Iran Israel War: ଇରାନ ଯୁଦ୍ଧରେ ଫସିଥିଲେ, ଭାରତ ଫେରିଲେ ମହିଳା: ସ୍ୱାମୀ କହିଲେ ସେଠାରେ ସହିଦ ହୋଇଥିଲେ ଭଲ...

ଚାଲିଛି ଅପରେସନ ସିନ୍ଧୁ । ଇରାନ-ଇସ୍ରାଏଲ ମଧ୍ୟରେ ଯୁଦ୍ଧ ଜାରି ରହିଥିବାବେଳେ ଭାରତୀୟଙ୍କୁ ଫେରାଇ ଆଣିବାରୁ ସରକାର ପ୍ରତିଶ୍ରୁତିବଦ୍ଧ । ଏହାରି ଭିତରେ ସାମ୍ନାକୁ ଆସିଛି ଏକ ଅଜବ ଘଟଣା । ଇରାନରେ ଫସିଥିବା ଭାରତୀୟଙ୍କୁ ସୁରକ୍ଷିତ ଭାବେ ଫେରାଇ ଆଣିବାକୁ ରାଜ୍ୟ ସରକାର ପ୍ରଚେଷ୍ଟା ଚଳାଇଛନ୍ତି । ସୁରକ୍ଷିତ ଭାବେ ସ୍ୱଦେଶ ଫେରିଥିବା ଭାରତୀୟ ଏଥିପାଇଁ ସରକାରଙ୍କୁ ଧନ୍ୟବାଦ ଜଣାଉଥିବାବେଳେ ଆଉ କେତେକ ଲୋକଙ୍କ କଥା ଶୁଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ । କାରଣ ସେମାନଙ୍କ କହିବା କଥା ହେଉଛି ଭାରତ ଫେରିବାଠୁ ଭଲ ଇରାନରେ ସହିଦ ହୋଇଯିବା । 

ଦିଲ୍ଲୀ ବାସିନ୍ଦା ନିଦାଙ୍କ କ୍ଷେତ୍ରରେ ଏପରି ଘଟିଛି । ନିଦା ଇରାନରୁ ଭାରତ ଫେରିଥିବାବେଳେ ତାଙ୍କୁ ନେବା ପାଇଁ ଏୟାରପୋର୍ଟ ଆସିଥିଲେ ସ୍ୱାମୀ । ଭାରତ ସରକାରଙ୍କ ଦ୍ୱାରା ଜାରି ରହିଥିବା ଅପରେସନର ତୃତୀୟ ପର୍ଯ୍ୟାୟରେ ୫୬ ଜଣ ଭାରତୀୟ ଆସିଥିଲେ । ସେହି ବିମାନରେ ନିଦା ମଧ୍ୟ ଥିଲେ । ସେପଟେ ନିଦା ଆସିବା ପରେ ତାଙ୍କ ସ୍ୱାମୀ ପ୍ରତିକ୍ରିୟା ରଖି କହିଛନ୍ତି, ଇରାନ ମାଟିରେ ମୃତ୍ୟୁ ହୋଇଥିଲେ ସହିଦ ହୋଇଥାନ୍ତା । ସେଠାରେ ଯିଏ ମରିବ ସେ ଅମର ହୋଇଯିବ । ଏବେ ଇରାନର ମାଟିରେ ସହିଦ ହେବାର ସମୟ ଆସିଛି । 

ନିଦା ଏ ସମ୍ପର୍କରେ ସୂଚନା ଦେଇ କହିଛନ୍ତି ଯେ, ସେ ୩ ଜୁନରେ ଇରାନ ଯାଇଥିଲେ । ଇରାନରେ ସ୍ଲୋ ନେଟୱାର୍କ କାରଣରୁ କାହା ସହ ଯୋଗାଯୋଗ ହୋଇପାରୁନଥିଲା । ଏଭଳି ସ୍ଥିତିରେ ଭାରତ ସରକାର ସହାୟତା କରି ଫେରାଇ ଆଣିଥିବାରୁ କୃତଜ୍ଞତା ଜ୍ଞାପନ କରିଛନ୍ତି ନିଦା । ସେ କହିଛନ୍ତି ଯେ, କେବଳ ସୀମାରେ ସମସ୍ୟା ହେଲା । ତା' ପରେ ଆମେ ସୁରକ୍ଷିତ ଭାବେ ଆସିଗଲୁ । 

ନିଦାଙ୍କ ସ୍ୱାମୀ ଏହା ମଧ୍ୟ କହିଛନ୍ତି, "ଆମ ଧର୍ମ ଅନୁସାରେ ମୃତ୍ୟୁଠାରୁ ଶ୍ରେୟସ୍କର ଆଉ କିଛି ନୁହେଁ । ତେଣୁ ଏଠାକୁ ଫେରିବା ଅପେକ୍ଷା ସେଠାରେ ସହିଦ ହୋଇଯାଇଥିଲେ ଭଲ ହୋଇଥାଆନ୍ତା । ସମୟ ଆସିଲେ ଭାରତ ପାଇଁ ମଧ୍ୟ ସହିଦ ହେବୁ । ଏବେ ଇରାନ ପାଇଁ ସହିଦ ହେବାର ସମୟ ।" ନିଦାଙ୍କ ସ୍ୱାମୀଙ୍କ ଏହି କଥା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।  

ଅଧିକ ପଢନ୍ତୁ: ବଙ୍କରରେ ଲୁଚି ଉତ୍ତରାଧିକାରୀ ବାଛିଲେ ଇରାନର ସୁପ୍ରିମ ଲିଡର