Unexpected Money : ଅଳିଆ ସଫା ବେଳେ ପୁରୁଣା ପାସ୍‌ବୁକ୍‌ ପାଇଲେ; କୋଟିପତି ବନିଗଲେ

କାହାର ଭାଗ୍ୟ କେତେବେଳେ ପରିବର୍ତ୍ତନ ହେବ ତାହା କାହାକୁ ଜଣା ନଥାଏ । ବେଳେ ବେଳେ ହାତୀ ସୁନା କଳସ ଢାଳିବା ଭଳି ରାତାରାତି ପରିବର୍ତ୍ତନ ହୋଇଯାଏ ଭାଗ୍ୟ । କିଏ ଗରିବରୁ କୋଟିପତି ବନିଯାଏ ତ କିଏ ଜିରୋରୁ ହିରୋ ବନିଯାଏ । କେବଳ ଭାଗ୍ୟ ନୁହେଁ ଭାଗ୍ୟ ସହ ଜୀବନ ଶୈଳୀରେ ମଧ୍ୟ ବଡ଼ ପରିବର୍ତ୍ତନ ଆସିଯାଏ ।

ଆପଣ ଭାବୁଥିବେ ଆମେ କେଉଁ ବ୍ୟକ୍ତିଙ୍କ ଲଟେରୀ ଜିତିବା କଥା କହୁଛୁ । କିନ୍ତୁ, ଆମେ ଏମିତି ଜଣେ ବ୍ୟକ୍ତିଙ୍କ କଥା କହୁଛୁ, ଯେଉଁ ବ୍ୟକ୍ତିଙ୍କ ଭାଗ୍ୟ ବଦଳାଇ ଦେଇଛି ଏକ ଅଦରକାରୀ କାଗଜ ଟୁକୁଡ଼ା । ଅନେକ ସମୟରେ କିଛି ଚମତ୍କାର ଘଟଣା ଘଟିଥାଏ । ଏମିତି କି ଅଳିଆ ଆବର୍ଜନା ଭାବି ଆମେ ଯାହାକୁ ଫିଙ୍ଗି ଦେଇଥା'ନ୍ତି । ସେହି ଜିନିଷ ମଧ୍ୟ ଆମର ଭାଗ୍ୟକୁ ଚୁଟକିରେ ବଦଳାଇ ଦିଏ ।

ଠିକ୍ ଏମିତି ହିଁ ଘଟିଛି ଚିଲିର ଏକ୍ସେକିଲ୍‌ ହିନୋଜୋସା ନାମକ ଜଣେ ବ୍ୟକ୍ତିଙ୍କ ସହ । ଘରେ ଅଳିଆରେ ପଡିଥିବା ଏକ ପାସ୍‌ବୁକ୍‌ ତାଙ୍କ ଭାଗ୍ୟ ବଦଳାଇବା ସହ ରାତାରାତି ତାଙ୍କୁ ସାଧାରଣରୁ କରିଦେଇଛି ଅସାଧାରଣ। ନିଜ ବାପାଙ୍କର ଏକ ୬୨ ବର୍ଷ ପୁରୁଣା ପାସ୍‌ବୁକ୍‌ ପାଇବା ପରେ ହିନୋଜୋସା ହୋଇଯାଇଛନ୍ତି କୋଟି କୋଟି ଟଙ୍କାର ମାଲିକ ।

ଅଧିକ ପଢ଼ନ୍ତୁ: ଅନନ୍ୟ ପ୍ରେମ, ସ୍ୱାମୀଙ୍କ ସିଲିକନ ପ୍ରତିମୂର୍ତ୍ତି ସ୍ଥାପନ କରି କଲେ ପ୍ରାଣ ପ୍ରତିଷ୍ଠା

ହିନୋଜୋସାଙ୍କ ବାପା ୧୯୬୦-୭୦ ଦଶକରେ ଏକ ବ୍ୟାଙ୍କରେ ପ୍ରାୟ ୧.୪୦ ଲକ୍ଷ ଟଙ୍କା ଜମା ରଖିଥିଲେ । ପରିବାର ସଦସ୍ୟ ଏହି ଟଙ୍କା ବିଷୟରେ ଅବଗତ ନଥିଲେ । କିଛି ବର୍ଷ ପରେ ଘରେ ଥିବା ଅଳିଆ ସଫା କରିବା ସମୟରେ ହିନୋଜୋସା ଏହି ପାସ୍‌ବୁକ୍‌ ପାଇଥିଲେ ।

ସେ ପ୍ରଥମେ ପାସ୍‌ବୁକ୍‌ରେ ନିଜର ନାଁ ଦେଖିବା ପରେ ମଧ୍ୟ ସେହି ବ୍ୟାଙ୍କ ବନ୍ଦ ହୋଇଯାଇଥିବାରୁ, ସେ ଭାବିଥିଲେ ଏହା ତାଙ୍କର କୌଣସି କାମରେ ଆସିବ ନାହିଁ । ମାତ୍ର ପାସ୍‌ବୁକ୍‌ରେ ଥିବା ଗୋଟିଏ ଲେଖା ତାଙ୍କ ଭାଗ୍ୟ ବଦଳାଇ ଦେଇଥିଲା । ସେଥିରେ ଲେଖାଥିଲା ‘State Guaranteed’ ।

ଅର୍ଥାତ୍‌ ବ୍ୟାଙ୍କ ବନ୍ଦ ହୋଇଗଲେ ମଧ୍ୟ ସରକାର ଏହାର ମୂଲ୍ୟ ଦେବେ । ଏହାପରେ ହିନୋଜୋସା ତାଙ୍କ ବାପାଙ୍କ କଷ୍ଟ ଉପାର୍ଜିତ ଧନ ପାଇବା ପାଇଁ ଆବେଦନ କରିଥିଲେ । କିନ୍ତୁ ସରକାର ଟଙ୍କା ଦେବା ପାଇଁ ରାଜି ହୋଇନଥିଲେ । ଏହାପରେ ହିନୋଜୋସା ଆଇନର ଲଢେଇ ଲଢ଼ିଥିଲେ ।

ଏହାପରେ କୋର୍ଟ ମାମଲାର ଶୁଣାଣି କରି ସରକାରଙ୍କୁ ସୁଧ ସହ ଟଙ୍କା ଦେବାକୁ ନିର୍ଦ୍ଦେଶ ଦେଇଥିଲେ । ସରକାର ହିନୋଜୋସାଙ୍କୁ ୧.୨ ମିଲିୟନ ଡଲାର(୧୦,୨୭,୭୯,୫୮୦)ଟଙ୍କା ପ୍ରଦାନ କରିଥିଲେ । ଫଳରେ ହିନୋଜୋସା ବର୍ତ୍ତମାନ କୋଟିପତି ହୋଇଯାଇଛନ୍ତି ।

ଅଧିକ ପଢ଼ନ୍ତୁ: ପ୍ରଥମ ପ୍ରୟାସରେ ବିଫଳ ହେଲେ, କିନ୍ତୁ ଦ୍ଵିତୀୟ ପ୍ରୟାସରେ ପାଇଲେ ବଡ଼ ସଫଳତା