LIVE TV
ଘରର ଅବସ୍ଥା ଏମିତି ଯେ ଦେଖିଲେ କେହି ବିଶ୍ୱାସ ବି କରିପାରିବେ ନାହିଁ ସେହି ଘରେ ମଣିଷ ରହୁଛନ୍ତି ବୋଲି? କିନ୍ତୁ ସେହି ଘରେ ଯିଏ ରହୁଛନ୍ତି, କେମିତି ରହୁଛନ୍ତି ବଡ଼ ଆଶ୍ଚର୍ଯ୍ୟ ଲାଗିବ । କମର ଧରିଗଲାଣି...ଚାଲିବା ତାଙ୍କ ପକ୍ଷରେ ସମ୍ଭବ ନୁହେଁ ସେଇଥି ପାଇଁ ତ କାଦୁଅ ଉପରେ ଶୋଇ ସରକାରଙ୍କୁ ମାଗୁଛନ୍ତି ସାହାଯ୍ୟ । ବରୁଣେଶ୍ୱର ହିଁ ମୋର ସାହାଭରସା ବୋଲି ବାରମ୍ବାର କହୁଛନ୍ତି ।
ଅସହାୟ ମୁଷନ ଜେନା । ଯାଜପୁର ବିଞ୍ଝାରପୁର ଘଂଟିଆଳି ଲେଙ୍କା ସାହିରେ ତାଙ୍କ ଘର । ବୟସ ୭୫ ପାର୍ ହେଲାଣି । ଅଣ୍ଟାରେ ବଳ ଥିବା ପରେ ଯାହା ଯେମିତି ରୋଜଗାର କରୁଥିଲେ । ହେଲେ ଏବେ ଅଣ୍ଟାରେ ଆଉ ବଳ ନାହିଁ । ଖଟିବାକୁ ସାହସ ବି ନାହିଁ । ସେଇଥି ଲାଗି ତ ବୃଦ୍ଧ କାଳରେ ତାଳବରଡା ଘରେ ମୃତ୍ୟୁ ସହ କରୁଛନ୍ତି ସଂଗ୍ରାମ୍ ।
ଟଙ୍କା ଅଭାବରୁ ୨ ବର୍ଷ ହେଲାଣି ଘର ଛପର ହୋଇନି । ବର୍ଷା ହେଲେ ଘରେ ପାଣିର ସ୍ରୋତ...ଆଉ ଏମିତି ପରିସ୍ଥିତିରେ ଏହି ଭଙ୍ଗାଘରେ ରହୁଛନ୍ତି ସ୍ୱାମୀ-ସ୍ତ୍ରୀ । ଏମାନେ ଏତେ କଷ୍ଟରେ ରହୁଛନ୍ତି ଦେଖିବା ଲୋକ ଆଖିରୁ ଲୁହ ଝରିପଡୁଛି ହେଲେ ପ୍ରଶାସନିକ ଅଧିକାରୀଙ୍କ ନଜର ତାଙ୍କ ଉପରେ ପଡୁନି । ଅଣ୍ଟା ଭାଙ୍ଗିଯିବା ପରେ ମୁଷନଙ୍କ ଜୀବନ ସତେ ଯେମିତି ଦୁର୍ବିସହ ହୋଇ ପଡ଼ିଛି । ତେଣୁ ଏମିତି ଘରେ ପଡି ଠାକୁରଙ୍କୁ ଡାକି ଡାକି ବଞ୍ଚୁଛନ୍ତି ସ୍ୱାମୀ-ସ୍ତ୍ରୀ ।
Also Read
ଦୁଃଖ ଏତିକିରେ ସରିନି ବରଂ ଘରେ ୫୦ ବର୍ଷର ଦିବ୍ୟାଙ୍ଗ ପୁଅ ବି ଅଛି । ଜାଣିଆଶ୍ଚର୍ଯ୍ୟ ହେବେ କି ଘରେ ତିନିତିନି ଜଣ ଭତ୍ତା ଲାଗି ଯୋଗ୍ୟ ଥିଲେ ବି ଏବେ କାହାକୁ ବି ମିଳୁନି ଭତ୍ତା । ସରକାରୀ ସାହାଯ୍ୟ କହିଲେ ମାସକୁ ମାତ୍ର ୧୫ କିଲୋ ଚାଉଳ । ସେତିକିରେ ପୂରା ମାସଟା କେମିତି ଚଳୁଥିବ ପରିବାର ତାହା ଉଣାଅଧିକ ସମସ୍ତଙ୍କୁ ଜଣା । ଦିନରେ କଷ୍ଟେମଷ୍ଟେ ଘରେ ରହୁଛନ୍ତି ସତ ହେଲେ ସଂଧ୍ୟା ହେଲେ ଅନ୍ଧାର ଭିତରେ କଟୁଛି ରାତି ।
ଘର ଖଣ୍ଡିଏ ଲାଗି ବାରମ୍ବାର ଗୁହାରି କରିବା ପରେ କେହି ଶୁଣିନଥିବା ଅଭିଯୋଗ ହୋଇଛି । ତେବେ ଏମାନଙ୍କ ଅସହାୟତା ସମ୍ପର୍କରେ ଅତିରିକ୍ତ ଜିଲ୍ଲାପାଳ ଜାଣିବା ପରେ ତୁରନ୍ତ ଏହି ପରିବାରକୁ ସହାୟତା ଦେବା ଲାଗି ବ୍ଲକ୍ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି । ତେବେ ସମୟ କହିବ କେବେ ଏମାନଙ୍କ ପାଖରେ ପହଞ୍ଚୁଛି ସରକାରୀ ସହାୟତା ।
- Reported by:
- Sanjeeb Nayak
