ନିଖୋଜ ପୁଅ ଫେରିବାକୁ...ତୁଳସୀ ମୂଳେ ବସି ପ୍ରାର୍ଥନା କରୁଛି ମାଆ

ତୁଳସୀ ଗଛ ମୂଳରେ ଘିଅ ଦୀପ ଜାଳୁଛି...ବରଗଛରେ ଚନ୍ଦନ ସହ ସିନ୍ଦୂର ଲଗାଇ ପୂଜା କରୁଛି । ଭୋଗ ଦେଇ ମାଆ ବୃନ୍ଦାବତୀ ପାଖରେ ନେହୁରା ହେଉଛି । କାନ୍ଦି କାନ୍ଦି କହୁଛି ମାଆଲୋ ମୋ ପୁଅକୁ ଫେରାଇ ଆଣ । ତତେ ମୁଁ ଆଉ କିଛି ମାଗୁନି । ୧୧ ବର୍ଷର ପୁଅ ନିଖୋଜ ହେବା ପରେ ପୁଅକୁ ପାଇବା ଲାଗି ପୂଜାର୍ଚ୍ଚନା କରୁଛନ୍ତି ଜଣେ ମାଆ ।

ଖେଳୁଥିଲା ବୁଲୁଥିଲା...ବାପ-ମାଆଙ୍କର ଥିଲା ସେ ଗେହ୍ଲା ପୁଅ । ବୟସ ମାତ୍ର ୧୧...କିନ୍ତୁ ଖେଳୁଖେଳୁ ସେ କୁଆଡେ ପଳେଇ ଗଲା ଯେ ଖୋଜି ଖୋଜି ନୟାନ୍ତ ହେଲେଣି ବାପା । କିନ୍ତୁ ପୁଅର ମିଳୁନି ସନ୍ଧାନ । ଆଉ ପୁଅକୁ ନପାଇବା ପରେ ପରିବାର ସହ ଗାଁ ଲୋକ...ସମସ୍ତଙ୍କ ଆଖିରେ ଲୁହ ।  ନଈ ପଠାକୁ ଲାଗି ମନୋଜଙ୍କ ଘର । ଭଙ୍ଗା ଦଦରା ଘରେ ବାପା-ମାଆଙ୍କ ସହ ମନୋଜ ରହୁଥିଲେ ।

ଖରାଛୁଟି ଥିବାରୁ ନଈ ପଠାକୁ ସବୁବେଳେ ଖେଳିବାକୁ ଯାଆନ୍ତି ମନୋଜ । ସେଦିନ ଥିଲା ୨୪ ତାରିଖ । ସବୁଦିନ ପରି ନଈ ପଠାକୁ ଖେଳିବାକୁ ଯାଇଥିଲା ମନୋଜ । ହେଲେ ଘରକୁ ଫେରିନଥିଲେ । ସଂଧ୍ୟା ହେବା ପରେ ଘରକୁ ନଫେରିଥିବାରୁ ବାପା-ମାଆ ପୁଅକୁ ଖୋଜିଥିଲେ କିନ୍ତୁ ପାଇନଥିଲେ । ପୁଅ ନିଖୋଜ ଥିବାରୁ ଥାନାରେ ଏନେଇ ମାମଲା ବି ରୁଜୁ କଲେ ।

୨୪ ତାରିଖରୁ ୩ ତାରିଖ ହେଲାଣି । କିନ୍ତୁ ଘରକୁ ଫେରିନାହାନ୍ତି ମନୋଜ । ତେଣୁ ପୁଅ କେମିତି ଘରକୁ ଫେରିବ ସେନେଇ ଏମିତି ତୁଳସୀ ମୂଳରେ ପୂଜାର୍ଚ୍ଚନା କରୁଛି ମାଆ । ସେପଟେ ଗାଁ ଲୋକ କହୁଛନ୍ତି, ମନୋଜ ବେଶ ଶାନ୍ତ ସ୍ୱଭାବର ଥିଲେ । ସମସ୍ତଙ୍କ ସହ ଭଲରେ ମିଶୁଥିଲେ । ବୋଧହୁଏ ତାଙ୍କୁ କିଏ ନେଇଯାଇଛି...ସେଇଥି ଲାଗି ସେ ଘରକୁ ଫେରିପାରୁନାହାନ୍ତି ।

ତେବେ ପୂରା ଘଟଣାରେ କିଶନନଗର ଆଇଆଇସି କହୁଛନ୍ତି, ପୋଲିସ ପକ୍ଷରୁ ମନୋଜଙ୍କୁ ଖୋଜା ଚାଲିଛି । ଏଯାଏଁ ସନ୍ଧାନ ମିଳିନି, ହେଲେ ପୁଅ ଘରକୁ ଫେରିନଥିବାରୁ ଏମିତି ପୂଜାର୍ଚ୍ଚନା କରୁଛି ମାଆ ।