ମାଆ ଚାଲିଗଲା, ବାପା ନିଖୋଜ...ଫଟୋ ଧରି କାନ୍ଦୁଛନ୍ତି ଭାଇ-ଭଉଣୀ

ଆଖିରୁ ବହି ଚାଲିଛି ଲୁହ । ବାପାଙ୍କ ଫଟୋ ଧରି ପଚାରୁଛନ୍ତି ଭାଇଭଉଣୀ.. ବାପା ତମେ କେଉଁଠି ଅଛ ? ଜଲଦି ଘରକୁ ଫେରିଆସ । ଆମେ କେମିତି ବଞ୍ଚିଛୁ ଥରେ ଦେଖିଯାଅ । ତୁମ ବିନା ଆମ ଦୁନିଆ ଅନ୍ଧାର ହେଲାଣି । ପୁଅ, ଝିଅ ଦୁଇ ଜଣକୁ ଯେତେବେଳେ ଦେଖିବ ବାପା ବାବାଜୀ ଭୋଇଙ୍କ ଫଟୋ ଧରି କାନ୍ଦୁଛନ୍ତି । କଟକ ୪୨ମୌଜାର ଦୀପ୍ତିମୟୀ ଭୋଇ ଓ ବାବୁନ ଭୋଇ । ପିଲା ଦିନରୁ ମାଆକୁ ହରାଇଥିବା ଭାଇ-ଭଉଣୀ ବାପାଙ୍କ ସାହାରାରେ ଜୀବନ କାଟୁଥିଲେ, ହେଲେ ଦଇବ ସେତକ ବି ସହିଲାନି ।

ଖେଳକୁଦ ବୟସରେ ପର ଘରେ ପାଇଟି କରି ଦିନ କାଟୁଛନ୍ତି । ସେମାନଙ୍କ ବାପା ଘରୁ ଯାଇଛନ୍ତି ଯେ ଯାଇଛନ୍ତି । ମାସେ ହେଲା ସାଇକେଲ ନେଇ କେଉଁ ଆଡେ ଚାଲିଯାଇଛନ୍ତି ଯେ ଆଉ ଘରକୁ ଫେରୁନାହାନ୍ତି । ଏଣେ ଛୁଆ ଦୁଇଟା ବିକଳ ହୋଇ ସବୁଆଡ଼େ ଖୋଜି ଖୋଜି ନୟାନ୍ତ ହେଲେଣି । ପେଟକୁ ଦାନା ଖଣ୍ଡେ ଦେବା ପାଇଁ ଝିଅଟି ପର ଘରେ ମୂଲ ଲାଗିଲାଣି । ଏବେ ଖାଲି କାନ୍ଦିବା ଛଡା ସେମାନଙ୍କ ପାଖରେ ଆଉ ଯେମିତି କିଛି ଚାରାନାହିଁ ।

ନିଖୋଜ ବାବାଜୀ ଭୋଇଙ୍କୁ ଖୋଜି ଖୋଜି ହତାଶ ହେଲେଣି ଦୁଇ ଭାଇ ଭଉଣୀ । ମାଆ କ୍ୟାନ୍ସରରେ ପୀଡ଼ିତ ହୋଇ ଆରପାରିକୁ ଚାଲିଯାଇଥିଲା, ଆଉ ସେବେଠୁ ବାପା ଦୁଇ ଜଣଙ୍କ ପାଇଁ ସବୁକିଛି ଥିଲେ । ହେଲେ ଏବେ ସେ ବି କୁଆଡେ ଚାଲିଗଲେ । ଥାନାରେ ଅଭିଯୋଗ କଲେ ଥାନା ବାବୁ ଗାଳି ଗୁଲଜ କରୁଛନ୍ତି ବୋଲି ଅଭିଯୋଗ କରିଛନ୍ତି ଦୀପ୍ତିମୟୀ । ସେମାନଙ୍କ ପାଖରେ ଏବେ ସାହାରା କହିଲେ ସରକାରୀ ରାସନ୍ କାର୍ଡ ଖଣ୍ଡେ । ଆଉ ଘରର ଅବସ୍ଥା କଥା ନ କହିଲେ ଭଲ । ବାପା ମାଆ ଛେଉଣ୍ଡ ଏହି ଅନାଥ ପିଲା ଦୁହେଁ ଏବେ ଦୁର୍ଦ୍ଦିନରେ ରହୁଛନ୍ତି । ତେବେ ସମୟ କହିବ କେବେ ଏମାନଙ୍କ ପାଖରେ ପହଞ୍ଚୁଛି ପ୍ରଶାସନ ।