ଦୁଷ୍କର୍ମ ଅଭିଯୋଗରେ କାଟୁଥିଲା ସଜା; କାମୁଡ଼ି ମାରିଦେଲେ କୀଟ-ଓଡ଼ଶ

ଦୁନିଆରେ ଏମିତି କିଛି ଖବର ବେଳେବେଳେ ସାମ୍ନାକୁ ଆସିଥାଏ ଯାହା ଲୋକମାନଙ୍କୁ ଆଶ୍ଚର୍ଯ୍ୟ କରିଦିଏ । କେହି କେହି ସେହି ଘଟଣାକୁ ବିଶ୍ୱାସ ମଧ୍ୟ କରିପାରନ୍ତିନାହିଁ । କିଛି ଲୋକ ଘଟଣାଟିକୁ ମିଛ ବୋଲି ଧରିନିଅନ୍ତି । ଆଉ ସେହିପରି ଏକ ଖବର ବର୍ତ୍ତମାନ ସାମ୍ନାକୁ ଆସିଛି । ଯାହା ଆପଣଙ୍କୁ ନିଶ୍ଚୟ ଚକିତ କରିଦେବ । ଜଣେ କଏଦୀଙ୍କୁ କିଛି କୀଟ ଓ ଓଡ଼ଶ କାମୁଡିବା ଫଳରେ ତାଙ୍କର ମୃତ୍ୟୁ ଘଟିଛି ।

ଗଣମାଧ୍ୟମର ରିପୋର୍ଟ ଅନୁସାରେ, ଅନ୍ତେବାସୀଙ୍କ ନାମ ଲାଶନ୍ ଥମ୍ପସନ୍ । ଅଭିଯୁକ୍ତ ଜଣକ ଦୁଷ୍କର୍ମ ମାମଲାରେ ଦୋଷୀ ସାବ୍ୟସ୍ତ ହୋଇ ଜେଲରେ ଥିଲେ । ଦଣ୍ଡାଦେଶ ପରେ ଥମ୍ପସନଙ୍କୁ କିଛି ଦିନ ସାଧାରଣ ଜେଲରେ ରଖାଯାଇଥିଲା ହେଲେ କିଛି ଦିନ ପରେ ତାଙ୍କୁ ପୁଣି କୋର୍ଟରେ ହାଜର କରାଯାଇଥିଲା ।

କୋର୍ଟରେ ମାମଲାର ଶୁଣାଣି ସମୟରେ ବିଚାରପତି ଅଭିଯୁକ୍ତକୁ ମାନସିକ ସ୍ତରରେ ଅସୁସ୍ଥ ବୋଲି ରାୟ ଦେବା ପରେ ତାଙ୍କୁ ଜେଲର ମାନସିକ ରୋଗ ଗୃହରେ ରଖାଯାଇଥିଲା । ସେଠାରେ ତାଙ୍କୁ ପଶୁ ପରି ଖରାପ ବ୍ୟବହାର କରାଯାଇଥିବା ତାଙ୍କ ପରିବାର ଲୋକ ଅଭିଯୋଗ ଆଣିଛନ୍ତି । ଏପରି ଏକ ଖବର ଆମେରିକାର ଅଟଲାଣ୍ଟା ଜେଲ୍‌ରୁ ଆସିଛି । ଯେଉଁଠି କିଛି କୀଟ ଓ ଓଡ଼ଶ କାମୁଡ଼ିବା ଫଳରେ ଜଣେ କଏଦୀର ମୃତ୍ୟୁ ହୋଇଥିବା ଦାବି କରାଯାଇଛି ।

ଘଟଣାକୁ ନେଇ ମୃତ ଅଭିଯୁକ୍ତର ଓକିଲ ପ୍ରତିକ୍ରିୟା ରଖିଛନ୍ତି । ଓକିଲ ମାଇକେଲ ଡି ହାରପର୍‌ଙ୍କ ଦାବି କରିଛନ୍ତି କି, କଏଦୀ ଜଣଙ୍କୁ ପଶୁ ଠାରୁ ଖରାପ ବ୍ୟବହାର କରାଯାଇଥିଲା । କଏଦୀ ରହିଥିବା ଗୃହରେ କୌଣସି ପଶୁ ମଧ୍ୟ ରହିପାରିବ ନାହଁ ବୋଲି ସେ କହିଛନ୍ତି ।

ଏଥିସହିତ କଏଦୀଙ୍କ ମୃତ୍ୟୁ ପାଇଁ ଓକିଲ ଜଣକ ଜେଲ୍‌ ପ୍ରଶାସନକୁ ଦାୟୀ କରିଛନ୍ତି । ପ୍ରଶାସନ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଦାବି କରାଯାଇଛି । ମୃତ କଏଦୀଙ୍କ ଶରୀରର ଫଟୋ ସେୟାର କରିଛନ୍ତି ଓକିଲ । କଏଦୀଙ୍କ ମୃତଦେହରେ ଲକ୍ଷ ଲକ୍ଷ କୀଟ ଏବଂ ଓଡ଼ଶର କାମୁଡ଼ିବାର କ୍ଷତଚିହ୍ନ ଦେଖାଯାଇଥିଲା ।

ଘଟଣାକୁ ନେଇ ଜେଲ୍‌ ପ୍ରଶାସନ ସ୍ପଷ୍ଟୀକରଣ ରଖିଛି । ଜେଲ୍‌ ପ୍ରଶାସନ କହିଛି, ଥମ୍ପସନଙ୍କୁ ତିନିମାସ ପୂର୍ବରୁ ଗିରଫ କରାଯାଇଥିଲା । ଜେଲର ବ୍ୟାରେଜରେ ସେ ଚେତାଶୂନ୍ୟ ହୋଇପଡିଥିଲେ । ଡାକ୍ତରୀ ରିପୋର୍ଟ ଅନୁଯାୟୀ ଥମ୍ପସନଙ୍କୁ ବଞ୍ଚାଇବାକୁ ଚେଷ୍ଟା କରାଯାଇଥିଲା, କିନ୍ତୁ ତାଙ୍କର ମୃତ୍ୟୁ ହୋଇଥିଲା । ହେଲେ ମୃତ କଏଦୀ ଜଣକ ରହୁଥିବା ଗୃହରେ କୀଟ ଏବଂ ଓଡ଼ଶ ରହିଥିବା ଜେଲ ପ୍ରଶାସନ ସ୍ୱୀକାର କରିଛି ।