Donald Trump: ଋଷ୍‌ - ଆମେରିକା ମୁହାଁମୁହିଁ, ନ୍ୟୁକ୍ଲିଅର୍ ସବମରିନ୍ ପଠାଇଲେ ଟ୍ରମ୍ପ

ଋଷ୍‌ ଓ ଆମେରିକା ମଧ୍ୟରେ ବଢୁଛି ତିକ୍ତତା । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଋଷ୍‌ର ପୂର୍ବତନ ରାଷ୍ଟ୍ରପତି ତଥା ପୁଟିନଙ୍କ ଅତ୍ୟନ୍ତ ନିକଟତର ଦିମିତ୍ରୀ ମେଦଭେଦେଭ କଡ଼ା ଜବାବ ଦେଇଥିଲେ । ଏହା ପରେ ଟ୍ରମ୍ପ ଦୁଇଟି (ନ୍ୟୁକ୍ଲିଅର୍ ସବମରିନ୍) ପରମାଣୁ ଜାହାଜ ଋଷ୍‌ ନିକଟରେ ସମୁଦ୍ରରେ ମୁତୟନ କରିବାକୁ ନିର୍ଦ୍ଦେଶ ଦେଇଛନ୍ତି ।

ଭାରତ ଉପରେ ୨୫ ପ୍ରତିଶତ ଟାରିଫ୍ ଏବଂ ଜରିମାନା ଘୋଷଣା ପରେ ଡୋନାଲ୍ଡ ଟ୍ରମ୍ପ ଋଷ୍‌ର ଦିମିତ୍ରୀ ମେଦଭେଦେଭଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ ଭାରତ ଏବଂ ଋଷ୍‌ ଅର୍ଥନୀତି ହେଉଛି 'ମୃତ ଅର୍ଥନୀତି'। ଏହାର ଜବାବରେ ମେଦଭେଦେଭ କହିଛନ୍ତି ଯେ ଟ୍ରମ୍ପଙ୍କୁ ଚଳଚ୍ଚିତ୍ରରେ ଦେଖାଯାଉଥିବା 'ଜୋମ୍ବି' ବିଷୟରେ ଚିନ୍ତା କରିବା ଉଚିତ, ଯେଉଁମାନେ ବହୁତ ବିପଜ୍ଜନକ ହୋଇପାରନ୍ତି। ଏହା ପରେ ଟ୍ରମ୍ପ ଋଷ୍‌ର ବିପଦ ଏବଂ ଧମକକୁ ଦେଖି ଏକ ବଡ଼ ନିର୍ଦ୍ଦେଶ ଦେଇଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଋଷ୍‌ ନିକଟବର୍ତ୍ତୀ ଅଞ୍ଚଳରେ ଦୁଇଟି ନ୍ୟୁକ୍ଲିଅର୍ ସବମରିନ୍ ମୁତୟନ କରିବାକୁ ନିର୍ଦ୍ଦେଶ ଦେଇଛନ୍ତି। ସେ କହିଛନ୍ତି ଯେ ଏହି ନିଷ୍ପତ୍ତି ଋଷ୍‌ ରାଷ୍ଟ୍ରପତି ଭ୍ଲାଦିମୀର ପୁଟିନଙ୍କ ନିକଟତର ଦିମିତ୍ରୀ ମେଦଭେଦେଭଙ୍କ ଧମକର ଜବାବରେ ନିଆଯାଇଛି।

ଡୋନାଲ୍ଡ ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମରେ ଲେଖିଛନ୍ତି: ଋଷ୍‌ ଫେଡେରେସନ ସୁରକ୍ଷା ପରିଷଦର ଉପାଧ୍ୟକ୍ଷ ଦିମିତ୍ରୀ ମେଦଭେଦେଭଙ୍କ ଅତ୍ୟନ୍ତ ଉତ୍ତେଜକ ବୟାନକୁ ଆଧାର କରି, ମୁଁ ଦୁଇଟି ନ୍ୟୁକ୍ଲିଅର୍ ସବମରିନକୁ ଉପଯୁକ୍ତ ଅଞ୍ଚଳରେ ମୁତୟନ କରିବାକୁ ନିର୍ଦ୍ଦେଶ ଦେଇଛି। ଯାହା ଫଳରେ ଏହି ମୂର୍ଖତାପୂର୍ଣ୍ଣ ଓ ଉତ୍ତେଜକ ବୟାନ ଅଧିକ ନ ହେଉ। ଶବ୍ଦ ବହୁତ ଗୁରୁତ୍ୱପୂର୍ଣ୍ଣ, ଏବଂ ପ୍ରାୟତଃ ଅନିଚ୍ଛାକୃତ ପରିଣାମ ଦେଇପାରେ। ମୁଁ ଆଶା କରୁଛି ଏହି ମାମଲା ଏପରି ହେବ ନାହିଁ।

ଡୋନାଲ୍ଡ ଟ୍ରମ୍ପ ଭାରତ ଉପରେ ୨୫ ପ୍ରତିଶତ ଟାରିଫ୍ ଏବଂ ଅତିରିକ୍ତ ଜରିମାନା ଲଗାଇବାର ଘୋଷଣା କରିଥିଲେ। ସେ କହିଥିଲେ ଯେ ଭାରତ ଉପରେ ଜରିମାନା ଲଗାଯାଇଛି କାରଣ ସେ ଋଷଠାରୁ ଅବିରତ ସାମରିକ ଉପକରଣ କିଣୁଛି। ଏହା ପରେ ଆମେରିକୀୟ ବୈଦେଶିକ ମନ୍ତ୍ରୀ ମାର୍କୋ ରୁବିଓ କହିଥିଲେ ଯେ ଟ୍ରମ୍ପ ଭାରତ ସହିତ ନାରାଜ ଅଛନ୍ତି କାରଣ ଭାରତ ଋଷ୍ ଠାରୁ ତୈଳ କିଣୁଛି। ମୋଟାମୋଟି ଭାବେ ଆମେରିକୀୟ ରାଷ୍ଟ୍ରପତି ଏହାକୁ ନେଇ ନାରାଜ ଯେ ଭାରତ ଏବେ ମଧ୍ୟ ଋଷ୍ ସହିତ ବାଣିଜ୍ୟ କରୁଛି।

ନିଜର ଅସନ୍ତୋଷ ପ୍ରକାଶ କରିବା ପାଇଁ ସେ ଏକ ପୋଷ୍ଟରେ ଲେଖିଥିଲେ: ମୁଁ ପରୱା କରୁନାହିଁ ଯେ ଭାରତ ଋଷ୍ ସହିତ କ’ଣ କରୁଛି। ସେମାନେ ମିଳିତ ଭାବେ ନିଜର 'ମୃତ ଅର୍ଥନୀତି'କୁ ଆହୁରି ତଳକୁ ନେଇପାରନ୍ତି, ମୋତେ ଏହାରୁ କିଛି ଫରକ ପଡୁନାହିଁ। ଆମେ ଭାରତ ସହିତ ବହୁତ କମ୍ ବାଣିଜ୍ୟ କରିଛୁ, ସେମାନଙ୍କର ଟାରିଫ୍ ବହୁତ ଅଧିକ, ବିଶ୍ୱରେ ସବୁଠାରୁ ଅଧିକ। ସେହିପରି ଋଷ୍ ଏବଂ ଆମେରିକା ମଧ୍ୟ ପ୍ରାୟ କୌଣସି ବାଣିଜ୍ୟ କରୁନାହାନ୍ତି। ଏହାକୁ ଏହିପରି ରହିବାକୁ ଦିଅ।

ଋଷର ପୂର୍ବତନ ରାଷ୍ଟ୍ରପତି ମେଦଭେଦେଭ ନିଜକୁ ଏବେ ମଧ୍ୟ ରାଷ୍ଟ୍ରପତି ଭାବୁଛନ୍ତି। ସେ ନିଜର କଥା ଉପରେ ଧ୍ୟାନ ଦେବା ଉଚିତ। ସେ ବହୁତ ବିପଜ୍ଜନକ କ୍ଷେତ୍ରରେ ପ୍ରବେଶ କରୁଛନ୍ତି। ମେଦଭେଦେଭଙ୍କ ଜବାବ ଡୋନାଲ୍ଡ ଟ୍ରମ୍ପଙ୍କ ଏହି ବୟାନ ଉପରେ ମେଦଭେଦେଭଙ୍କ ପ୍ରତିକ୍ରିୟା ଆସିଥିଲା।

୭୦ରୁ ଅଧିକ ଦେଶ ଉପରେ ଟ୍ରମ୍ପ ଟାରିଫ୍ ଘୋଷଣା କରିଛନ୍ତି। ଏହି ନିର୍ଦ୍ଦେଶ ୭ ଅଗଷ୍ଟରୁ ଲାଗୁ ହେବ। ତେବେ କାନାଡା ଏଥିରେ ବ୍ୟତିକ୍ରମ ରହିଛି । ତାହା ପାଇଁ ୨୫ ପ୍ରତିଶତ ଟାରିଫକୁ ବଢ଼ାଇ ୩୫ ପ୍ରତିଶତ କରାଯାଇଛି । ତାହା ୧ ଅଗଷ୍ଟରୁ ଲାଗୁ ହୋଇଛି।

ଅଧିକ ପଢ଼ନ୍ତୁ: ଭାରତ ସମେତ ସମସ୍ତ ଦେଶକୁ ମିଳିଲା ଆଶ୍ୱସ୍ତି, ୭ ତାରିଖରୁ ଲାଗୁ ହେବ ନୂଆ ଟାରିଫ୍ ପ୍ଲାନ୍