World Television Day 2024: ଆଜି ବି ଟିଭିର ରହିଛି ଚାହିଦା; କେବେ ଭୁଲିହେବନି ଟିଭି ଦୁନିଆର ଏହି ୫ ସିରିଏଲ୍

ଆଧୁନିକ ସମାଜ ଉପରେ ଟେଲିଭିଜନର ପ୍ରଭାବକୁ ଚିହ୍ନିବା ପାଇଁ ପ୍ରତିବର୍ଷ ୨୧ ନଭେମ୍ବରରେ ‘ବିଶ୍ୱ ଟେଲିଭିଜନ ଦିବସ’ ପାଳନ କରାଯାଏ। ଊନବିଂଶ ଶତାବ୍ଦୀର ଶେଷ ଭାଗରେ ଏହାର ଆରମ୍ଭ ହେବା ପରଠାରୁ ଟେଲିଭିଜନ୍ ଟେକ୍ନୋଲୋଜିରେ ଯଥେଷ୍ଟ ପରିବର୍ତ୍ତନ ହୋଇଛି, ଏକ ସୀମିତ ସଂଖ୍ୟକ ଚ୍ୟାନେଲ୍‌ ସହିତ ଏକ ବଡ଼ ବାକ୍ସରୁ ନେଇ ଅନେକ ଷ୍ଟ୍ରିମିଂ ବିକଳ୍ପ ସହିତ ଏକ ଆକର୍ଷକ, ହାଇ-ଡେଫିନେସନ୍ ସ୍କ୍ରିନ୍ ପର୍ଯ୍ୟନ୍ତ ବିକଶିତ ହୋଇଛି।

(ଟେଲିଭିଜନ୍ ଯଥେଷ୍ଟ ପରିବର୍ତ୍ତନ ହୋଇଛି)

ଆଜି, ଟିଭି ପ୍ରାୟ ସମସ୍ତଙ୍କ ଦୈନନ୍ଦିନ ଜୀବନର ଏକ ଅବିଚ୍ଛେଦ୍ୟ ଅଙ୍ଗ ହୋଇଯାଇଛି। ବିଶ୍ୱର କୋଟି କୋଟି ଲୋକଙ୍କୁ ଏହା ମନୋରଞ୍ଜନ, ଶିକ୍ଷା ଏବଂ ସୂଚନା ପ୍ରଦାନ କରୁଛି। ମନୋରଞ୍ଜନ ବ୍ୟତୀତ ଟେଲିଭିଜନ ଲୋକମାନଙ୍କୁ ବିଭିନ୍ନ ବିଷୟରେ ସଚେତନତା ସୃଷ୍ଟି କରିବା ଏବଂ ସାମାଜିକ ପରିବର୍ତ୍ତନକୁ ପ୍ରୋତ୍ସାହିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି।

ଟିଭିର ଭୂମିକା:

ଡକ୍ୟୁମେଣ୍ଟାରୀ, ନ୍ୟୁଜ୍ ପ୍ରୋଗ୍ରାମ୍ ଏବଂ ଶିକ୍ଷାଗତ ଶୋ’ ଦର୍ଶକମାନଙ୍କୁ ବିଜ୍ଞାନ, ଇତିହାସ ଏବଂ ବିଶ୍ୱ ସ୍ତରୀୟ ଘଟଣା ବିଷୟରେ ଅବଗତ କରାଇଛି। ଅସମାନତା, ନ୍ୟାୟ ଏବଂ ପରିବେଶ ସମସ୍ୟା ଭଳି ଗୁରୁତ୍ୱପୂର୍ଣ୍ଣ ମାମଲାକୁ ସମାଧାନ କରି ଟିଭି ସାମାଜିକ ମନ୍ତବ୍ୟ ପାଇଁ ଏକ ଶକ୍ତିଶାଳୀ ଉପକରଣ ହୋଇଯାଇଛି।

କେବେଠାରୁ ଆରମ୍ଭ:

ତେବେ ମିଳିତ ଜାତିସଂଘର ସାଧାରଣ ସଭା ୧୭ ଡିସେମ୍ବର ୧୯୯୬ ରେ ଏକ ପ୍ରସ୍ତାବ ପାରିତ କରିଥିଲା ​​ଏବଂ ପ୍ରତିବର୍ଷ ନଭେମ୍ବର ୨୧ରେ ‘ବିଶ୍ୱ ଟେଲିଭିଜନ ଦିବସ’ ପାଳନ କରିବାକୁ ନିଷ୍ପତ୍ତି ନେଇଥିଲା।

କଳା-ଧଳାରୁ ସ୍ମାର୍ଟ ଟିଭି

ସେବେଠାରୁ ଆଜି ପର୍ଯ୍ୟନ୍ତ ‘ବିଶ୍ୱ ଟେଲିଭିଜନ ଦିବସ’ ସାରା ବିଶ୍ୱରେ ପାଳନ କରାଯାଉଛି। ସୂଚନା ଅନୁଯାୟୀ, ୧୯୨୫ ମସିହାରେ ସ୍କଟ୍‌ଲ୍ୟାଣ୍ଡର ଇଞ୍ଜିନିୟର ତଥା ଉଦ୍ଭାବକ ଜନ୍ ଲଗି ବେୟର୍ଡଙ୍କ ଦ୍ୱାରା ଟିଭି ଉଦ୍ଭାବନ କରାଯାଇଥିଲା, ଯାହା ଆଜି ଘରେ ଘରେ ପରିଚିତ।

କଳା-ଧଳାରୁ ସ୍ମାର୍ଟ ଟିଭି:

କଳା-ଧଳାରୁ ଆଜି ଆମେ ଟିଭିର ସ୍ମାର୍ଟ ଦୁନିଆରେ ପହଞ୍ଚିଛେ। ବିଦ୍ୟୁତ୍ ଦ୍ୱାରା ଚାଲୁଥିବା ଭାରୀ ଟିଭି ଆଜି ସ୍ଲିମ୍ ହୋଇଯାଇଛି। ଟିଭି ସାହାଯ୍ୟରେ ଆମେ ସାରା ଦୁନିଆର ଖବର କେଇ ମୁହୂର୍ତ୍ତରେ ପାଇଯାଉଛୁ। ୧୫ ସେପ୍ଟେମ୍ବର ୧୯୫୯ରେ ଭାରତରେ ଟିଭି ଆରମ୍ଭ ହୋଇଥିଲା। ଅବଶ୍ୟ, ପୂର୍ବରୁ କମ୍ ସମ୍ବଳ ଏବଂ ପ୍ରଯୁକ୍ତିବିଦ୍ୟା ହେତୁ ପ୍ରସାରଣ କେବଳ ସ୍ୱଳ୍ପ ସମୟ ପାଇଁ ହେଉଥିଲା, କିନ୍ତୁ ଆଜି ପ୍ରସାରଣ ୨୪ ଘଣ୍ଟା ହୋଇପାରୁଛି।

ଟିଭି ଦୁନିଆର ୫ ସିରିଜ୍ ଯାହା ଆଜି ବି ଲୋକପ୍ରିୟ:

ଶକ୍ତିମାନ:

(ମୁକେଶ ଖାନ୍ନା ଅଭିନୀତ ଶକ୍ତିମାନ)

ଟେଲିଭିଜନ୍ ଧାରାବାହିକ ଶକ୍ତିମାନ ୯୦ ଦଶକର ସବୁଠାରୁ ସୁପରହିଟ୍ ଶୋ’। ୧୯୯୭ ରୁ ୨୦୦୫ ପର୍ଯ୍ୟନ୍ତ ଏହି ଶୋ’ DD ନ୍ୟାସନାଲ୍‌ରେ ପ୍ରସାରିତ ହୋଇଥିଲା। ମୁଖ୍ୟ ଭୂମିକାରେ ପ୍ରସିଦ୍ଧ ଅଭିନେତା ମୁକେଶ ଖାନ୍ନା ଅଭିନୟ କରିଥିଲେ, ଯିଏ ଶୋ’ର ନିର୍ମାତା ମଧ୍ୟ ଥିଲେ। ଶକ୍ତିମାନ ନିଜ ଶକ୍ତି ପାଇଁ ଜଣାଶୁଣା ଯାହା ସେ ସାଧନା କରି ପାଇଥିଲେ। ପ୍ରକୃତିର ପାଞ୍ଚଟି ପ୍ରାକୃତିକ ଉପାଦାନ(ଆକାଶ, ପୃଥିବୀ, ବାୟୁ, ଅଗ୍ନି ଏବଂ ଜଳ)ରୁ ସେ ନିଜର ଶକ୍ତି ପାଇଥିଲେ।

ମାଲ୍‌ଗୁଡି ଡେଜ୍:

(ଆର୍‌.କେ ନାରାୟଣଙ୍କ ଲୋକପ୍ରିୟ ପିଲାଙ୍କ ପୁସ୍ତକ ଉପରେ ଆଧାର ‘ମାଲ୍‌ଗୁଡି ଡେଜ୍’)

ଆର୍‌.କେ ନାରାୟଣଙ୍କ ଲୋକପ୍ରିୟ ପିଲାଙ୍କ ପୁସ୍ତକ ଉପରେ ଆଧାର କରି ଏହି ଧାରାବାହିକ ଟେଲିଭିଜନରେ ପିଲାମାନଙ୍କର ଆଗ୍ରହ ସୃଷ୍ଟି କରିବାରେ ପ୍ରଥମ ସିରିଜ୍ ହୋଇଥିଲା। ୧୯୮୭ରେ DD ନ୍ୟାସନାଲ୍‌ରେ ‘ମାଲ୍‌ଗୁଡି ଡେଜ୍’ ପ୍ରିମିୟର୍ ହୋଇଥିଲା। ଯୁବ ବାଳକ ସ୍ୱାମୀଙ୍କ ଭୂମିକାରେ ଅଭିନୟ କରିଥିବା ମାଷ୍ଟର ମଞ୍ଜୁନାଥ ସେହି ସମୟରେ ଅଧିକାଂଶ ପିଲାଙ୍କ ହିରୋ ବନିଯାଇଥିଲେ।

CID:

(କ୍ରାଇମ୍‌ ଟେଲିଭିଜନ ଶୋ CID)

୧୯୯୭ରେ ପ୍ରସାରିତ ହୋଇଥିବା କ୍ରାଇମ୍‌ ଟେଲିଭିଜନ ଶୋ CID ପ୍ରତ୍ୟେକ ଥର ଟିଭିରେ ପ୍ରସାରିତ ହେବାବେଳେ ଏହାକୁ ଦେଖିବା ପାଇଁ ଲୋକଙ୍କ ଆଗ୍ରହ ସୃଷ୍ଟି କରୁଥିଲା। ଟେଲିଭିଜନରେ ଦୀର୍ଘତମ ଚାଲୁଥିବା ଶୋ’ ମଧ୍ୟରୁ CID ଅନ୍ୟତମ ଏବଂ ଏହା ୨୧ ବର୍ଷ ପୂରଣ କରି ୨୦୧୮ରେ ଶେଷ ହୋଇଥିଲା।

ରାମାୟଣ:

(ରାମାନନ୍ଦ ସାଗରଙ୍କ ସିରିଜ୍ ରାମାୟଣ)

୧୯୮୬ରେ ରାମାନନ୍ଦ ସାଗରଙ୍କ ସିରିଜ୍ ରାମାୟଣ ଡିଡି ନ୍ୟାସ୍‌ନାଲ୍‌ରେ ପ୍ରିମିୟର ହୋଇଥିଲା। ଏହା ଭାରତକୁ କିଛି ମୂଲ୍ୟବାନ ଶିକ୍ଷା ଦେଇଥିଲା ଆଉ ଟିଭି ଦୁନିଆକୁ ମହାନ କରିଦେଇଥିଲା। ପ୍ରଥମ ଥର ପାଇଁ ଏକ ଟେଲିଭିଜନ୍ ସିରିଜ୍ ଏତେ ଲୋକପ୍ରିୟତା ହାସଲ କଲା। ଗଣମାଧ୍ୟମରେ ଏହା ଏପରି ଏକ କାହାଣୀ ଥିଲା ଯେ ଲୋକମାନେ ନିଜ ଟେଲିଭିଜନ ସାମ୍ନାରେ ପୂଜା କରୁଥିଲେ ଏବଂ ଚରିତ୍ରମାନେ ମଧ୍ୟ ଲୋକଙ୍କ ପୂଜ୍ୟ ହୋଇଗଲେ।

ମହାଭାରତ:

(ବିଆର୍ ଚୋପ୍ରାଙ୍କ ‘ମହାଭାରତ')

୧୯୮୮ରେ ଯେତେବେଳେ ରାମାୟଣ ଟେଲିଭିଜନରେ ଶେଷ ହେଲା, ସେତେବେଳେ ଭାରତୀୟ ଘରେ ହାହାକାର ଖେଳିଗଲା। ଏହି ସମୟରେ ବିଆର୍ ଚୋପ୍ରା ଆଗକୁ ଯାଇ ‘ମହାଭାରତ’ରେ ଏହି ଶୂନ୍ୟସ୍ଥାନ ପୂରଣ କରିଦେଲେ। ସେତେବେଳେ ‘ମହାଭାରତ’ ଡିଡି ନ୍ୟାସ୍‌ନାଲ୍‌ରେ ପ୍ରସାରିତ ହେଉଥିବାରୁ ଅଧିକାଂଶ ଦୋକାନ ଏବଂ ପ୍ରତିଷ୍ଠାନ ୪୫ ମିନିଟ୍ ପାଇଁ ବନ୍ଦ ହୋଇଯାଉଥିଲା ​​ଏବଂ ଭାରତର ରାସ୍ତାଗୁଡ଼ିକ ଖାଲି ହୋଇଯାଉଥିଲା।