Most Wanted Terrorist: ଜଣାପଡିଗଲା କେଉଁଠି ରହୁଛି ଏଇ ମୋଷ୍ଟ ୱାଣ୍ଟେଡ୍ ଆତଙ୍କବାଦୀ, ଭାରତ ପାଖରେ ସୂଚନା

ଜୈଶ-ଏ-ମହମ୍ମଦ (JeM) ଆତଙ୍କବାଦୀ ସଂଗଠନର ମୁଖ୍ୟ ମାସୁଦ ଆଝାର ଏବେ କେଉଁଠି ? ପାକିସ୍ତାନ ମନା କରୁଛି, ମାସୁଦ ତା ମାଟିରେ ନାହିଁ । ହେଲେ ଭାରତର ଏହି ମୋଷ୍ଟ ଓ୍ଵାଣ୍ଟେଡ ଆତଙ୍କବାଦୀକୁ ପାକିସ୍ତାନ ଅଧିକୃତ କାଶ୍ମୀର (PoK)ର ଗିଲଗିଟ-ବାଲଟିସ୍ତାନ ଅଞ୍ଚଳରେ ଦେଖିବାକୁ ମିଳିଥିଲା । ଭାରତୀୟ ଗୁଇନ୍ଦା ସଂସ୍ଥା ଏହି ସୂଚନା ଦେଇଛି । ଜାତୀୟ ଗଣମାଧ୍ୟମରେ ଏହି ଖବର ପ୍ରକାଶ ପାଇଛି । ମାସୁଦ ଆଝାରକୁ ପାକ୍ ଅଧିକୃତ ସ୍କାର୍ଦୁର ସାଦପାରା ରୋଡ଼ ଅଞ୍ଚଳରେ ଦେଖାଯାଇଥିବା କୁହାଯାଉଛି । ଏହି ସ୍ଥାନରେ ଦୁଇଟି ମସଜିଦ, ପାଖରେ ମଦ୍ରାସା ଏବଂ ବେସରକାରୀ ଓ ସରକାରୀ ଗେଷ୍ଟ ହାଉସ ରହିଛି। ଏହି ଅଞ୍ଚଳ ଏକ ପର୍ଯ୍ୟଟନ କେନ୍ଦ୍ର ଭାବେ ଜଣାଶୁଣା ।

ମାସୁଦ ଆଝାର ପୂର୍ବରୁ ପାକିସ୍ତାନର ବାହାଓ୍ଵାଲପୁରସ୍ଥିତ ତା ଆଡ୍ଡାରେ ରହୁଥିବା ଜଣାଯାଇଥିଲା। କିନ୍ତୁ ଏହି ନୂଆ ସୂଚନା ଅନୁଯାୟୀ, ସେ ବାହାଓ୍ଵାଲପୁରଠାରୁ ୧,୦୦୦ କିଲୋମିଟର ଦୂର ଗିଲଗିଟ-ବାଲଟିସ୍ତାନକୁ ସ୍ଥାନାନ୍ତରିତ ହୋଇଛି । ଏହା ପୂର୍ବରୁ ୨୦୧୯ରେ ବାଲାକୋଟ ଏୟାର ଷ୍ଟ୍ରାଇକ ପରେ ତାକୁ ପେଶାୱାରରେ ଏକ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରାଯାଇଥିଲା।

ମାସୁଦ ଆଝାର ହେଉଛି ଜୈଶ-ଇ-ମହମ୍ମଦର ପ୍ରତିଷ୍ଠାତା । ୨୦୦୧ରେ ଭାରତୀୟ ସଂସଦ ଆକ୍ରମଣ, ୨୦୧୬ରେ ପଠାନକୋଟ ଏୟାରବେସ ଆକ୍ରମଣ ଏବଂ ୨୦୧୯ରେ ପୁଲୱାମା ଆକ୍ରମଣ ଭଳି ବଡ଼ ଆତଙ୍କବାଦୀ ଘଟଣାର ସେ ମାଷ୍ଟରମାଇଣ୍ଡ ଥିଲା ।

୧୯୯୯ରେ ଆଇସି-୮୧୪ ବିମାନ ଅପହରଣ ଘଟଣାରେ ତାକୁ ଭାରତୀୟ ଜେଲରୁ ମୁକ୍ତ କରାଯାଇଥିଲା । ଅପହରଣକାରୀମାନେ ତାକୁ ମୁକ୍ତ କରିବା ପାଇଁ ସର୍ତ୍ତ ରଖିଥିଲେ। ମୁକ୍ତି ପରେ ସେ ଜୈଶ-ଇ-ମହମ୍ମଦ ଆତଙ୍କବାଦୀ ସଂଗଠନ ଗଠନ କରିଥିଲା । ଏହି ସଂଗଠନ ପାକିସ୍ତାନର ଆଇଏସଆଇ, ତାଲିବାନ ଏବଂ ଅଲ କାଇଦା ସହ ସମ୍ପର୍କ ରଖିଥିବାର ଅଭିଯୋଗ ରହିଛି।

ଭାରତୀୟ ଗୁଇନ୍ଦା ସଂସ୍ଥାମାନେ ଅଭିଯୋଗ କରିଛନ୍ତି ଯେ ପାକିସ୍ତାନର ଆନ୍ତଃସେବା ଗୁଇନ୍ଦା ସଂସ୍ଥା (ISI) ଆଝାରକୁ ସୁରକ୍ଷା ଓ ସମର୍ଥନ ଯୋଗାଇ ଦେଉଛି। ପାକିସ୍ତାନ ସରକାର ଏହାକୁ ଅସ୍ୱୀକାର କରିଥିଲେ ମଧ୍ୟ, ୨୦୨୨ରେ ପାକିସ୍ତାନର ପୂର୍ବତନ ବୈଦେଶିକ ମନ୍ତ୍ରୀ ବିଲାୱାଲ ଭୁଟ୍ଟୋ ଜରଦାରୀ ଦାବି କରିଥିଲେ ଯେ ଆଝାର ଆଫଗାନିସ୍ତାନରେ ଅଛି, କିନ୍ତୁ ତାଲିବାନ ସେତେବେଳେ ଏହାକୁ ଅସ୍ୱୀକାର କରିଥିଲା।

୨୦୧୯ରେ ମାସୁଦ ଆଝାରକୁ ଜାତିସଂଘ ସୁରକ୍ଷା ପରିଷଦର ଏକ କମିଟି ଦ୍ୱାରା ବିଶ୍ୱସ୍ତରୀୟ ଆତଙ୍କବାଦୀ ଭାବେ ଘୋଷଣା କରାଯାଇଥିଲା । ଫଳରେ ତାର ସମ୍ପତ୍ତି ଜବତ କରାଯିବା ସହ ଯାତ୍ରା ନିଷେଧ ଓ ଅସ୍ତ୍ରଶସ୍ତ୍ର ଉପରେ ପ୍ରତିବନ୍ଧକ ଲାଗୁ ହୋଇଥିଲା। କିନ୍ତୁ ପାକିସ୍ତାନରେ ତା ଉପରେ ଏହି ନିଷେଧାଜ୍ଞାର ପ୍ରଭାବ ସୀମିତ ଥିଲା ବୋଲି ଅଭିଯୋଗ ରହିଛି।

୨୦୨୫ ମେ ମାସରେ ଭାରତ ଦ୍ୱାରା ପାକିସ୍ତାନ ଓ PoKରେ କରାଯାଇଥିବା ଏୟାର ଷ୍ଟ୍ରାଇକରେ ଆଝାର ପରିବାରର ୧୦ ଜଣ ସଦସ୍ୟ ଏବଂ ୪ ଜଣ ନିକଟତମ ସହଯୋଗୀ ନିହତ ହୋଇଥିବା ଦାବି କରାଯାଇଛି। ଏହି ଆକ୍ରମଣ ବାହାଓ୍ଵାଲପୁରସ୍ଥିତ ଜୈଶର ମୁଖ୍ୟାଳୟ ମର୍କାଜ ସୁଭାନ ଆଲ୍ଲାହକୁ ଟାର୍ଗେଟ କରାଯାଇଥିଲା ।

ମାସୁଦ ଆଝାରଙ୍କ ଗିଲଗିଟ-ବାଲଟିସ୍ତାନରେ ଉପସ୍ଥିତି ଭାରତ-ପାକିସ୍ତାନ ସମ୍ପର୍କରେ ନୂଆ ଉତ୍ତେଜନା ସୃଷ୍ଟି କରିପାରେ। ଏହା ପାକିସ୍ତାନର ଆତଙ୍କବାଦ ବିରୋଧୀ ନୀତି ଉପରେ ମଧ୍ୟ ଏହା ପ୍ରଶ୍ନ ଉଠାଇଛି। ଭାରତୀୟ ଗୁଇନ୍ଦା ସଂସ୍ଥାମାନେ ଏହି ଘଟଣାରେ ଅଧିକ ସୂଚନା ସଂଗ୍ରହ କରୁଛନ୍ତି ।

ଅଧିକ ପଢ଼ନ୍ତୁ: ଆମେରିକା ନେଲା ପଦକ୍ଷେପ, ଭାରତ କହିଲା ଆମର ନୀତି ‘ଶୂନ୍ୟ ସହନଶୀଳତା’