LIVE TV
ପୁଅ ପାଇଁ ଶ୍ମଶାନ କରିଛି ବାପା । ନିଇତି ଘଡିଏ ଯାଇ ସେଠି ବସୁଛି...ସଫା ସୁତୁରା ବି କରୁଛି । ଆଉ କାମ ସରିବା ପରେ ପୁଅକୁ ମନେ ପକାଇ କାନ୍ଦୁଛି । ଆଉ ମନେ ମନେ କହୁଛି...ଧନ ଧନ ତୁ କାହିଁକି ଏମିତି ଅସମୟରେ ଚାଲିଗଲୁରେ?
ଯାଜପୁର କୋରାଇ ବ୍ଲକ ସାଦକପୁର ପଞ୍ଚାୟତରେ ଥିବା ଶ୍ମଶାନର ଦୃଶ୍ୟ ଦେଖିଲେ ଆପଣ ବି ଜାଣିପାରିବେ ବାପା ସାମ୍ନାରେ ପୁଅର ଜୀବନ ଗଲେ କେତେ କଷ୍ଟ ହୁଏ ବାପାକୁ । ଗାଁର ରବୀନ୍ଦ୍ର ଓଝା ସେନାରେ କାର୍ଯ୍ୟରତ ଥିବା ବେଳେ ବଡ ପୁଅ ଅନୀଲ ମଧ୍ୟ ସେନାରେ ସାମିଲ ହୋଇଥିଲେ । ବାପା-ପୁଅ ସେନାରେ ଚାକିରି କରିଥିବାରୁ ବେଶ୍ ହସଖୁସିରେ ଚାଲୁଥିଲା ସଂସାର ଗାଡି । ବାହାର ରାଜ୍ୟରେ କାମ କରୁଥିବାରୁ ଛୁଟିରେ ଘରକୁ ଆସିଥିଲେ ଅନୀଲ ।
ହେଲେ କିଏ ବା ଜାଣିଥିଲା ଏଇ ଘର ବାହୁଡା ତାଙ୍କ ଜୀବନର ବାହୁଡା ଯାତ୍ରା ହେବ ବୋଲି । ଗାଧୁଆଘରେ ଗାଧୋଉଥିବା ବେଳେ ପଡିଯାଇଥିଲେ । ପ୍ରଥମେ କୋରାଇ ପରେ ଭୁବନେଶ୍ୱରର ଏକ ମେଡିକାଲରେ ଅନୀଲଙ୍କୁ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । କିନ୍ତୁ ସ୍ୱାସ୍ଥ୍ୟବସ୍ଥାରେ ସୁଧାନ ନଆସିବାରୁ କଲିକତାରେ ଆରମ୍ଭ ହୋଇଥିଲା ଅନୀଲଙ୍କ ଚିକିତ୍ସା । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
Also Read
ଆଖି ସାମ୍ନାରେ ଭେଣ୍ଡିଆ ପୁଅର ମୃତ୍ୟୁ ହେବା ପରେ ପାଗଳପ୍ରାୟ ହୋଇଯାଇଥିଲେ ବାପା । କିନ୍ତୁ ଶବ ସଂସ୍କାର ପାଇଁ ଗାଁ ଶ୍ମଶାନରେ ପହଞ୍ଚିଥିଲେ । କିନ୍ତୁ ଶ୍ମଶାନରେ ଥିବା ଅବ୍ୟବସ୍ଥା ପାଇଁ ଠିକ୍ ଭାବରେ ଦାହ ହୋଇପାରିନଥିଲା ଶବ । ତେଣୁ ରବୀନ୍ଦ୍ର ନିଷ୍ପତ୍ତି ନେଇଥିଲେ କି ପେନସନ୍ ଟଙ୍କାରେ ଗାଁରେ ଭଲ ଶ୍ମଶାନ କରିବେ । ଭଲ ଶ୍ମଶାନ ତିଆରି ହେବା ପରେ ଶବଦାହରେ ଯେମିତି କୌଣସି ଅସୁବିଧା ନହେବ ସେଥିଲାଗି ବି ଧ୍ୟାନ ଦେଲେ ।
ନିଷ୍ପତ୍ତି ଅନୁସାରେ ରବିନ୍ଦ୍ର ଗାଁ ଶ୍ମଶାନକୁ ନୂଆ କରି ଗଢି ତୋଳିବା ସହିତ ପୋଖରୀ ବି ଖୋଳାଇଲେ । ତେବେ ରବିନ୍ଦ୍ରଙ୍କ ଏମିତି କାମକୁ ପ୍ରଶଂସା କରିବା ସହିତ ସହଯୋଗର ହାତ ବଢାଇଥିଲେ ସରପଂଚ । ଆଉ ଏବେ ଗାଁ ଶ୍ମଶାନ ଓ ପୋଖରୀକୁ ନେଇ ସବୁଠି ଚର୍ଚ୍ଚା ।
ବାପା ସାମ୍ନାରେ ଯେବେ ଭେଣ୍ଡିଆ ପୁଅ ପ୍ରାଣ ହରାଏ ସେ ସମୟରେ ବାପାର ମନ କଣ ହେଉଥିବ? ହେଲେ ରବିନ୍ଦ୍ର ନିଜ ଛାତିକୁ ପଥର କରି ଗାଁରେ ଭଲ ଶ୍ମଶାନଟିଏ ନିର୍ମାଣ କରିଛନ୍ତି । ଖାଲି ନିର୍ମାଣ କରି ବସିଛନ୍ତି ତାହା ନୁହେଁ ବରଂ ପ୍ରତିଦିନ ସକାଳେ ଓ ସଂଜରେ ସଫାସୁତୁରା କରିବା ସହ ପୁଅକୁ ମନେ ପକାଇ ଗୁମୁରି ଗୁମୁରି କାନ୍ଦନ୍ତି । ଆଉ ବାରମ୍ବାର ନିଜକୁ ନିଜେ କୁହନ୍ତି...ପୁଅ ଥିଲେ ଆଜି ଭାରି ଖୁସି ହୋଇ ଥାଆନ୍ତା ।
- Reported by:
- JANMEJAY DASH
