ମିଳୁନି ଘର ! ଖୋଲା ଆକାଶ ତଳେ ବିତୁଛି ଜୀବନ

ଖୋଲା ଆକାଶ ତଳେ କଳା ପଲିଥିନର କୁଡିଆ । ଘରର ଅବସ୍ଥା ଦେଖିଲେ ଭାବିବେ ଛେଳି କି ମେଣ୍ଢା ରହୁଥିଲେ । ହେଲେ ଘର ଭିତରର ଦୃଶ୍ୟ ଦେଖିବା ପରେ ଆପଣ ବିଶ୍ୱାସ କରିପାରିବେନି କି ସେହି ଘରେ ରହୁଛନ୍ତି ମଣିଷ ।

ନୁଆଣିଆ ଭଙ୍ଗା ଘର । ଆଉ ତା’ରି ଭିତରେ ଯନ୍ତ୍ରଣାରେ ଛଟପଟ ହେଉଛି ଜୀବନ । ଗୋଟିଏ କି ଦୁଇଟି ନୁହେଁ ବରଂ ତିନି ତିନୋଟି ପରିବାର ରହୁଛନ୍ତି ଏହି ଘରେ । ସେଇଠି ଖାଇବା ପୁଣି ସେଇଠି ଶୋଇବା । ଏହି ଘରେ ପାଦେ ପାଦେ ବିପଦ ଅଛି । ହେଲେ ଉପାୟ ବି କିଛି ନାହିଁ ।

କନ୍ଧମାଳ ଦାରିଙ୍ଗବାଡି ମ୍ଲୁକଚେରୀ ଗାଁର ସୁବାଷ ନାୟକ, ସିଂପୁଲ ନାୟକ ଓ ଜନତା ନାୟକଙ୍କ ପରିବାରର ଦୁଃଖ କହିଲେ ନସରେ । ୪ ମାସ ହେଲାଣି ଭାଗ୍ୟକୁ ଆଦରି ପିଲା ଛୁଆଙ୍କୁ ଧରି ପଡି ରହିଛନ୍ତି ଭଙ୍ଗାଦଦରା ଘରେ । ନିଜସ୍ୱ ଜମି ଖଣ୍ଡିଏ ବୋଲି କାହାର ବି ନାହିଁ । ସମସ୍ତେ ଏବେ ଭୂମିହୀନ । ସେଇଥି ଲାଗି ତ ଭୟଙ୍କର ଅବସ୍ଥାରେ ରହୁଛନ୍ତି ତିନି ତିନୋଟି ପରିବାର । ଅସହାୟ ଥିବାରୁ ଗାଁର ଜଣଙ୍କ ଜମିରେ ଘର କରି ରହିଆସୁଥିଲେ ସେମାନେ । ହେଲେ ସେ ମନା କରିବାରୁ ଏବେ ସେମାନେ ଅସହାୟ ହୋଇ ପଡିଛନ୍ତି ।

ଝାଟିମାଟି ଘର ଖଣ୍ଡିଏ ହେଉ ପଛେ କରିବାକୁ ତ ଇଚ୍ଛା ଅଛି ହେଲେ ସେତିକି ବି କରିବାକୁ ସେମାନଙ୍କ ପାଖରେ ଜାଗା ଖଣ୍ଡେ ନାହିଁ । ତେଣୁ ବାଧ୍ୟ ହୋଇ ରାସ୍ତା କଡରେ, ଜରି ପାଲ ତଳେ ଜୀବନ ବିତାଉଛନ୍ତି । ଏତେ ଅସୁବିଧା ଥିବା ପରେ ବି ଗୁହାରି କେହି ଶୁଣୁନଥିବା ଅଭିଯୋଗ କରିଛନ୍ତି ।

ସ୍ଥିତି ଏମିତି ହେଲାଣି ଯେ ପରିବାର ଚଳାଇବା ଲାଗି ଏବେ କିଏ ପର ଦୁଆରେ ମଜୁରୀ ଖଟୁଛି ତ ଆଉ କିଏ ଗାଈ ଚରୁଛି । ଘର ଖଣ୍ଡିଏ ଲାଗି ପ୍ରଶାସନକୁ ବାରମ୍ବାର ଗୁହାରି କରିବା ପରେ ବି ଏଯାଏଁ ଘର ଖଣ୍ଡିଏ ମିଳିଲା ନାହିଁ । ସେପଟେ ପଡୋଶୀ ବି ସେମାନଙ୍କର ଦୁଃଖ ଦେଖି ଘର ଖଣ୍ଡିଏ ଲାଗି ଦାବି କରିଛନ୍ତି । ତେବେ ଘର କେବେ ମିଳିବ ସେନେଇ ପ୍ରଶାସନିକ ଅଧିକାରୀଙ୍କୁ ଯୋଗାଯୋଗ କରିବା ତହସିଲଦାର କହିଛନ୍ତି ଖୁବଶୀଘ୍ର ମିଳିବ ଘର ।