ପିଲାଙ୍କୁ ଖାଇବାକୁ ଦେବି ନା ମାରିଦେବି ? ଦରଦାମ ବୃଦ୍ଧି ଭିତରେ ସରକାରଙ୍କୁ ପ୍ରଶ୍ନ କଲେ ମହିଳା

‘ମା’ ହୋଇ ପିଲାଙ୍କୁ ଖାଇବା ମୁଠେ ଦେଇପାରୁନି । ମୋ ପିଲାଙ୍କୁ ଭୋକରେ ମାରିଦେବି କି ? ଘର ପାଇଁ ଡାଲି, ଅଟା, ଚିନି କିଣିବା ସତେ କି ସ୍ୱପ୍ନ । ମାସକ ଘର ଭଡ଼ା ୨୦ ହଜାର, ଇଲେକ୍ଟ୍ରି ବିଲ୍‌ ଆସୁଛି ୧୫ ହଜାର । କେଉଁଠୁ ଆଣିବି ଏତେ ଟଙ୍କା । ଘର ଭଡ଼ା ଦେବି ନା ରୋଷେଇ ସାମଗ୍ରୀ କିଣିବି ? ମିର୍ଗି ରୋଗରେ ପୀଡ଼ିତ ମୋ ଛୁଆ ପାଇଁ ଔଷଧ ଟୋପାଏ ବି କିଣି ପାରୁନି । ମୋର ଏପରି ସ୍ଥିତି ପାଇଁ ଦାୟୀ କିଏ ? ମୋତେ ଉତ୍ତର ଦିଅ ଶେହବାଜ୍‌ ସରକାର . . । ତୁମକୁ କ’ଣ ଖୁଦାଙ୍କର ଭୟ ନାହିଁ କି ’ବୋଲି ପ୍ରଶ୍ନ କରିଛନ୍ତି ଜଣେ ପାକିସ୍ତାନୀ ମହିଳା । ଭିଡିଓ ତିଆରି ନିଜର ଅସହାତର ବଖାଣିବା ସହ ପାକ୍‌ ସରକାରଙ୍କ ପୋଲ୍‌ ଖୋଲିଛନ୍ତି ।

ଦରଦାମ ବୃଦ୍ଧି ଭିତରେ ଜଣେ ପାକିସ୍ତାନୀ ମହିଳାଙ୍କ ଭିଡିଓ ଭାଇରାଲ ହେବାରେ ଲାଗିଛି । ବିଭିନ୍ନ ସାମଗ୍ରୀର ଦାମ ବୃଦ୍ଧି ପାଉଥିବା ଯୋଗୁଁ ସେ ପିଲାଙ୍କୁ ଖାଇବାକୁ ଦେଇ ପାରୁନାହାନ୍ତି । ମା’ ହୋଇ ଏକଥା ତାଙ୍କୁ ସହ୍ୟ ହେଉନି । ପିଲାଙ୍କ ଭୋକିଲା ଆଖି ତାଙ୍କୁ ବ୍ୟତିବ୍ୟସ୍ତ କରିପକାଉଛି । କାନ୍ଦି କାନ୍ଦି ସେ ସୋସିଆଲ ମିଡିଆରେ ନିଜ ଦୁଃଖ ଜଣାଉଛନ୍ତି । ପାକିସ୍ତାନର ସ୍ଥିତି ଦିନକୁ ଦିନ ଅଣାୟତ ହେଉଛି । ଦେଶରେ ମେଡିସିନ୍‌, ଖାଦ୍ୟସାମଗ୍ରୀ, ବିଜୁଳି ଦର ବଢ଼ି ବଢ଼ି ଚାଲିଛି । ଏଥିପାଇଁ ସେ ପ୍ରଧାନମନ୍ତ୍ରୀ ସେହବାଜ ଶରିଫଙ୍କୁ ଦାୟୀ କରିଛନ୍ତି ।

ଭିଡିଓରେ ଥିବା ମହିଳା ଜଣଙ୍କ କରାଚିରେ ରୁହନ୍ତି । ତାଙ୍କ ନାଁ ରାବିୟା । ସେ ଦୁଇଟି ପିଲାର ମା’ । ତାଙ୍କ ପିଲା ମିର୍ଗୀ ରୋଗରେ ପୀଡ଼ିତ । ହେଲେ ଗତ ଚାରି ମାସ ହେଲା ସରକାର ଔଷଧ ଦାମ୍‌ ବଢ଼ାଇ ଦେଇଛନ୍ତି । ୟୁନିଟ୍‌ ପିଛା ବିଦ୍ୟୁତ୍‌ ବିଲରେ ବୃଦ୍ଧି କରିଛନ୍ତି । ପିଲାଙ୍କ ପାଇଁ ମେଡିସିନ୍‌ କିଣିଲେ ଖାଇବା କିଣି ପାରୁନାହାନ୍ତି । ଏପରି ସ୍ଥିତିରେ ସେ କ’ଣ ପିଲାଙ୍କୁ ମାରି ଦେବେ ବୋଲି ସରକାରଙ୍କୁ ପ୍ରଶ୍ନ କରୁଛନ୍ତି ।

کراچی سے تعلق رکھنے والی ایک ماں نے حکمرانوں کو اپنا بجلی کا بل اور کچن کے لئے اشیاء کی خریداری کا بل دکھا کر کچھ سوال پوچھے میں نے یہ سوال مفتاح اسماعیل کو بھیج دئیے مفتاح صاحب نے جواب بھجوا دیا ہے لیکن پہلے ایک ماں کا دکھڑا سن لیں pic.twitter.com/THahmjAjUL

— Hamid Mir (@HamidMirPAK) August 9, 2022

ଭିଡିଓକୁ ସେୟାର କଲେ ପାକିସ୍ତାନୀ ସାମ୍ବାଦିକ ହମିଦ ମୀର

ପାକିସ୍ତାନରେ ଏକ ଭିଡିଓ ଭାଇରାଲ ହେବାରେ ଲାଗିଛି । କରାଚି ମହିଳା ଜଣକୁ ଦରଦାମ୍‌ ଆକାଶଛୁଆଁ ହେବା ପରେ ସରକାରଙ୍କ ନୀତି ଉପରେ ତୀବ୍ର ଅସନ୍ତୋଷ ଜାହିର କରିଛନ୍ତି । ଏହି ଭିଡିଓକୁ ପାକିସ୍ତାନୀ ସାମ୍ବାଦିକ ହମିଦ ମୀର ସେୟାର କରିଛନ୍ତି । ମହିଳା ଜଣକ ସରକାରଙ୍କୁ ପଚାରୁଛନ୍ତି, ମୁଁ ପିଲାଙ୍କ ମୁହଁରେ ତ ଦାନା ଦେଇ ପାରୁନି । ଏବେ କରିବି କ’ଣ ? ଏବେ ପିଲାମାନଙ୍କୁ ଖାଇବାକୁ ନ ଦେଇ ନିଜ ଜୀବନକୁ ଶେଷ କରିଦେବା ଉଚିତ୍ କି?

ତେବେ ଏହି ଭିଡିଓ ଭାଇରାଲ ହେବା ପରେ ପାକିସ୍ତାନ ଅର୍ଥମନ୍ତ୍ରୀ ସଫେଇ ଦେଇଛନ୍ତି । ସରକାର ଜୁନ୍ ମାସରେ ବିଦ୍ୟୁତ୍ ଦର କିମ୍ବା ଔଷଧ ଉପରେ ନୂଆ ଟିକସ ଲାଗୁ କରିନାହାଁନ୍ତି ବୋଲି କହିଛନ୍ତି ।

ସୂଚନାଯୋଗ୍ୟ ଗୁରୁତର ଆର୍ଥିକ ସଂକଟ ଦେଇ ଗତି କରୁଛି ପଡ଼ୋଶୀ ପାକିସ୍ତାନ । ଶ୍ରୀଲଙ୍କା ଭଳି ଋଣଗ୍ରସ୍ତ ପାକିସ୍ତାନ । ରୁଗଣ ଅର୍ଥବ୍ୟବସ୍ଥା, ନିମ୍ନଗାମୀ ମୁଦ୍ରା ମୂଲ୍ୟ ବଢ଼ାଇଛି ଚିନ୍ତା । ଦେଶର ଭୁଶୁଡ଼ି ପଡ଼ିଥିବା ଅର୍ଥ ବ୍ୟବସ୍ଥାରେ ସୁଧାର ଆଣିବା ପାଇଁ ସରକାର କିଛି ଦିନ ପୂର୍ବରୁ ବଡ଼ ପଦକ୍ଷେପ ନେଉଥିବା କୁହାଯାଉଥିଲା । କିନ୍ତୁ ବାସ୍ତବରେ ଲୋକଙ୍କ ଆର୍ଥିକ ମାନଦଣ୍ଡରେ କୌଣସି ସୁଧାର ଆସିପାରିନାହିଁ।