Cure Breast Cancer: ବୈଜ୍ଞାନିକଙ୍କ ନିଆରା ଆବିଷ୍କାର; ବିଛା ବିଷରେ ହେବ ସ୍ତନ କର୍କଟ ଚିକିତ୍ସା

ସ୍ତନ କର୍କଟ ରୋଗର ଚିକିତ୍ସାରେ ଏକ ନୂତନ ଆଶା ସୃଷ୍ଟି ହୋଇଛି। ଏହି ଆଶା ସୃଷ୍ଟି କରିଛନ୍ତି ବ୍ରାଜିଲର ବୈଜ୍ଞାନିକମାନେ। ସେମାନେ ଆମାଜନର ଏକ ବିରଳ ବିଛା, ବ୍ରୋଥିଆସ୍ ଆମାଜୋନିକସ୍(Brotheas amazonicus)ର ବିଷରେ ଏକ ସ୍ୱତନ୍ତ୍ର ଅଣୁ ଆବିଷ୍କାର କରିଛନ୍ତି। ଏହି ଅଣୁରେ କର୍କଟ କୋଷଗୁଡ଼ିକୁ ନଷ୍ଟ କରିବାର ଆଶ୍ଚର୍ଯ୍ୟଜନକ କ୍ଷମତା ଅଛି।

ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି, ଏହି ଅଣୁ କର୍କଟ କୋଷଗୁଡ଼ିକୁ ପ୍ରଭାବିତ କରେ କିନ୍ତୁ ଶରୀରର ସାଧାରଣ କୋଷଗୁଡ଼ିକୁ କ୍ଷତି ପହଞ୍ଚାଏ ନାହିଁ।

କର୍କଟ ରୋଗ ବିରୁଦ୍ଧରେ ବିଛାର ଶକ୍ତି:

ସାଓ ପାଉଲୋ ବିଶ୍ୱବିଦ୍ୟାଳୟର ବୈଜ୍ଞାନିକମାନେ ଏହି ଅଣୁକୁ BamazScplp1 ନାଁ ଦେଇଛନ୍ତି। ପ୍ରାରମ୍ଭିକ ଲ୍ୟାବ୍ ପରୀକ୍ଷାରୁ ଜଣାପଡିଛି ଯେ ଏହି ଅଣୁ ପାରମ୍ପରିକ କେମୋଥେରାପି ଔଷଧ Paclitaxel ପରି ସ୍ତନ କର୍କଟ କୋଷଗୁଡ଼ିକୁ ନଷ୍ଟ କରିଛି।

BamazScplp1 ଶରୀରରେ ଥିବା ଏକ ସ୍ୱତନ୍ତ୍ର ପ୍ରକାରର ଏନ୍‌ଜାଇମ୍‌ ଗ୍ରୁପ୍ Serine Proteases ସହିତ ଜଡିତ, ଯାହା ପ୍ରୋଟିନ୍ ଭାଙ୍ଗିବା କାମ କରେ ଏବଂ କର୍କଟ କୋଷଗୁଡ଼ିକର ଜୀବନଚକ୍ରକୁ ମଧ୍ୟ ବାଧା ଦେଇଥାଏ।

ଅଧିକ ପଢ଼ନ୍ତୁ: କିପରି ଜାଣିବେ ସ୍ତନ କର୍କଟର ପ୍ରାରମ୍ଭିକ ଲକ୍ଷଣ; କେଉଁମାନଙ୍କ ପାଇଁ ହୁଏ ସାଙ୍ଘାତିକ…

ବୈଜ୍ଞାନିକଙ୍କ ମତରେ, ଏହି ଅଣୁ କର୍କଟର କୋଷଗୁଡ଼ିକୁ necrosis ପ୍ରକ୍ରିୟା ମାଧ୍ୟମରେ ହତ୍ୟା କରେ। ସାଧାରଣତଃ ଏହି ପ୍ରକ୍ରିୟାକୁ ଶରୀର ପାଇଁ କ୍ଷତିକାରକ ବୋଲି ବିବେଚନା କରାଯାଏ, କିନ୍ତୁ କର୍କଟ ଚିକିତ୍ସାରେ, ଏହି ପ୍ରକ୍ରିୟା ଟ୍ୟୁମରକୁ ଦୂର କରିବାରେ ବହୁତ ପ୍ରଭାବଶାଳୀ ହୋଇପାରେ।

ସ୍ମାର୍ଟ ଉପାୟ:

ଯେହେତୁ ବିଛାରୁ ବିଷ ବାହାର କରିବା ବ୍ୟବହାରିକ ନୁହେଁ, ବୈଜ୍ଞାନିକମାନେ Heterologous Expression ନାମକ ଏକ ସ୍ୱତନ୍ତ୍ର ଜୈବପ୍ରଯୁକ୍ତିବିଦ୍ୟା କୌଶଳ ବ୍ୟବହାର କରିଥିଲେ। ଏହି କୌଶଳ ଅନୁଯାୟୀ, ଆବଶ୍ୟକୀୟ ଜିନ୍ ଇଷ୍ଟ୍‌ ଭଳି ଏକ ସୂକ୍ଷ୍ମ ଜୀବରେ ପ୍ରବେଶ କରାଯାଇଥିଲା, ଯାହା ପରେ ସେହି ଅଣୁକୁ ବହୁ ପରିମାଣରେ ଉତ୍ପାଦନ କରିପାରିବ।

ପ୍ରକଳ୍ପର ମୁଖ୍ୟ ଗବେଷକ ପ୍ରଫେସର ଏଲିଆନ୍ ଅରଣ୍ଟେସ୍‌ଙ୍କ ଅନୁଯାୟୀ, ସେମାନେ Pichia pastoris ନାମକ ଏକ ଇଷ୍ଟ ବ୍ୟବହାର କରିଥିଲେ, ଯାହା ବାୟୋଟେକ୍ ଶିଳ୍ପରେ ବହୁତ ଉପଯୋଗୀ ପ୍ରମାଣିତ ହୋଇଛି। ଏହି କୌଶଳ ସାହାଯ୍ୟରେ, କୌଣସି ପ୍ରାଣୀଙ୍କୁ କ୍ଷତି ନ କରି ଏବେ ଏହି ଅଣୁ ବହୁ ପରିମାଣରେ ଉତ୍ପାଦନ କରାଯାଇପାରିବ।

ଦ୍ୱିତୀୟ ସ୍ଥାନରେ ସ୍ତନ କର୍କଟ:

ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଅନୁଯାୟୀ, ବିଶ୍ୱବ୍ୟାପୀ ମହିଳାମାନଙ୍କ ମଧ୍ୟରେ ସ୍ତନ କର୍କଟ ସବୁଠାରୁ ସାଧାରଣ କର୍କଟ। କର୍କଟରେ ହେଉଥିବା ମୃତ୍ୟୁରେ ଏହା ଦ୍ୱିତୀୟ ସ୍ଥାନରେ ଅଛି।

୨୦୨୨ ମସିହାରେ, କେବଳ ସ୍ତନ କର୍କଟ ରୋଗର ୨୩ ଲକ୍ଷ ନୂଆ ମାମଲା ପଞ୍ଜିକୃତ ହୋଇଥିଲା ଏବଂ ପ୍ରାୟ ୬.୭ ଲକ୍ଷ ଲୋକଙ୍କ ମୃତ୍ୟୁ ହୋଇଥିଲା। ଯଦି ଏହି ଗତି ଜାରି ରହେ, ତେବେ ୨୦୫୦ ସୁଦ୍ଧା ପ୍ରତିବର୍ଷ ୩୨ ଲକ୍ଷ ନୂଆ ମାମଲା ଏବଂ ୧୦ ଲକ୍ଷରୁ ଅଧିକ ମୃତ୍ୟୁ ହୋଇପାରେ।

ହେବ ବି ଗେମ୍ ଚେଞ୍ଜର୍:

ଯଦିଓ BamazScplp1 ଉପରେ କେବଳ ପ୍ରାରମ୍ଭିକ ଲ୍ୟାବ୍‌ ପରୀକ୍ଷଣ କରାଯାଇଛି, ବୈଜ୍ଞାନିକମାନେ ଏହାର ପ୍ରଭାବ ଦେଖିବାକୁ ଉତ୍ସାହିତ। ପରବର୍ତ୍ତୀ ପଦକ୍ଷେପ ହେଉଛି ବ୍ୟାପକ ପ୍ରାଣୀ ପରୀକ୍ଷଣ ଏବଂ ତା'ପରେ କ୍ଲିନିକାଲ୍ ପରୀକ୍ଷଣ।

ଯଦି ଏହି ଅଣୁ ମଣିଷ ପାଇଁ ପ୍ରଭାବଶାଳୀ ଏବଂ ନିରାପଦ ପ୍ରମାଣିତ ହୁଏ, ତେବେ ଏହା ଏକ କ୍ରାନ୍ତିକାରୀ ସ୍ତନ କର୍କଟ ଚିକିତ୍ସା ହୋଇପାରିବ।

ଅଧିକ ପଢ଼ନ୍ତୁ: ମହିଳାମାନଙ୍କଠାରେ ହେଉଥିବା ୫ କ୍ୟାନ୍‌ସର୍; କରନ୍ତୁ ଏହି ୩ ଯୋଗ, ମିଳିବ ରକ୍ଷା