LIVE TV
ଶହୀଦମାନଙ୍କୁ ସମ୍ମାନିତ କରିବା ଏବଂ ଦେଶ ପାଇଁ ସେମାନଙ୍କ ବଳିଦାନକୁ ସ୍ମରଣ କରିବା ପାଇଁ ପ୍ରତିବର୍ଷ ଭାରତରେ ଶହୀଦ ଦିବସ ପାଳନ କରାଯାଏ। ଏହି ଦିନ ଭାରତର ଗର୍ବ, ସମ୍ମାନ ଏବଂ ସ୍ୱାଧୀନତା ପାଇଁ ବଳିଦାନ ଦେଇଥିବା ଭଗତ ସିଂହ ଏବଂ ତାଙ୍କ ସାଥୀ ରାଜଗୁରୁ ଓ ସୁଖଦେବଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯାଏ।
ଶହୀଦ ଦିବସ ଦେଶ ପାଇଁ ଏକ ବିଶେଷ ଏବଂ ଭାବପ୍ରବଣର ଦିନ। ମାର୍ଚ୍ଚ ୨୩ରେ, ଭାରତର ସନ୍ତାନ ସହିଦ ଭଗତ ସିଂହ, ସୁଖଦେବ ଏବଂ ରାଜଗୁରୁ ଦେଶ ପାଇଁ ହସି ହସି ମୃତ୍ୟୁଦଣ୍ଡକୁ ଗ୍ରହଣ କରିନେଇଥିଲେ। ସେମାନଙ୍କ ବଳିଦାନ ପାଇଁ ଦେଶର ପ୍ରତ୍ୟେକ ନାଗରିକ ପ୍ରକୃତ ହୃଦୟରେ ସେମାନଙ୍କୁ ସଲାମ କରନ୍ତି।
ଅଧିକ ପଢ଼ନ୍ତୁ: ରାଜ୍ୟ କାହିଁକି ପାଳୁଛି ଶହୀଦ ଦିବସ
କାହିଁକି ପାଳନ ହୁଏ ଶହୀଦ ଦିବସ:
Also Read
ମାର୍ଚ୍ଚ ୨୩ରେ ତିନି ଜଣ ସ୍ୱାଧୀନତା ସଂଗ୍ରାମୀ ଭଗତ ସିଂହ, ଶିବରାମ ରାଜଗୁରୁ ଏବଂ ସୁଖଦେବ ଥାପରଙ୍କୁ ବ୍ରିଟିଶରମାନେ ଫାଶୀ ଦେଇଥିଲେ। ଖୁବ କମ ବୟସରେ ଏହି ବୀରମାନେ ଦେଶର ସ୍ୱାଧୀନତା ପାଇଁ ଲଢି ନିଜ ଜୀବନକୁ ଉତ୍ସର୍ଗ କରିଥିଲେ। ସେମାନଙ୍କ କର୍ମ ନେଇ ଭାରତର ଏହି ତିନି ସୁପୁତ୍ର ଭାରତୀୟଙ୍କ ପାଇଁ ପ୍ରେରଣାର ଉତ୍ସ ପାଲଟିଛନ୍ତି। ସେମାନଙ୍କ ବିପ୍ଳବ ଏବଂ ଉତ୍ସାହ ଆଜି ଯୁବକମାନଙ୍କ ଶିରା ପ୍ରଶିରାରେ ପ୍ରବାହିତ ହେଉଛି। ଏହି ତିନି ମହାନ ବିପ୍ଳବୀଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ ଭାରତ ପ୍ରତିବର୍ଷ ୨୩ ମାର୍ଚ୍ଚରେ ଶହୀଦ ଦିବସ ପାଳନ କରୁଛି।
ଫାଶି ଦେବାର କାରଣ:
ଦେଶର ସ୍ୱାଧୀନତା ପାଇଁ ବୀର ପୁତ୍ର ଭଗତ ସିଂହ, ରାଜଗୁରୁ ଏବଂ ସୁଖଦେବ ନିଜ ଜୀବନକୁ ଉତ୍ସର୍ଗ କରିଥିଲେ। ବ୍ରିଟିଶ ଶାସନ ବିରୋଧରେ ସ୍ୱର ଉତ୍ତୋଳନ କରି ଜନସୁରକ୍ଷା ଏବଂ ବାଣିଜ୍ୟ ବିତରଣ ବିଲକୁ ବିରୋଧ କରି ସେମାନେ ସେଣ୍ଟ୍ରାଲ ଆସେମ୍ବ୍ଲିରେ ବୋମା ଫିଙ୍ଗିଥିଲେ। ଏହା ପରେ ସେମାନଙ୍କୁ ଗିରଫ କରାଯାଇ ଫାଶି ଦିଆଯାଇଥିଲା। ମାର୍ଚ୍ଚ ୨୩ ସେହିଦିନ ଥିଲା ଯେତେବେଳେ ବ୍ରିଟିଶ ସରକାର ଦେଶର ଏହି ତିନି ବୀର ପୁଅଙ୍କୁ ଫାଶୀ ଦେଇଥିଲେ।
ବୀର ପୁତ୍ରଙ୍କ ବିଷୟରେ:
ଭଗତ ସିଂହ:-
ମାତୃଭୂମି ପାଇଁ ନିଜ ଜୀବନକୁ ଉତ୍ସର୍ଗ କରିଥିବା ଭଗତ ସିଂହ ୨୮ ସେପ୍ଟେମ୍ବର ୧୯୦୭ରେ ପଞ୍ଜାବର ଲାୟଲପୁରରେ ଜନ୍ମଗ୍ରହଣ କରିଥିଲେ। ଚନ୍ଦ୍ରଶେଖର ଆଜାଦ ଏବଂ ଦଳର ଅନ୍ୟ ସଦସ୍ୟଙ୍କ ସହ ସେ ସାହସର ସହିତ ଭାରତର ସ୍ୱାଧୀନତା ପାଇଁ ବ୍ରିଟିଶ ସରକାର ସହିତ ଲଢିଥିଲେ। ଭଗତ ସିଂହଙ୍କ ସ୍ଲୋଗାନ୍ 'ଇନ୍କିଲାବ ଜିନ୍ଦାବାଦ' ବହୁତ ପ୍ରସିଦ୍ଧ। ଦେଶବାସୀଙ୍କ ମଧ୍ୟରେ ଜୋଶ୍ ଭରିବା ନେଇ ଏହି ସ୍ଲୋଗାନ ଭଲ କାମ କରିଥିଲା।
ଶହୀଦ ସୁଖଦେବ:-
ସୁଖଦେବ ୧୫ ମେ ୧୯୦୭ରେ ପଞ୍ଜାବର ଲାୟଲପୁର ପାକିସ୍ଥାନରେ ଜନ୍ମଗ୍ରହଣ କରିଥିଲେ। ଭଗତ ସିଂହ ଏବଂ ସୁଖଦେବଙ୍କ ପରିବାର ପରସ୍ପରଙ୍କ ପାଖାପାଖି ରହୁଥିଲେ। ଏନେଇ ଏହି ଦୁଇ ହିରୋଙ୍କ ମଧ୍ୟରେ ଗଭୀର ବନ୍ଧୁତା ରହିଥିଲା। କେବଳ ଏତିକି ନୁହେଁ ଉଭୟ ଲାହୋର ନ୍ୟାସ୍ନାଲ୍ କଲେଜର ଛାତ୍ର ମଧ୍ୟ ଥିଲେ। ସୁଖଦେବ ସାଣ୍ଡର୍ସ ହତ୍ୟା ମାମଲାରେ ଭଗତ ସିଂହ ଏବଂ ରାଜଗୁରୁଙ୍କୁ ସମର୍ଥନ କରିଥିଲେ।
ଶହୀଦ ରାଜଗୁରୁ:-
ଶହୀଦ ରାଜଗୁରୁ ୨୪ ଅଗଷ୍ଟ ୧୯୦୮ରେ ପୁଣେ ଜିଲ୍ଲାର ଖେଡା ଠାରେ ଜନ୍ମଗ୍ରହଣ କରିଥିଲେ। ରାଜଗୁରୁ ଶିବାଜୀଙ୍କ ଗୁଇନ୍ଦା ଶୈଳୀର ପ୍ରଶଂସକ ହେବା ସହିତ ଲୋକମାନ୍ୟ ବାଲ ଗଙ୍ଗାଧର ତିଲକଙ୍କ ଚିନ୍ତାଧାରା ଦ୍ୱାରା ମଧ୍ୟ ପ୍ରଭାବିତ ହୋଇଥିଲେ।
ପ୍ରକାଶଥାଉ ଯେ ଶହୀଦଙ୍କ ସମ୍ମାନାର୍ଥେ ଭାରତରେ ପ୍ରତିବର୍ଷ ସମୁଦାୟ ସାତଟି ଶହୀଦ ଦିବସ ପାଳନ କରାଯାଏ। ଏହିସବୁ ବିଭିନ୍ନ ମାସର ବିଭିନ୍ନ ତାରିଖରେ ପାଳନ କରାଯାଏ। ଏହି ସାତ ଦିନ ହେଉଛି ୩୦ ଜାନୁଆରୀ, ୨୩ ମାର୍ଚ୍ଚ, ୧୯ ମେ, ୨୧ ଅକ୍ଟୋବର, ୧୭ ନଭେମ୍ବର, ୧୯ ନଭେମ୍ବର ଏବଂ ୨୪ ନଭେମ୍ବର।
