ଭାଗ୍ୟ ବଦଳାଇ ଦେଲା ଗୋଲାପ ଚାଷ...ମାସକୁ ଏତିକି ହେଉଛି ରୋଜଗାର

ଭାଗ୍ୟ ବଦଳାଇ ଦେଲା ଫୁଲ ଚାଷ । ଦିନେ ଯେଉଁ କ୍ଷେତରେ ପରିବା ଚାଷ କରି ବଡ ଦୁଃଖ କଷ୍ଟରେ ସଂସାର ଚଳାଉଥିଲେ ଆଜି ସମାନ କ୍ଷେତରେ ଫୁଲ ଚାଷ କରି ଭଲ ଦୁଇ ପଇସା ରୋଜଗାର କରୁଛନ୍ତି ଚାଷୀ । ସବୁଠୁ ବଡ କଥା ହେଲା  କୌଣସି ରାସାୟନିକ ସାର ନଦେଇ କେବଳ ଦେଶୀ ଖତ ଦେଇ ଭଲ ଚାଷ କରିପାରୁଛନ୍ତି ଚାଷୀ ।

ଅଧିକ ପଢ଼ନ୍ତୁ: ଭାଗ୍ୟ ପରିବର୍ତ୍ତନ କରିଦେଲା ଗେଣ୍ଡୁ ଚାଷ

ପ୍ରବଳ ଖରା ତାତିରେ ଜମିରେ ଖିଲିଖିଲି ହୋଇ ହସିଲା ଗୋଲାପ ଫୁଲ । ଖାଲି ଗୋଲାପ କାହିଁକି ବରଂ ଗେଣ୍ଡୁ ବି ଚାଷ ହେଉଛି । ଫୁଲ ଗୁଡିକ ଏତେ ମନଲୋଭା ହୋଇଛି ଯେ ଦେଖିଲେ ପେଟ ପୂରିଯିବ । ରେଢାଖୋଲ ବ୍ଲକ ବଡବାହାଲ ପଚାଂୟତର ଝାଙ୍କରପଡା ଗାଁର ଚାଷୀ ନିତ୍ୟାନନ୍ଦ ଦେହୁରୀଙ୍କ କ୍ଷେତକୁ ନେଇ ଏବେ ଭାରି ଚର୍ଚ୍ଚା । ପୂର୍ବରୁ ନିତ୍ୟାନନ୍ଦ ପରିବା ଚାଷ କରୁଥିଲେ, ହେଲେ ସେତିକିରେ ଭଲ ରୋଜଗାର ହେଲାନି । ତେଣୁ ବାଧ୍ୟ ହୋଇ ଅନ୍ୟ କିଛି ଚାଷ କରିବାକୁ ଇଚ୍ଛା କଲେ । ଆଉ ଏବେ ସଫଳଚାଷୀ ହୋଇ ସ୍ଥାନୀୟ ଅଂଚଳରେ ବେଶ୍‌ ଚର୍ଚ୍ଚିତ ହୋଇଛନ୍ତି ।

ସପ୍ତମଶ୍ରେଣୀରେ ପାଠ ପଢୁଥିବା ବେଳେ ନିତ୍ୟାନନ୍ଦଙ୍କ ବାପା ଚାଲିଯାଇଥିଲେ । ବାପାଙ୍କ ଅବର୍ତ୍ତମାନରେ ପୂରା ଘରର ଦାୟିତ୍ୱ ତାଙ୍କ କାନ୍ଧ ଉପରେ ଥିଲା । ତେଣୁ କେମିତି ଭଲରେ ରୋଜଗାର କରିବେ ସେନେଇ ଚିନ୍ତା କରିବା ପରେ ଶେଷରେ ଚାଷ କରିବାକୁ ଯୋଜନା କଲେ । ପ୍ରଥମେ ପରିବା ଚାଷ କରିବା ପରେ ଅଧିକ ଲାଭ ହେଲାନି ତେଣୁ ମିଶନଶକ୍ତି ଜରିଆରେ ଫୁଲ ଚାଷ କରିବାକୁ ନିଷ୍ପତ୍ତି ନେଲେ ।

ଚାଷ କାମ କରିବାରେ ଏବେ ସ୍ତ୍ରୀ ପୂରା ମାତ୍ରାରେ ତାଙ୍କୁ ସାହାଯ୍ୟ କରୁଥିବା ବେଳେ ବଜାରରେ ଫୁଲ ବିକ୍ରି କରି ଭଲ ଦୁଇ ପଇସା ରୋଜଗାର କରୁଛନ୍ତି ନିତ୍ୟାନନ୍ଦ । ତାଙ୍କ ପ୍ରୟାସକୁ ପ୍ରଶଂସା କରିବା ସହିତ ତାଙ୍କୁ ସବୁ ପ୍ରକାର ସାହାଯ୍ୟ ଓ ସହଯୋଗ କରାଯିବ ବୋଲି କହିଛନ୍ତି ସହକାରୀ ଉଦ୍ୟାନ ଅଧିକାରୀ। ତେବେ ନିଜର ଇଚ୍ଛାଶକ୍ତି ବଳରେ ଆଜି ଭଲ ଦୁଇ ପଇସା ରୋଜଗାର କରିପାରୁଥିବାରୁ ସ୍ଥାନୀୟ ଅଂଚଳରେ ତାଙ୍କୁ ନେଇ ଚାଲିଛି ଚର୍ଚ୍ଚା ।