଦ କରିବାକୁ ବାଧ୍ୟ କରିପାରେ। ଟ୍ରମ୍ପ କହିଛନ୍ତି, ‘ଯଦି ଶକ୍ତିର ମୂଲ୍ୟ ଯଥେଷ୍ଟ କମିଯାଏ, ତେବେ ପୁଟିନ ଲୋକମାନଙ୍କୁ ହତ୍ୟା କରିବା ବନ୍ଦ କରିଦେବେ। ଯଦି ଶକ୍ତି ମୂଲ୍ୟ ପ୍ରତି ବ୍ୟାରେଲ ୧୦ ଡଲାର କିମ୍ବା ତା’ଠାରୁ କମ ହୁଏ, ତେବେ ତାଙ୍କ ପାଖରେ କୌଣସି ବିକଳ୍ପ ରହିବ ନାହିଁ କାରଣ ସେମାନଙ୍କ ଅର୍ଥନୀତି ଦୁର୍ବଳ ଅବସ୍ଥାରେ ଅଛି।’