ଭୟ, ଆତଙ୍କ, ଅନିଶ୍ଚିତତା ! ତାଲିବାନକୁ ଚ୍ୟାଲେଞ୍ଜ ଦେଇଛନ୍ତି ଉପରାଷ୍ଟ୍ରପତି ଅମରୁଲ୍ଲା ସାହ୍ଲେ

ଭୟ, ଆତଙ୍କ, ଅନିଶ୍ଚିତତା । ତାଲିବାନର କବ୍‌ଜା ପରେ ରାଜଧାନୀ କାବୁଲ ସମେତ ସମଗ୍ର ଆଫ୍‌ଗାନିସ୍ତାନରେ ଅବିଶ୍ୱାସର ବାତାବରଣ । କଟ୍ଟର ପ୍ରବୃତ୍ତି ଛାଡି ମାନବୀୟ ଢଙ୍ଗରେ ଶାସନ କରିବାକୁ ତାଲିବାନର ପ୍ରତିଶ୍ରୁତିକୁ ଗ୍ରହଣ କରିପାରୁନାହାନ୍ତି ଦେଶବାସୀ । ଏହାସତ୍ତ୍ୱେ ସରକାର ଗଠନ ଲାଗି ତତ୍ପର ହୋଇଛି ତାଲିବାନ୍ । ୨୦ ବର୍ଷ ପରେ ସ୍ୱଦେଶ ଫେରିଆସିଛନ୍ତି ସଂଗଠନର ପ୍ରମୁଖ ନେତା ଅବଦ୍ଦୁଲ ଘନି ବରାଦର୍ । ତେବେ ତାଲିବାନ ପ୍ରଭୁତ୍ୱକୁ ସ୍ୱୀକାର କରିବାକୁ ମନା କରିଦେବା ସହ ନିଜକୁ ଦେଶର କାମଚଳା ରାଷ୍ଟ୍ରପତି ଘୋଷଣା କରିଛନ୍ତି ଉପରାଷ୍ଟ୍ରପତି ଅମରଉଲ୍ଲା ସାହ୍ଲେ । ତେବେ ଅନିଶ୍ଚିତତାର କଳା ବାଦଲ ଭିତରେ ଏଠାରେ ଫସି ରହିଥିବା ଭାରତୀୟଙ୍କୁ କିଭଳି ଉଦ୍ଧାର କରାଯିବ ତାହା ଏବେ ବଡ଼ ପ୍ରଶ୍ନ ପାଲଟିଛି ।

ସରକାରୀ କର୍ମଚାରୀଙ୍କୁ ସର୍ବକ୍ଷମା, ମହିଳାମାନଙ୍କୁ କାମ କରିବା ଲାଗି ଅନୁମତି, କୌଣସି ବିଦେଶୀ ନାଗରିକଙ୍କୁ କ୍ଷତି ନପହଞ୍ଚାଇବା ଲାଗି ପ୍ରତିଶ୍ରୁତି ସହ କାବୁଲ କବ୍‌ଜା ପରେ ୯୦ ଦଶକର ଛବି ସୁଧାରି ନିଜକୁ ନୂଆ ରୂପରେ ଉପସ୍ଥାପନ କରିବାକୁ ତାଲିବାନର ପ୍ରୟାସ । ତେବେ ଏହି ଆତଙ୍କୀ ସଂଗଠନକୁ ବିଶ୍ୱାସକୁ ନେଉନାହାନ୍ତି ଆଫ୍‌ଗାନିସ୍ତାନବାସୀ । ସେଥିଲାଗି ଜାରି ରହିଛି କାବୁଲରୁ ପଳାୟନ ପ୍ରୟାସ ।

Also Read

ସବୁଠାରୁ ବିପଜ୍ଜନକ ଯାଗାକୁ ଯାଇଥିଲେ, ପରିସ୍ଥିତି ଏମିତି ହେଲା…

ଧୀରେ ଧୀରେ ପଦାକୁ ଆସୁଛି ତାଲିବାନର ଅସଲ ଚେହେରା

ବଲିଉଡ ଡେବ୍ୟୁ କରିବେ ଶାହରୁଖ ଲଳନା ସୁହାନା ଖାନ୍

ଏପଟେ କାବୁଲ ଅଧିକାର ପରେ ମଧ୍ୟବର୍ତ୍ତୀକାଳୀନ ସରକାର ଗଠନ ଲାଗି ପ୍ରୟାସ ଆରମ୍ଭ କରିଛି ତାଲିବାନ । ସଂଗଠନର ମୁଖ୍ୟ ଅବଦ୍ଦୁଲ ଘନି ବରାଦର ଦୋହାରୁ ଆସି କାନ୍ଦାହାରରେ ପହଞ୍ଚିଛନ୍ତି । ହବୈତୁଲ୍ଲା ଅଖୁନଜାଦା ତାଲିବାନର ସୁପ୍ରିମ୍ ଲିଡର ହୋଇଥିଲେ ମଧ୍ୟ ବରାଦର ହିଁ ରାଷ୍ଟ୍ରପତି ହୋଇପାରନ୍ତି ବୋଲି କୁହାଯାଉଛି ।

ତେବେ ସଂଗଠନ ପ୍ରତି ନୂଆ ଚ୍ୟାଲେଞ୍ଜ ସୃଷ୍ଟି କରିଛନ୍ତି ଉପରାଷ୍ଟ୍ରପତି ଅମରୁଲ୍ଲା ସାହ୍ଲେ । ଅସ୍ରଫ ଘନିଙ୍କ ପଳାୟନ ଓ ଆଫ୍‌ଗାନିସ୍ତାନ ସରକାରଙ୍କ ପତ୍ତନ ସତ୍ତ୍ୱେ ଦେଶର ସମ୍ବିଧାନ ଅନୁସାରେ ନିଜକୁ କାମଚଳା ରାଷ୍ଟ୍ରପତି ଘୋଷଣା କରିବା ସହ ତାଲିବାନ ବିରୁଦ୍ଧରେ ଲଢେଇ ଜାରି ରହିବ ବୋଲି ସେ କହିଛନ୍ତି । ହିନ୍ଦୁକୁଶ ପର୍ବତାଞ୍ଚଳରେ ଅବସ୍ଥିତ ଓ ତାଲିବାନ ନିୟନ୍ତ୍ରଣକୁ ଯାଇନଥିବା ପଞ୍ଜସିର୍ ପ୍ରଦେଶରେ ପହଞ୍ଚିବା ପରେ ସେ ତାଲିବାନକୁ ଚ୍ୟାଲେଞ୍ଜ ଦେଇଛନ୍ତି । ପୂର୍ବତନ ଓ୍ୱାର-ଲଡ୍ ଅହମ୍ମଦ ଶାହା ମାସୁଦର ପୁଅ ଅହମ୍ମଦ ମାସୁଦ୍ ଓ ପ୍ରତିରକ୍ଷା ମନ୍ତ୍ରୀ ବିସ୍‌ମିଲ୍ଲା ମହମଦିଙ୍କ ସମର୍ଥନରେ ସେ ତାଲିବାନ ବିରୁଦ୍ଧରେ ଲଢେଇ ଜାରି ରଖିବେ ବୋଲି କହିଛନ୍ତି ।

ଅନ୍ୟପକ୍ଷରେ ଆଫଗାନିସ୍ତାନ ଜନସାଧାରଣ ମଧ୍ୟ ତାଲିବାନ୍ ବିରୁଦ୍ଧରେ ସ୍ୱର ଉତ୍ତୋଳନ ଆରମ୍ବ କରିଛନ୍ତି । ସରକାରୀ ଅଫିସ୍‌ଗୁଡିକ ଉପରେ ତାଲିବାନ ପତାକା ବଦଳରେ ଆଫ୍‌ଗାନିସ୍ତାନ ଜାତୀୟ ପାତାକା ଲଗାଇବାକୁ ଦାବି କରି ଜଲାଲାବାଦ୍‌ରେ ଲୋକେ ଶୋଭାଯାତ୍ରା କରିଥିଲେ । ତେବେ ତାଲିବାନ ଆତଙ୍କୀ ସେମାନଙ୍କୁ ଉପରକୁ ଗୁଳି ଚଳାଇବାରୁ କିଛି ଆନ୍ଦୋଳନକାରୀଙ୍କ ଜୀବନ ଯାଇଥିବା ବେଳେ ଅନେକ ଆହତ ହୋଇଛନ୍ତି । ଆଫ୍‌ଗାନିସ୍ତାନରେ ଲାଗି ରହିଥିବା ବିପର୍ଯ୍ୟୟ ମଧ୍ୟରେ ତାଲିବାନ କବ୍‌ଜାରୁ ଖସି ପଳାଇ ଆସିବା ହିଁ ଶ୍ରେଷ୍ଠ ବିକଳ୍ପରେ ପରିଣତ ହୋଇଛି ।

Also Read

ଚାରିଆଡ଼େ ଆତଙ୍କ, ଭୟ ଆଉ କାନ୍ଦବୋବାଳି : କାବୁଲ ଏୟାରପୋର୍ଟରେ ମହିଳା ଓ ପିଲାଙ୍କୁ ଆକ୍ରମଣ କଲେ ତାଲିବାନୀ

ରାଜ୍ୟରେ ୨ କୋଟି ଟପିଲା କୋଭିଡ୍ ଟିକାକରଣ, ତଥାପି ଥମୁନି ସଂକ୍ରମଣ

‘ବେଲ୍ ବଟମ୍’ ରିଲିଜ୍ ପୂର୍ବରେ ଲଣ୍ଡନରେ ଅକ୍ଷୟ କୁମାର

ଅନ୍ୟପକ୍ଷରେ ଏଠାରେ ରହୁଥିବା ହିନ୍ଦୁ ଓ ଶିଖ୍ ସମୁଦାୟଙ୍କ ପାଇଁ ବିଷମ ପରିସ୍ଥିତି ସୃଷ୍ଟି ହୋଇଛି । କାରଣ ଏମାନଙ୍କ ଉପରେ ତାଲିବାନୀଙ୍କ କ୍ରୁର ଦୃଷ୍ଟି ପଡିବାର ଯଥେଷ୍ଟ ଆଶଙ୍କା ରହିଛି । ତେଣୁ ଯଥାଶୀଘ୍ର ଏଠାରେ ରହୁଥିବା ଭାରତୀୟଙ୍କୁ ଉଦ୍ଧାର ଲାଗି ଦାବି ଜୋରଦାର ହୋଇଛି । ତେବେ ଆଫ୍‌ଗାନିସ୍ତାନକୁ ବ୍ୟବସାୟିକ ବିମାନ ଚଳାଚଳ ଆରମ୍ଭ ହେଲେ ପ୍ରାଥମିକତା ଭିତ୍ତିରେ ଭାରତୀୟଙ୍କୁୁ ସ୍ୱଦେଶ ଫେରାଇ ଅଣାଯିବ ବୋଲି ଆଶ୍ୱାସନା ଦେଇଛନ୍ତି ବୈଦେଶିକ ବ୍ୟାପାର ମନ୍ତ୍ରୀ ଏସ. ଜୟଶଙ୍କର । ସେହିପରି ଆଫ୍‌ଗାନିସ୍ତାନରେ ଫସି ରହିଥିବା ଭାରତୀୟଙ୍କୁ ଫେରାଇ ଆଣିବା ଲାଗି ଯଥା ସମ୍ଭବ ପ୍ରୟାସ କରାଯିବ ବୋଲି କହିଛନ୍ତି ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ।

୧୯୯୬ରୁ ୨୦୦୧, ୫ ବର୍ଷ ଧରି ଆଫ୍‌ଗାନିସ୍ତାନରେ ଜାରି ରହିଥିଲା ତାଲିବାନର କଳା ଶାସନ । କଠୋର ଇଲସାମୀୟ ଆଇନ ବା ସରିଆ ନାଁରେ ଦେଶର କଳା-ସଂସ୍କୃତି ଓ ଐତିହକୁ ଖିନ୍‌ଭିନ୍‌ କରିଦେଇଥିଲା ବର୍ବର ଆତଙ୍କୀ ସଂଗଠନ । ସେମାନଙ୍କ କବଳରୁ ବର୍ତ୍ତିନଥିଲା ଶହ ଶହ ବର୍ଷ ପୁରୁଣା ବାମିୟାନ ବୌଦ୍ଧମୂର୍ତ୍ତି । ତେବେ ଏବେକାର ତାଲିବାନ ନବେ ଦଶକର ତାଲିବାନ ନୁହେଁ ବୋଲି ସଂଗଠନ ପକ୍ଷରୁ ଦାବି କରାଯାଇଥିଲେ ମଧ୍ୟ ଏହାର କାର୍ଯ୍ୟଶୈଳୀରୁ ତାହା ପ୍ରତିଫଳିତ ହେଉନି । କାବୁଲ ଦଖଲ କରୁ କରୁ ପୂର୍ବତନ ଶତ୍ରୁ ତଥା ହାଜାରା ନେତା ଅବଦ୍ଦୁଲ ଅଲି ମାଜାରୀଙ୍କ ପ୍ରତିମୂର୍ତ୍ତିକୁ ବିସ୍ଫୋରଣରେ ଉଡାଇ ଦେଇଛି ଏହି ଆତଙ୍କୀ ସଂଗଠନ ।