Donald Trump: ଟ୍ରମ୍ପଙ୍କ ଟାର୍ଗେଟ୍‌ରେ ଟ୍ରାନ୍ସଜେଣ୍ଡର; ମହିଳା କ୍ରୀଡ଼ାରେ ଟ୍ରାନ୍ସ ଆଥଲେଟ୍ ବ୍ୟାନ୍

ଆମେରିକା ସରକାରଙ୍କ ବଡ଼ ନିଷ୍ପତ୍ତି। ମହିଳା କ୍ରୀଡ଼ାରେ ଅଂଶଗ୍ରହଣ କରିପାରିବେନି ଟ୍ରାନ୍ସଜେଣ୍ଡର ଆଥଲେଟ୍। ଏକ କାର୍ଯ୍ୟନିର୍ବାହୀ ନିର୍ଦ୍ଦେଶରେ ସ୍ୱାକ୍ଷର କରିଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଏହି ଆଦେଶ ସେହି ଟ୍ରାନ୍ସଜେଣ୍ଡର ଖେଳାଳିମାନଙ୍କ ପାଇଁ ପ୍ରଯୁଜ୍ୟ ଯେଉଁମାନେ ଜନ୍ମ ସମୟରେ ପୁରୁଷ ଥିଲେ ଏବଂ ପରେ ଲିଙ୍ଗ ପରିବର୍ତ୍ତନ କରି ମହିଳା ହୋଇଛନ୍ତି। ଜାନୁଆରୀରେ ରାଷ୍ଟ୍ରପତି ଭାବେ ଶପଥ ନେବା ପରେ ଟ୍ରମ୍ପ ସ୍ପଷ୍ଟ କରିଥିଲେ ଯେ ସରକାରୀ ଦଲିଲରେ ଲୋକମାନଙ୍କୁ କେବଳ ପୁରୁଷ ଏବଂ ମହିଳା ଭାବରେ ଚିହ୍ନଟ କରାଯିବ। ଏହାପରେ ଏହି ନିଷ୍ପତ୍ତି ନିଆଯାଇଛି।

ରାଷ୍ଟ୍ରପତି ଭାବେ ଆଉଥରେ ନିର୍ବାଚିତ ହେବା ପରେ ଟ୍ରାନ୍ସଜେଣ୍ଡରମାନଙ୍କୁ ଟାର୍ଗେଟ କରିଛନ୍ତି ଟ୍ରମ୍ପ।'ମହିଳା କ୍ରୀଡାରୁ ପୁରୁଷମାନଙ୍କୁ ବାଦ୍ ଦେବା' ଶୀର୍ଷକ ଏହି ଆଦେଶରେ କୁହାଯାଇଛି ଯେ ନ୍ୟାୟ ଏବଂ ଶିକ୍ଷା ବିଭାଗ ସମେତ ସଂଘୀୟ ଏଜେନ୍ସିଗୁଡ଼ିକୁ ଟ୍ରମ୍ପ ପ୍ରଶାସନର ନିୟମ ପାଳନ କରିବାକୁ ହେବ । ଜନ୍ମ ସମୟରେ ଜଣେ ବ୍ୟକ୍ତି ଯେଉଁଭଳି ଚିହ୍ନଟ ହୋଇଥିଲେ ସେହି ଆଧାରରେ ତାଙ୍କର ଲିଙ୍ଗ ନିର୍ଦ୍ଧାରିତ ହୋଇଛି । ହ୍ୱାଇଟ୍ ହାଉସ୍ ପ୍ରେସ୍ ସଚିବ କାରୋଲିନ୍ ଲେଭିଟ୍ କହିଛନ୍ତି ଏହି ଆଦେଶ ପରେ ଟ୍ରାନ୍ସଜେଣ୍ଡର ଆଥଲେଟମାନଙ୍କୁ ମହିଳା ଦଳରେ ପ୍ରତିଯୋଗିତା କରିବାକୁ ଅନୁମତି ଦିଆଯାଉଥିବା ଶିକ୍ଷାନୁଷ୍ଠାନରେ ଫେଡେରାଲ୍ ପାଣ୍ଠି ପ୍ରତ୍ୟାଖ୍ୟାନ କରିବାକୁ କୁହାଯାଇଛି।

ଡୋନାଲ୍ଡ ଟ୍ରମ୍ପ ନିର୍ବାଚନ ପ୍ରଚାର ସମୟରେ ମଧ୍ୟ ପ୍ରତିଶ୍ରୁତି ଦେଇଥିଲେ ଯେ ସେ ପୁରୁଷମାନଙ୍କୁ ମହିଳା କ୍ରୀଡାରୁ ଦୂରେଇ ରଖିବେ ଏବଂ ଏବେ ସଦ୍ୟତମ ଆଦେଶ ମାଧ୍ୟମରେ ସେ ତାଙ୍କର ପ୍ରତିଶ୍ରୁତି ପୂରଣ କରିଛନ୍ତି। ଏହି କାର୍ଯ୍ୟନିର୍ବାହୀ ନିର୍ଦ୍ଦେଶ ସହିତ ମହିଳା କ୍ରୀଡା ବିରୋଧରେ ଥିବା ଲଢ଼େଇ ଶେଷ ହୋଇଛି। ହ୍ୱାଇଟ୍ ହାଉସରେ ଆଦେଶରେ ସ୍ୱାକ୍ଷର କରିବା ପୂର୍ବରୁ ଟ୍ରମ୍ପ କହିଛନ୍ତି, ଆମେ ମହିଳା ଖେଳାଳିଙ୍କ ଗର୍ବିତ ପରମ୍ପରାକୁ ରକ୍ଷା କରିବୁ। ପୁରୁଷମାନଙ୍କୁ ଆମର ମହିଳା ଏବଂ ଝିଅମାନଙ୍କୁ ମାଡ଼ ମାରିବା, ଆହତ କରିବା ପାଇଁ ଅନୁମତି ଦେବୁ ନାହିଁ। ଏବେଠାରୁ, ମହିଳା କ୍ରୀଡ଼ା କେବଳ ମହିଳାଙ୍କ ପାଇଁ ଉଦ୍ଦିଷ୍ଟ ହେବ"। ଟ୍ରମ୍ପ ଏହା ମଧ୍ୟ କହିଛନ୍ତି, ୨୦୨୮ ମସିହାରେ ଲସ୍ ଆଞ୍ଜେଲସ୍‌ରେ ଆମେରିକୀୟ ମାଟିକୁ ଖେଳ ଫେରିବା ପୂର୍ବରୁ ଟ୍ରାନ୍ସଜେଣ୍ଡର ଖେଳାଳିଙ୍କ ଉପରେ ନିୟମ ପରିବର୍ତ୍ତନ କରିବା ପାଇଁ ଅନ୍ତର୍ଜାତୀୟ ଅଲିମ୍ପିକ୍ କମିଟିକୁ ଚାପ ପକାଇବେ।

ଏହି ଆଦେଶ ଶିକ୍ଷା ବିଭାଗକୁ ଟ୍ରାନ୍ସଜେଣ୍ଡର ଆଥଲେଟମାନଙ୍କୁ ପ୍ରତିଯୋଗିତା କରିବାକୁ ଅନୁମତି ଦେଉଥିବା ସ୍କୁଲଗୁଡ଼ିକ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାର ଅଧିକାର ଦେଇଛି। ଯଦି କୌଣସି ସ୍କୁଲ ନିୟମ ଉଲ୍ଲଂଘନ କରେ, ତେବେ ଏହା ସଂଘୀୟ ସହାୟତା ପାଇଁ ଅଯୋଗ୍ୟ ହୋଇପାରେ। ଏହି ଆଦେଶରେ ଘରୋଇ କ୍ରୀଡ଼ା ସଂଗଠନଗୁଡ଼ିକୁ ହ୍ୱାଇଟ୍ ହାଉସରେ ଏକ ବୈଠକ କରିବାକୁ ମଧ୍ୟ କୁହାଯାଇଛି। ଯାହା ଦ୍ୱାରା ଟ୍ରମ୍ପ ବ୍ୟକ୍ତିଗତ ଭାବରେ ପୁରୁଷମାନଙ୍କ ସହିତ ପ୍ରତିଯୋଗିତା କରିବା ପାଇଁ ହଇରାଣର ଶିକାର ହୋଇଥିବା ମହିଳା ଖେଳାଳିମାନଙ୍କ କାହାଣୀ ଶୁଣିପାରିବେ। ଏହି ପଦକ୍ଷେପ ହେଉଛି ଟ୍ରମ୍ପ ପ୍ରଶାସନର ଟ୍ରାନ୍ସଜେଣ୍ଡରଙ୍କ ଅଧିକାରକୁ ସୀମିତ କରିବା ପ୍ରୟାସର ଆଉ ଏକ ଅଂଶ।

ଅଧିକ ପଢନ୍ତୁ: ଟ୍ରମ୍ପଙ୍କ କଡ଼ା ଆକ୍ସନ; ଆମେରିକାରୁ ବିଦା ହେଲେ ୨୦୫ ପ୍ରବାସୀ ଭାରତୀୟ

ଟ୍ରାନ୍ସଜେଣ୍ଡରମାନେ ପୂର୍ବରୁ ଅନେକ ନୀତି ବିରୁଦ୍ଧରେ କୋର୍ଟରେ ମାମଲା ଦାୟର କରିଛନ୍ତି। ମାମଲା ପରିଚାଳନା କରୁଥିବା ନାଗରିକ ଅଧିକାର ଓକିଲମାନେ ଦାବି କରିଛନ୍ତି ଯେ, କିଛି କ୍ଷେତ୍ରରେ, ଟ୍ରମ୍ପଙ୍କ ନିର୍ଦ୍ଦେଶ କଂଗ୍ରେସ ଦ୍ୱାରା ଗୃହୀତ ଆଇନ ଏବଂ ସମ୍ବିଧାନରେ ସୁରକ୍ଷାକୁ ଉଲ୍ଲଂଘନ କରୁଛି ଏବଂ ଏହା ରାଷ୍ଟ୍ରପତିଙ୍କ କ୍ଷମତାକୁ ଲଙ୍ଘନ କରୁଛି। ଟ୍ରାନ୍ସଜେଣ୍ଡର ସନ୍ତରଣକାରୀ ଲିଆ ଥମାସଙ୍କ ୩ ଜଣ ପୂର୍ବତନ ସାଥୀ ଖେଳାଳି ତାଙ୍କ ବିରୋଧରେ ଅଭିଯୋଗ ଆଣିଥିଲେ। NCAA ଏବଂ ଅନ୍ୟାନ୍ୟ ସଂଗଠନ ଥମାସଙ୍କୁ ପହଁରିବାକୁ ଅନୁମତି ଦେଇ ନିୟମ ଉଲ୍ଲଂଘନ କରିଥିବା ସେମାନେ ଅଭିଯୋଗ କରିବା ପରେ ଟ୍ରମ୍ପଙ୍କ ଏହି ନିର୍ଦ୍ଦେଶ ଆସିଛି।

ଏହା ପୂର୍ବରୁ, ଡୋନାଲ୍ଡ ଟ୍ରମ୍ପ ସୋମବାର ଏକ କାର୍ଯ୍ୟନିର୍ବାହୀ ଅର୍ଡରରେ ସ୍ୱାକ୍ଷର କରିଛନ୍ତି, ଯାହା ଆମେରିକା ସେନାରେ ଟ୍ରାନ୍ସଜେଣ୍ଡରଙ୍କ ନିଯୁକ୍ତି ଉପରେ ରୋକ ​​ଲଗାଇପାରେ। ଏହି ନିର୍ଦ୍ଦେଶ ଅନୁଯାୟୀ, ନୂତନ ପ୍ରତିରକ୍ଷା ସଚିବ ପିଟ୍ ହେଗସେଥ୍ ପେଣ୍ଟାଗନ୍ ନୀତିର ସମୀକ୍ଷା କରିବେ । ସମୀକ୍ଷା ପରେ, ଆମେରିକୀୟ ସେନାରେ ଯୋଗଦେବାରୁ ଟ୍ରାନ୍ସଜେଣ୍ଡର ସୈନିକମାନଙ୍କୁ ନିଷିଦ୍ଧ କରିବାକୁ ନିଷ୍ପତ୍ତି ନେଇପାରନ୍ତି।

ଅଧିକ ପଢନ୍ତୁ: ଆମେରିକା ରାଷ୍ଟ୍ରପତିଙ୍କ କଡ଼ା ନିଷ୍ପତ୍ତି, ୩ଟି ଦେଶ ଉପରେ ଆମଦାନୀ ଟାରିଫ୍ ଲଗାଇଲେ ଟ୍ରମ୍ପ