Pakistan: ବନ୍ୟା ପାଣି ଆଶୀର୍ବାଦ, ତାକୁ ସଞ୍ଜୟ କର...ପାକ୍ ମନ୍ତ୍ରୀ ଦେଲେ ଅଜବ ପରାମର୍ଶ

ଭାରତ ବ୍ୟତୀତ ପଡ଼ୋଶୀ ଦେଶ ପାକିସ୍ତାନ ମଧ୍ୟ ଏବେ ଭୟଙ୍କର ବନ୍ୟାର ସମ୍ମୁଖୀନ ହୋଇଛି । ପଞ୍ଜାବ ପ୍ରାନ୍ତରେ ଭୀଷଣ ବନ୍ୟା ହୋଇଛି। ଦେଶର ପ୍ରତିରକ୍ଷା ମନ୍ତ୍ରୀ ଖ୍ୱାଜା ଆସିଫଙ୍କ ପାଖରେ ଏହି ପରିସ୍ଥିତିର ମୁକାବିଲା ପାଇଁ ଏକ ଅଜବ ଉପାୟ ଅଛି। ସେ ପରାମର୍ଶ ଦେଇଛନ୍ତି ଯେ ଦେଶର ନିମ୍ନାଞ୍ଚଳରେ ରହୁଥିବା ପାକିସ୍ତାନୀମାନେ ବନ୍ୟା ଜଳକୁ ନାଳରେ ପ୍ରବାହିତ କରିବା ପରିବର୍ତ୍ତେ କଣ୍ଟେନରରେ ‘ସଞ୍ଚୟ’ କରି ରଖନ୍ତୁ। ଖ୍ୱାଜା ଆସିଫଙ୍କ ମତରେ, ଏହି ବନ୍ୟା ପ୍ରକୃତରେ ପାକିସ୍ତାନର ଲୋକଙ୍କ ପାଇଁ ଏକ ଆଶୀର୍ବାଦ ଠାରୁ କମ୍‌ ନୁହେ।

ପାକିସ୍ତାନରେ ରେକର୍ଡ ଭାଙ୍ଗିଛି ବର୍ଷା

ପାକିସ୍ତାନର ପଞ୍ଜାବ ପ୍ରାନ୍ତରେ ମୌସୁମୀ ବର୍ଷା ଯୋଗୁଁ ଆସିଥିବା ବିନାଶକାରୀ ବନ୍ୟାରେ ୨୪ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି ଏବଂ ହଜାରରୁ ଅଧିକ ଗାଁ ଜଳମଗ୍ନ ହୋଇଛି। ଏକ ସାକ୍ଷାତକାରରେ ଆସିଫ କହିଛନ୍ତି, ‘ଯେଉଁମାନେ ବନ୍ୟା ପରି ପରିସ୍ଥିତିର ବିରୋଧ କରୁଛନ୍ତି, ସେମାନେ ବନ୍ୟା ଜଳକୁ ନିଜ ଘରକୁ ନେଇଯିବା ଉଚିତ।’ ସେ ଆହୁରି କହିଛନ୍ତି, ‘ଲୋକମାନେ ଏହି ଜଳକୁ ନିଜ ଘରେ, ଟବ୍‌ ଏବଂ କଣ୍ଟେନରରେ ସଞ୍ଚୟ କରିବା ଉଚିତ। ଆମେ ଏହି ଜଳକୁ ଏକ ବରଦାନ ରୂପେ ଦେଖିବା ଉଚିତ ଏବଂ ତେଣୁ ଏହାକୁ ସଂଗ୍ରହ କରିବା ଦରକାର।’

ଆସିଫ ପରାମର୍ଶ ଦେଇଛନ୍ତି ଯେ ପାକିସ୍ତାନକୁ ବଡ଼ ପ୍ରୋଜେକ୍ଟ ଗୁଡ଼ିକ ପାଇଁ ୧୦-୧୫ ବର୍ଷ ଅପେକ୍ଷା କରିବା ପରିବର୍ତ୍ତେ, ଛୋଟ ଛୋଟ ବନ୍ଧଗୁଡ଼ିକ ନିର୍ମାଣ କରିବା ଉଚିତ ଯାହା ଶୀଘ୍ର ଶେଷ ହୋଇପାରିବ। ସେ କହିଛନ୍ତି, ‘ଆମେ ଜଳକୁ ନାଳରେ ପ୍ରବାହିତ କରୁଛୁ, କିନ୍ତୁ ଆମେ ଏହାକୁ ସଂଗ୍ରହ କରିବା ଉଚିତ।’

ବନ୍ୟା ରଚିଛି ପ୍ରଳୟ

ପଞ୍ଜାବ ପ୍ରାନ୍ତର ସୂଚନା ମନ୍ତ୍ରୀ ଆଜମା ବୁଖାରୀଙ୍କ ଅନୁଯାୟୀ, ପାକିସ୍ତାନର ପଞ୍ଜାବ ପ୍ରାନ୍ତରେ ହୋଇଥିବା ବନ୍ୟାରେ ୨୦ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି। ପାକିସ୍ତାନର ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଏନଡିଏମଏ)ର ତଥ୍ୟ ଅନୁଯାୟୀ, ୨୬ ଜୁନରୁ ୩୧ ଅଗଷ୍ଟ ପର୍ଯ୍ୟନ୍ତ ବନ୍ୟା ଯୋଗୁଁ ୮୫୪ ପାକିସ୍ତାନୀଙ୍କର ମୃତ୍ୟୁ ହୋଇଛି।

ପାକିସ୍ତାନରେ ଖାଦ୍ୟ ସଙ୍କଟ !

ଏହା ମଧ୍ୟରେ ପଞ୍ଜାବରେ ପଞ୍ଜନଦ ନଦୀର ବଢୁଥିବା ଜଳସ୍ତର ୫ ସେପ୍ଟେମ୍ବର ବେଳକୁ ଏହାର ଶୀର୍ଷରେ ପହଞ୍ଚିବାର ଆଶା କରାଯାଉଛି । ସତଲୁଜ ନଦୀର ଜଳ ସୁଲେମାନକୀ ଓ ହେଡ ଇସଲାମ ସମେତ ବ୍ୟାରେଜଗୁଡ଼ିକ ଆଡ଼କୁ ଅଗ୍ରସର ହେଉଛି। ଅଧିକାରୀମାନେ ଚେତାବନୀ ଦେଇଛନ୍ତି ଯେ ପଞ୍ଜାବରେ ଆଉ ଦୁଇ ଦିନ ମୌସୁମୀ ବର୍ଷା ହେବାର ପୂର୍ବାନୁମାନ କରାଯାଇଛି, ଯାହା ଦ୍ୱାରା ରିଲିଫ କାର୍ଯ୍ୟରେ ବାଧା ସୃଷ୍ଟି ହୋଇପାରେ ଏବଂ ଜଳସ୍ତର ଆହୁରି ବଢ଼ିପାରେ। ସଂଯୁକ୍ତ ରାଷ୍ଟ୍ର ଚେତାବନୀ ଦେଇଛି ଯେ ପାକିସ୍ତାନରେ କୃଷି ଜମିରେ ବନ୍ୟା ଜଳ ମାଡ଼ିବା ଏବଂ ଅମଳ ପାଇଁ ପ୍ରସ୍ତୁତ ଫସଲ ନଷ୍ଟ ହେବା ଯୋଗୁଁ ଦେଶରେ ଖାଦ୍ୟ ସଙ୍କଟ ଦେଖାଦେଇ ପାରେ ।