ଖାଇବାରେ ଚିଙ୍ଗୁଡ଼ିର ରେସିପି ଥିଲେ ଖାଇବାର ମଜା ଦ୍ୱିଗୁଣ ହୋଇଯାଏ। ସେଥିପାଇଁ ଆମ ଓଡ଼ିଆ ଘରେ ଆମେମାନେ ଚିଙ୍ଗୁଡ଼ିର ବିଭିନ୍ନ ରେସିପି ବନେଇ ଖାଇଥାଉ । ଆଜି ଆମେ ଆପଣଙ୍କ ପାଇଁ ଚିଙ୍ଗୁଡ଼ିର ଏକ ସୁଆଦିଆ ଦେଶୀ ରେସିପି ପ୍ରସ୍ତୁତ କରିବୁ । ଏହି ରେସିପିର ନାଁ ହେଉଛି ‘ଚିଙ୍ଗୁଡ଼ି ଜହ୍ନି ରାଇ’ ।
Also Read
‘ଚିଙ୍ଗୁଡ଼ି ଜହ୍ନି ରାଇ’ ବନେଇବା ପାଇଁ ଆବଶ୍ୟକ ସାମଗ୍ରୀ:
ଜହ୍ନି,ଚିଙ୍ଗୁଡ଼ି,ଟମାଟୋ,ପିଆଜ,ଅଦା ଓ ରସୁଣ ବଟା,ସୋରିଷ,ଶୁଖିଲା ଲଙ୍କା,ସୋରିଷ ତେଲ, ଗରମ ମସଲା,ଲଙ୍କା ଗୁଣ୍ଡ,ଜିରା ଗୁଣ୍ଡ,ଧନିଆ ପାଉଡର, ହଳଦୀ ଗୁଣ୍ଡ,ଗୋଟା ଜିରା,ଧନିଆ ପତ୍ର ଓ ସ୍ୱାଦ ଅନୁସାରେ ଲୁଣ ।
ପ୍ରସ୍ତୁତି ପ୍ରଣାଳୀ:
- ପ୍ରଥମେ ଚିଙ୍ଗୁଡ଼ିକୁ ଭଲଭାବେ ଧୋଇ ଚିଙ୍ଗୁଡ଼ିର ଚୋପା ବା ଖୋଳ ଛଡ଼ାଇ ଦିଅନ୍ତୁ
- ଏହାପରେ ସେଥିରେ ଲୁଣ ଓ ହଳଦୀ ପକାଇ ଭଲ ଭାବେ ଗୋଳାଇ ଦିଅନ୍ତୁ।
- ଏହାପରେ ଜହ୍ନିକୁ ଧୋଇ ଏହାର ଚୋପା ଛଡ଼ାଇ ମଧ୍ୟମ ସାଇଜ୍ରେ କାଟି ଭଲ ଭାବେ ଧୋଇ ଦିଅନ୍ତୁ।
- ଏବେ ଗ୍ୟାସ୍ରେ କଡ଼େଇ ବସାନ୍ତୁ ଓ କଡ଼େଇ ଗରମ ହୋଇଗଲେ ପରେ ଏଥିରେ ଗୋଟିଏ ଚାମଚ ତେଲ ପକାନ୍ତୁ।
ଅଧିକ ପଢ଼ନ୍ତୁ: ‘ଘରେ ବନାନ୍ତୁ 'ମଲାଇ ମସରୁମ୍’
- ତେଲ ଗରମ ହେବା ପରେ ଏଥିରେ ଆଗରୁ ଧୁଆ ହୋଇ ରହିଥିବା ଚିଙ୍ଗୁଡ଼ିକୁ ପକାଇ ଅଳ୍ପ ସମୟ ପାଇଁ ଭାଜନ୍ତୁ।
- ଚିଙ୍ଗୁଡ଼ି ଭାଜି ହୋଇଗଲା ପରେ ଏହାକୁ କଡ଼େଇରୁ କାଢ଼ି ଆଣନ୍ତୁ।
- ଏହାପରେ କଡ଼େଇରେ ତେଲ ପକାନ୍ତୁ ଓ ଏହା ଗରମ ହେବା ପରେ ଗୋଟା ଜିରା, ଶୁଖିଲା ଲଙ୍କା ସୋରିଷ ପକାନ୍ତୁ।
- ସେଥିରେ କଟା ପିଆଜ ପକାଇ ୨ ମିନିଟ୍ ଭାଜନ୍ତୁ। ଏବେ ସେଥିରେ ଅଦା ପେଷ୍ଟ୍, ରସୁଣ ପେଷ୍ଟ୍, ପିଆଜ ବଟା, ହଳଦୀ ଗୁଣ୍ଡ, ଲଙ୍କା ଗୁଣ୍ଡା ଓ ଲୁଣ ପକାଇ ମସଲାକୁ ଭଲ ଭାବେ କଷନ୍ତୁ।
- ମସଲାରେ ମଝିରେ ମଝିରେ ଆବଶ୍ୟକତା ଅନୁଯାୟୀ ପାଣି ଦେଇ କଷନ୍ତୁ। ମସଲା କଷି ହୋଇଗଲେ ସେଥିରେ କଟା ଟମାଟୋ, ଜିରାଗୁଣ୍ଡା ଏବଂ ଧନିଆ ଗୁଣ୍ଡା ପକାଇ କମ୍ ଆଞ୍ଚରେ ମସଲାକୁ କଷନ୍ତୁ।
- ମସଲା ଭଲ ଭାବେ କଷି ହୋଇଯିବା ପରେ ସେଥିରେ ଜହ୍ନି ପକାଇ ୨ ଚାମଚ ଗରମ ମସଲା ପକାନ୍ତୁ। ଏହାକୁ ଭଲ ଭାବେ ଗୋଳାଇ ଦେଇ ଏକ ଘୋଡ଼ଣି ଦେଇ ଘୋଡ଼ାଇ ଦିଅନ୍ତୁ।
- କିଛି ସମୟ ପରେ ଢାଙ୍କୁଣୀ କାଢ଼ି ଏଥିରେ ପୂର୍ବରୁ ଭଜା ହୋଇ ରହିଥିବା ଚିଙ୍ଗୁଡ଼ି ପକାଇ ଅଳ୍ପ ଉଷୁମ ପାଣି ଦିଅନ୍ତୁ।
- ଏହାପରେ ସେଥିରେ କଟା ଧନିଆ ପତ୍ର ଏବଂ ଗରମ ମସଲା ପକାଇ ୧୦ ମିନିଟ୍ କମ୍ ଆଞ୍ଚରେ ଘୋଡ଼ାଇ ରଖନ୍ତୁ।
- ୧୦ ମିନିଟ୍ ପରେ କଡ଼େଇକୁ ଗ୍ୟାସ୍ରୁ ଓହ୍ଲାଇ ଆଣନ୍ତୁ।
ଏବେ ପ୍ରସ୍ତୁତ ହୋଇଗଲା ସୁଆଦିଆ ‘‘ଚିଙ୍ଗୁଡ଼ି ଜହ୍ନି ରାଇ’। ଏହି ରେସିପିଟିକୁ ଗରମ ଗରମ ଭାତ କିମ୍ବା ରୁଟି ସହିତ ଖାଇଲେ ବେଶୀ ସୁଆଦିଆ ଲାଗିଥାଏ । ଏହି ରେସିପିଟିକୁ ଘରେ ବନେଇ ନିଜେ ଖାଆନ୍ତୁ ଓ ଘର ଲୋକଙ୍କୁ ପରଷନ୍ତୁ ।