Covid ‌Cases Rising: ବଢୁଛି କୋଭିଡ୍ ମାମଲା; ପୂର୍ବ ଭଳି ପୁଣି ଆକ୍ରାନ୍ତ ହେବ କି ଭାରତ ?

ଗତ ଗୋଟିଏ ମାସରେ ହଂକଂ ଏବଂ ସିଙ୍ଗାପୁର ସମେତ ଅନେକ ଦେଶରେ କୋରୋନା ମାମଲା ଦ୍ରୁତ ବୃଦ୍ଧି ପାଇଛି। ରିପୋର୍ଟ ଅନୁଯାୟୀ, ଏଥର କେବଳ ସଂକ୍ରମଣ ମାମଲା ବୃଦ୍ଧି ପାଇଛି ତାହା ନୁହେଁ, ବରଂ ହସ୍ପିଟାଲରେ ଭର୍ତ୍ତି ହୋଇଥିବା ଲୋକଙ୍କ ସଂଖ୍ୟା ଏବଂ ଗୁରୁତର ଅବସ୍ଥାରେ ମୃତ୍ୟୁ ସଂଖ୍ୟା ମଧ୍ୟ ବୃଦ୍ଧି ପାଉଛି। ସଂକ୍ରମଣର ବର୍ଦ୍ଧିତ ବିପଦକୁ ଦୃଷ୍ଟିରେ ରଖି, ସ୍ୱାସ୍ଥ୍ୟ ବିଶେଷଜ୍ଞମାନେ ସମସ୍ତଙ୍କୁ ସତର୍କ କରାଇ ଆସୁଛନ୍ତି।

ଏହାରି ଭିତରେ ଭାରତରେ ପୁଣି ଥରେ କରୋନାର ଧୀର ପ୍ରବେଶ ହୋଇଛି। ସୋମବାର ଅର୍ଥାତ ୨୦ ମେ ଦିନ, ବିଗ୍ ବସ୍ ଫେମ୍ ଶିଳ୍ପା ଶିରୋଡକର ସଂକ୍ରମିତ ହୋଇଥିବା ଜଣାପଡ଼ିଛି, ଯାହା ପରେ ପ୍ରଶ୍ନ ଉଠିବା ଆରମ୍ଭ ହୋଇଛି ଯେ ହଂକଂ-ସିଙ୍ଗାପୁର ପରି ଭାରତରେ ବିପଦ ବଢ଼ୁଛି କି?

କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ୱେବ୍‌ସାଇଟରେ ଶେୟାର କରାଯାଇଥିବା ସୂଚନା ଅନୁଯାୟୀ, ଦେଶରେ ବର୍ତ୍ତମାନ ୨୫୭ ଜଣ ସକ୍ରିୟ କରୋନା ସଂକ୍ରମିତ ରୋଗୀ ଅଛନ୍ତି। ତେବେ ଏହି ମାମଲାଗୁଡ଼ିକ ସାମାନ୍ୟ ହୋଇଥିବା ବେଳେ ବର୍ତ୍ତମାନ ଡାକ୍ତରଖାନାରେ ଭର୍ତ୍ତି ହେବାର ଆବଶ୍ୟକତା ହୋଇନି।

ଅଧିକ ପଢ଼ନ୍ତୁ: କଡ଼ ଲେଉଟାଇଲା କି କରୋନାର ନୂଆ ଲହର ? ଦିନକରେ ୨ ଜଣଙ୍କ ମୃତ୍ୟୁକୁ ନେଇ ବଢିଲା ଟେନସନ୍...

ତଥାପି, ସାରା ବିଶ୍ୱରେ ପୁଣି ଥରେ ବଢ଼ୁଥିବା ବିପଦକୁ ଦେଖି, ସ୍ୱାସ୍ଥ୍ୟ ବିଶେଷଜ୍ଞମାନେ ସମସ୍ତଙ୍କୁ ସୁରକ୍ଷାମୂଳକ ପଦକ୍ଷେପ ଅନୁସରଣ କରିବାକୁ ପରାମର୍ଶ ଦେଇଛନ୍ତି।

ଭାରତରେ କୋରୋନାର ସ୍ଥିତି:

ଯଦି ଆମେ ଭାରତରେ ବର୍ତ୍ତମାନର କରୋନା ପରିସ୍ଥିତିକୁ ଦେଖିବା, ତେବେ ଏହା ସ୍ପଷ୍ଟ ଯେ ଏଠାରେ ପରିସ୍ଥିତି ବହୁତ ନିୟନ୍ତ୍ରଣାଧୀନ। ସୋମବାର ଦିନ ସ୍ୱାସ୍ଥ୍ୟ ସେବା ମହାନିର୍ଦ୍ଦେଶକଙ୍କ ଅଧ୍ୟକ୍ଷତାରେ ଜାତୀୟ ରୋଗ ନିୟନ୍ତ୍ରଣ କେନ୍ଦ୍ର, ଭାରତୀୟ ଚିକିତ୍ସା ଗବେଷଣା ପରିଷଦ ଏବଂ କେନ୍ଦ୍ର ସରକାରୀ ଡାକ୍ତରଖାନାଗୁଡ଼ିକର ବିଶେଷଜ୍ଞମାନଙ୍କର ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା।

ଏଥିରେ କୁହାଯାଇଛି ଯେ ସିଙ୍ଗାପୁର ଏବଂ ହଂକଂରେ ମାମଲା ଦ୍ରୁତ ଗତିରେ ବୃଦ୍ଧି ପାଉଛି, ଆମେ ଭାରତରେ ମଧ୍ୟ କରୋନା ପରିସ୍ଥିତି ଉପରେ ନଜର ରଖିଛୁ। ଭାରତରେ କୋଭିଡ୍ ପରିସ୍ଥିତି ନିୟନ୍ତ୍ରଣରେ ଅଛି ଏବଂ ସମସ୍ତ ମାମଲାରେ ମୃଦୁ ଲକ୍ଷଣ ରହିଛି, ତେଣୁ ଭୟଭୀତ ହେବାର କୌଣସି ଆବଶ୍ୟକତା ନାହିଁ। ସୂଚନା ଅନୁଯାୟୀ, ହସ୍ପିଟାଲଗୁଡ଼ିକୁ ଇନ୍‌ଫ୍ଲୁଏଞ୍ଜା ଭଳି ରୋଗ ଏବଂ ଶ୍ୱାସକ୍ରିୟା ସଂକ୍ରମଣର ଗମ୍ଭୀର ମାମଲା ଉପରେ ନଜର ରଖିବାକୁ କୁହାଯାଇଛି।

କେରଳ, ମହାରାଷ୍ଟ୍ର, ତାମିଲନାଡୁରେ ସର୍ବାଧିକ ସଂଖ୍ୟକ ମାମଲା ରିପୋର୍ଟ ହୋଇଛି। ମେ ୧୨ ପରଠାରୁ କେରଳରେ ସର୍ବାଧିକ ସଂଖ୍ୟକ ନୂଆ ମାମଲା (୬୯) ରିପୋର୍ଟ ହୋଇଛି। ସେହିପରି ମହାରାଷ୍ଟ୍ର (୪୪) ଏବଂ ତାମିଲନାଡୁ (୩୪) ସ୍ଥାନରେ ରହିଛି। କର୍ଣ୍ଣାଟକ, ଗୁଜରାଟ, ଦିଲ୍ଲୀ, ହରିୟାଣା, ରାଜସ୍ଥାନ ଏବଂ ସିକିମ ଭଳି ଅନ୍ୟାନ୍ୟ ରାଜ୍ୟରେ ସଂକ୍ରମିତ ମାମଲା ଦେଖାଯାଇଛି, କିନ୍ତୁ ପରିସ୍ଥିତି ନିୟନ୍ତ୍ରଣରେ ଅଛି।

ମୁମ୍ବାଇର KEM ହସ୍ପିଟାଲରେ କୋଭିଡ୍‌ରେ ସଂକ୍ରମିତ ଦୁଇ ଜଣଙ୍କ ମୃତ୍ୟୁ ଖବର ଆସିଛି। ଉଭୟ ରୋଗୀଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ଥିଲା। ଜଣେ ରୋଗୀଙ୍କ ମୁଖ କର୍କଟ ରୋଗ ହୋଇଥିଲା, ଅନ୍ୟ ଜଣେ ନେଫ୍ରୋଟିକ୍ ସିଣ୍ଡ୍ରୋମ୍ ରୋଗରେ ପୀଡିତ ଥିଲେ। ସୂତ୍ର ଅନୁଯାୟୀ, ଉଭୟଙ୍କ ମୃତ୍ୟୁ କୋଭିଡ୍ ଯୋଗୁଁ ନୁହେଁ ବରଂ ପୂର୍ବରୁ ଥିବା ଅସୁସ୍ଥତା ଯୋଗୁଁ ହୋଇଛି।

ବିଶେଷଜ୍ଞଙ୍କ ମତ:

ଦେଶର ଶ୍ରେଷ୍ଠ ମହାମାରୀ ବିଶେଷଜ୍ଞଙ୍କ ମତରେ ବୃଦ୍ଧ ଏବଂ ଦୁର୍ବଳ ରୋଗ ପ୍ରତିରୋଧକ ଶକ୍ତି ଥିବା ଲୋକଙ୍କ ମଧ୍ୟରେ ସଂକ୍ରମଣର ଆଶଙ୍କା ଅଧିକ ହୋଇପାରେ। ଏପରି ଲୋକଙ୍କ ପାଇଁ, ଏକମାତ୍ର ସତର୍କତା ହେଉଛି କୋଭିଡ୍-ଉପଯୁକ୍ତ ଆଚରଣ ଅନୁସରଣ କରିବା। ହାତର ପରିଷ୍କାର ପରିଚ୍ଛନ୍ନତା ବଜାୟ ରଖିବା, ମାସ୍କ ପିନ୍ଧିବା ଏବଂ ଭିଡ଼ ସ୍ଥାନକୁ ଏଡ଼ାଇବା ଉଚିତ।

ବିଶେଷଜ୍ଞଙ୍କ ମତରେ ବର୍ତ୍ତମାନ ସାରା ବିଶ୍ୱରେ କେବଳ ଓମିକ୍ରନ୍‌ ଏବଂ ଏହାର ଉପ-ଭାରିଆଣ୍ଟର ମାମଲା ଦେଖାଯାଉଛି, ଭାରତରେ ଓମିକ୍ରନ୍‌ ପାଇଁ ଏକ ପ୍ରଭାବଶାଳୀ ଟୀକା, GEMCOVAC-19 ଅଛି, ଯାହାକି ପୁଣେ ସ୍ଥିତ ଜେନୋଭା ବାୟୋଫାର୍ମାସ୍ୟୁଟିକାଲ୍ସ ଦ୍ୱାରା ବିକଶିତ ହୋଇଛି। ଆବଶ୍ୟକ ହେଲେ, ଏହାର ଉତ୍ପାଦନ ବୃଦ୍ଧି କରାଯାଇପାରିବ। ତଥାପି, ବର୍ତ୍ତମାନ କୌଣସି ନୂଅ କିମ୍ବା ଚିନ୍ତାଜନକ କଥା ନାହିଁ।

ଅଧିକ ପଢ଼ନ୍ତୁ: ପୁଣି ଡରାଇଲାଣି କରୋନା ଭାଇରସ୍; ସଂକ୍ରମଣରୁ ରକ୍ଷା ପାଇଁ କରନ୍ତୁ ଏହିସବୁ ଯୋଗାସନ