ନିରୀହ ଜୀବର ଦେବଦୂତ : ବିବାହ ସମାରୋହ ଛାଡ଼ି କୁକୁରକୁ ନୂଆ ଜୀବନ ଦେଲେ ଯୁବକ

କୁକୁର ମଣିଷର ଅତି ବିଶ୍ୱସ୍ତ । ମାଲିକର ଭଲପାଇବା ପ୍ରତିବଦଳରେ ଅନେକ କିଛି କରିଯାଏ ନିରୀହ ପଶୁ । ଅନେକ ସମୟରେ ପୋଷା କୁକୁର ମାଲିକ ପାଇଁ ଜୀବନ ଦେଉଥିବା ଦେଖିବାକୁ ମିଳିଛି । ସିନେମା ହେଉ କି ବାସ୍ତବିକ ଜୀବନ, ଏପରି ଅନେକ କାହାଣୀ ଦେଖିବାକୁ ମିଳେ । ତେବେ ବର୍ତ୍ତମାନ ଏପରି ଏକ ଭିଡିଓ ଭାଇରାଲ ହେଉଛି, ଯେଉଁଥିରେ ଓଲଟା ଚିତ୍ର ଦେଖିବାକୁ ମିଳିଛି । କୁକୁରର ଜୀବନ ବଞ୍ଚାଇବା ପାଇଁ ଜଣେ ବ୍ୟକ୍ତି ବିବାହ ସମାରୋହ ଛାଡ଼ି ଆସିଥିବା ପରି ଘଟଣା ସାମ୍ନାକୁ ଆସିଛି ।

ଧୁମଧାମରେ ଚାଲିଥିବା ବିବାହ । ବିବାହ ସମାରୋହରେ ମସଗୁଲ ଥିଲେ ଶହ ଶହ ଲୋକ । ତେବେ ଏହି ସମୟରେ ଆକାଶୀ ରଙ୍ଗର ସାର୍ଟ ଓ କଳା ପ୍ୟାଣ୍ଟ୍‌ ପିନ୍ଧା ବ୍ୟକ୍ତି ଜଣକ ବିବାହ ସମାରୋହ ଛାଡ଼ି ପ୍ରଖର ପାଣିର ସ୍ରୋତ ଆଡ଼କୁ ଯାଉଥିବା ଦେଖିବାକୁ ମିଳୁଛି । ନୀରିହ ଜୀବଟି ପାଣିରେ କୂଳକିନାରା ପାଉନଥିବା ବେଳେ ଅଚାନକ୍‌ ଦେବଦୂତ ପରି ଉଭା ହୋଇଯାଆନ୍ତି ବ୍ୟକ୍ତି ଜଣକ । ନିଜ ଜୀବନକୁ ଖାତିର ନକରି ସେ ପ୍ରଖର ଜଳାଶୟ ସଂଲଗ୍ନ କଂକ୍ରିଟ୍‌ ପୋଲ ଉପରେ ଶୋଇଯାଆନ୍ତି ଓ କୁକୁରକୁ ଉଦ୍ଧାର କରିବାକୁ ଚେଷ୍ଟା କରନ୍ତି ।

ତଳେ ଭୟାନକ ଶଦ୍ଦ କରି ବହି ଯାଉଥାଏ ନଦୀ । ଜୀବନ ମରଣ ସହ ସଂଘର୍ଷ କରୁଥାଏ କୁକୁରଟି । ଆଉ ସେତେବେଳେ ସୁଟବୁଟ୍ ପିନ୍ଧା ବାବୁ ଜଣକ ସେଠାରେ ପହଞ୍ଚି କୁକୁରକୁ ନୂଆ ଜୀବନ ଦିଅନ୍ତି । ପ୍ରଖର ସ୍ରୋତ ମଧ୍ୟରୁ କୁକରକୁ ଟାଣି ଆଣନ୍ତି । ତେବେ ଏହି ସମୟରେ ଆଉ ଜଣେ ବ୍ୟକ୍ତି ମଧ୍ୟ ତାଙ୍କୁ ସାହାଯ୍ୟ କରୁଥିବା ଦେଖିବାକୁ ମିଳୁଛି ।

ଏହି ଭିଡିଓ ଦେଖି ୟୁଜର ସଂପୃକ୍ତ ବ୍ୟକ୍ତିଙ୍କୁ ପ୍ରଶଂସାରେ ପୋତି ପକାଉଛନ୍ତି । କିଛି ଘଣ୍ଟା ପୂର୍ବରୁ ରେଡିଟରେ ସେୟାର ହୋଇଥିବା ଭିଡିଓଟି ରାତାରାତି ଭାଇରାଲ ହୋଇଯାଇଛି । ଏବେ ସୁଦ୍ଧା ଶହ ଶହ ସକରାତ୍ମକ ମନ୍ତବ୍ୟ ଦେଇଛନ୍ତି ଲୋକେ ।