ପାକିସ୍ତାନର ବଡ଼ ଫଇସଲା, ମାଗଣାରେ କାମ କରିବେ ଲୋକ ପ୍ରତିନିଧି

ଘୋର ଆର୍ଥିକ ସଙ୍କଟ ଦେଇ ଗତି କରୁଛି ପାକିସ୍ତାନ। ତେବେ ଏହି ଆର୍ଥିକ ସଙ୍କଟ ମଧ୍ୟରେ ପାକିସ୍ତାନ ନୂଆ ପ୍ରଧାନମନ୍ତ୍ରୀ ଓ ତାଙ୍କ କ୍ୟାବିନେଟ୍‌ ଏକ ବଡ଼ ନିଷ୍ପତ୍ତି ନେଇଛି। ଦେଶ ସଙ୍କଟ ଦେଇ ଗତି କରୁଥିବାରୁ ଶେହବାଜ ସରିଫ୍‌ ଏବଂ ତାଙ୍କ କ୍ୟାବିନେଟ ମନ୍ତ୍ରୀମାନେ ଦରମା ଏବଂ ଅନ୍ୟାନ୍ୟ ଭତ୍ତା ନ ନେବାକୁ ନିଷ୍ପତ୍ତି ନେଇଛନ୍ତି।

ଏହି ନିଷ୍ପତ୍ତି ସରକାରଙ୍କ ଅନାବଶ୍ୟକ ଖର୍ଚ୍ଚ ହ୍ରାସ କରିବା ପାଇଁ ନିଆଯାଇଛି। ଏହା ବ୍ୟତୀତ ପ୍ରଧାନମନ୍ତ୍ରୀ ଏବଂ ମନ୍ତ୍ରୀଙ୍କ ବିଦେଶ ଗସ୍ତକୁ ହ୍ରାସ କରିବାକୁ ମଧ୍ୟ ସରକାରଙ୍କ ପକ୍ଷରୁ କୁହାଯାଇଛି। କ୍ୟାବିନେଟ ମନ୍ତ୍ରୀ, ସାଂସଦ ଏବଂ ସରକାରୀ କର୍ମଚାରୀଙ୍କୁ ପୂର୍ବ ଅନୁମୋଦନ ବିନା ସରକାରୀ ପାଣ୍ଠିରେ ବିଦେଶୀ ଭ୍ରମଣ ନ କରିବାକୁ ନିର୍ଦ୍ଦେଶ ଦିଆଯାଇଛି।

ଗତ ସପ୍ତାହରେ ରାଷ୍ଟ୍ରପତି ଆସିଫ ଅଲି ଜରଦାରୀ ମଧ୍ୟ ସମାନ କାରଣ ଦର୍ଶାଇ ଦରମା ନ ନେବାକୁ ନିଷ୍ପତ୍ତି ନେଇଥିଲେ। ରିପୋର୍ଟ ଅନୁଯାୟୀ, ଏହି ପଦକ୍ଷେପଗୁଡିକ ସାଧାରଣ ଜନତାଙ୍କ ପାଇଁ ଏକ ଆରାମ ବୋଲି ବିବେଚନା କରାଯାଏ। କାରଣ ଦେଶର ରାଷ୍ଟ୍ରପତି, ପ୍ରଧାନମନ୍ତ୍ରୀ ଏବଂ ବରିଷ୍ଠ ମନ୍ତ୍ରୀମାନେ ଦରମା ନ ନେବା ଦ୍ୱାରା ଏହା ଜନସାଧାରଣଙ୍କ ନିକଟକୁ ଏକ ସକରାତ୍ମକ ବାର୍ତ୍ତା ପଠାଉଛି।

ସୂଚନା ଅନୁସାରେ ପାକିସ୍ତାନର ଅର୍ଥବ୍ୟବସ୍ଥା ଋଣ ଜାଲରେ ଫସି ରହିଛି। ଦେଶର ଅର୍ଥବ୍ୟବସ୍ଥାରେ ୧୩୦ ଆରବ ଡଲାରରୁ ଅଧିକ ବାହ୍ୟ ଋଣ ରହିଛି। ଦେଶ ବୈଦେଶିକ ମୁଦ୍ରା ଭଣ୍ଡାର ମାତ୍ର ଆଠ ଆରବ ଡଲାର ରହିଛି। ସେହିପରି ପାକିସ୍ତାନରେ ମୁଦ୍ରାସ୍ଫୀତ ହାର ୨୩ ପ୍ରତିଶତ ଅଟେ । ଗତ ଦୁଇ ବର୍ଷ ମଧ୍ୟରେ ଆମେରିକାର ଡଲାର ତୁଳନାରେ ପାକିସ୍ତାନର ମୁଦ୍ରାର ମୂଲ୍ୟ ୫୦ ପ୍ରତିଶତରୁ ଅଧିକ ହ୍ରାସ ପାଇଛି।

ସୂଚନା ଅନୁସାରେ ରାଷ୍ଟ୍ରପତିଙ୍କ ଦରମା ପାକିସ୍ତାନ ସଂସଦ ଦ୍ୱାରା ସ୍ଥିର ହୋଇଥାଏ। ପାକିସ୍ତାନ ସଂସଦ ଅନୁଯାୟୀ ରାଷ୍ଟ୍ରପତି ପ୍ରତି ମାସରେ ୮,୪୬,୫୫୦ ଟଙ୍କା ପାଉଛନ୍ତି। ଏହା ବ୍ୟତୀତ ସେମାନେ ଅନ୍ୟାନ୍ୟ ଭତ୍ତା ଏବଂ ସୁବିଧା ମଧ୍ୟ ପାଇଥାନ୍ତି। ଏଥି ସହିତ ପାକିସ୍ତାନ ପ୍ରଧାନମନ୍ତ୍ରୀଙ୍କ ଦରମା ୧୧,୨୬,୬୧୬ ଟଙ୍କା ଅଟେ।