Lashkar Terrorist: ଅପରେସନ ସିନ୍ଦୁରରେ ଘାଇଲା ହୋଇଥିଲା, ବିଛଣାରେ ପଡ଼ି ପଡ଼ି ମଲା

ଲସ୍କର-ଏ-ତୋଇବାର ଦୁର୍ଦ୍ଦାନ୍ତ ଆତଙ୍କବାଦୀ ଅବଦୁଲ ଆଜିଜ, ଯିଏ ୨୦୦୧ ଭାରତୀୟ ସଂସଦ ଆକ୍ରମଣ ଏବଂ ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣରେ ମୁଖ୍ୟ ଭୂମିକା ଗ୍ରହଣ କରିଥିଲା, ପାକିସ୍ତାନର ବାହାୱାଲପୁରରେ ଏକ ହସ୍ପିଟାଲରେ ମୃତ୍ୟୁବରଣ କରିଛି। ସୂତ୍ର ଅନୁଯାୟୀ, ଭାରତର ଅପରେସନ ସିନ୍ଦୁର ସମୟରେ ମେ ୬ ତାରିଖରେ ଭାରତର ଏକ ମିସାଇଲ ଆକ୍ରମଣରେ ସେ ଆହତ ହୋଇଥିଲା। ଆଜିଜ ଲସ୍କର-ଏ-ତୋଇବାର ଡେପୁଟି ଚିଫ୍ ସୈଫୁଲ୍ଲା କାସୁରୀର ସେ ଘନିଷ୍ଠ ସହଯୋଗୀ ଥିଲା।

ଅବଦୁଲ ଆଜିଜ ପାକିସ୍ତାନର ଆତଙ୍କବାଦୀ ସଂଗଠନ ଲସ୍କର-ଏ-ତୋଇବାର ଜଣେ ଶୀର୍ଷ ନେତା ଥିଲା। ଭାରତର ଅପରେସନ ସିନ୍ଦୁର ବେଳେ ହୋଇଥିବା ମିସାଇଲ ଆକ୍ରମଣରେ ସେ ଆହତ ହୋଇ ଚିକିତ୍ସିତ ହେଉଥିଲା। ଚିକିତ୍ସାଧୀନ ଅବସ୍ଥାରେ ତାର ମୃତ୍ୟ ହୋଇଛି। ସୋସିଆଲ ମିଡିଆରେ ଭାଇରାଲ ହେଉଥିବା କିଛି ଭିଡିଓରେ ତା’ର ଅନ୍ତିମ ସଂସ୍କାର ବେଳେ ଲସ୍କରର ବରିଷ୍ଠ ନେତାମାନେ ଯଥା ଡେପୁଟି ଚିଫ୍ ସୈଫୁଲ୍ଲା କାସୁରୀ ଏବଂ ଅବଦୁର ରଉଫ ଉପସ୍ଥିତ ଥିବା ଦେଖାଯାଉଛି।

ଆଜିଜ ଲସ୍କରର ଅତ୍ୟନ୍ତ ବିଶ୍ବସ୍ତ ଅପରେଟିଭ ଏବଂ ଏକ ମୁଖ୍ୟ ଆର୍ଥିକ ସଂଗ୍ରହକାରୀ ଥିଲା। ସେ ଗଲ୍ଫ ଦେଶ, ଯୁକ୍ତରାଷ୍ଟ୍ର ଆମେରିକା ଏବଂ ୟୁନାଇଟେଡ୍ କିଙ୍ଗଡମରେ ଥିବା ପାକିସ୍ତାନୀ ସମ୍ପ୍ରଦାୟ ଏବଂ ରାଡିକାଲ ଇସଲାମିକ ଗୋଷ୍ଠୀ (ରାଜନୈତିକ ସ୍ବାର୍ଥ ପାଇଁ ହିଂସାକାଣ୍ଡ ଘଟାଉଥିବା ଆତଙ୍କୀ ଗୋଷ୍ଠୀ) ମାନଙ୍କଠାରୁ ଅର୍ଥ ସଂଗ୍ରହ କରୁଥିଲା। ଅର୍ଥ ସଂଗ୍ରହ ବ୍ୟତୀତ, ଆଜିଜ ଲଜିଷ୍ଟିକ୍ସ, ଅସ୍ତ୍ରଶସ୍ତ୍ର ଯୋଗାଣ ଏବଂ ବିଭିନ୍ନ ଆତଙ୍କବାଦୀ କାର୍ଯ୍ୟକଳାପ ପାଇଁ ନିଯୁକ୍ତି ପରିଚାଳନା କରୁଥିଲେ। ତେଣୁ ଆଜିଜର ମୃତ୍ୟୁ ଲସ୍କର-ଏ-ତୋଇବା ପାଇଁ ଏକ ବଡ଼ ଝଟକା।

ଅବଦୁଲ ଆଜିଜ ଭାରତରେ ଅନେକ ଆତଙ୍କବାଦୀ ଆକ୍ରମଣ ସହ ଜଡ଼ିତ ଥିଲା। ଯଦିଓ ସେ ସିଧାସଳଖ ଯୋଜନା କରିନଥିଲା, କିନ୍ତୁ ସେ ଅର୍ଥ ଏବଂ ସମ୍ବଳ ଯୋଗାଣ କରି ଗୁରୁତ୍ବପୂର୍ଣ ଭୂମିକା ଗ୍ରହଣ କରୁଥିଲା। ଗୁଇନ୍ଦା ରିପୋର୍ଟ ଅନୁଯାୟୀ, ସେ ୨୦୦୧ ସଂସଦ ଆକ୍ରମଣ ପାଇଁ ପାକିସ୍ତାନରୁ ଅର୍ଥ ଏବଂ ଉପକରଣ ପଠାଇବାରେ ସାହାଯ୍ୟ କରିଥିଲା। ୨୦୦୬ ମୁମ୍ବାଇ ଲୋକାଲ ଟ୍ରେନ ବିସ୍ଫୋରଣରେ ମଧ୍ୟ ଅର୍ଥ ଯୋଗାଣ କରିଥିଲା। ୨୦୦୮ ମୁମ୍ବାଇ ଆକ୍ରମଣ ସମୟରେ, ଆଜିଜ ସମୁଦ୍ର ମାର୍ଗରେ ଅସ୍ତ୍ରଶସ୍ତ୍ର ଏବଂ ସାଟେଲାଇଟ ଫୋନ ଯୋଗାଣରେ ସହାୟତା କରିଥିଲା। ସେ ଜମ୍ମୁ ଓ କାଶ୍ମୀରରେ ସ୍ଥାନୀୟ ଆତଙ୍କବାଦୀ ଗୋଷ୍ଠୀଗୁଡ଼ିକୁ ଅର୍ଥ ଯୋଗାଣ କରିବା ସହ ସ୍ଥାନୀୟ ଯୁବକମାନଙ୍କୁ ଉଗ୍ରବାଦୀ କାର୍ଯ୍ୟକଳାପରେ ନିୟୋଜିତ କରାଇବା ପାଇଁ ପ୍ରମୁଖ ଭୂମିକା ଗ୍ରହଣ କରିଥିଲା।

ଅଧିକ ପଢ଼ନ୍ତୁ: ଧର୍ମ ନାଁରେ ପାକିସ୍ତାନରେ ଏକାଠି ହେଲେ କଠୋରପନ୍ଥୀ; ନିଜ ସେନାକୁ ପ୍ରଶଂସା, ଭାରତକୁ ଚେତାବନୀ