LIVE TV
ଆଦର୍ଶ ଓ ଅହିଂସାର ପ୍ରତୀକ ହେଉଛନ୍ତି ଜାତିର ପିତା ମହାତ୍ମା ଗାନ୍ଧୀ । ଭାରତର ସ୍ୱାଧୀନତା ସଂଗ୍ରାମରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବା ସ୍ୱାଧୀନତା ସଂଗ୍ରାମୀ ମାନଙ୍କ ମଧ୍ୟରୁ ଜଣେ ହେଲେ ମୋହନ ଦାସ କରମ ଚାନ୍ଦ ଗାନ୍ଧୀ(ମହାତ୍ମା ଗାନ୍ଧୀ) । ସାରା ଦେଶରେ ବାପୁ ଭାବରେ ବେଶ୍ ଜଣାଶୁଣା । ଗାନ୍ଧିଜୀ କେବଳ ଭାରତରେ ନୁହେଁ ବରଂ ସମଗ୍ର ବିଶ୍ୱରେ ଏକ ଲୋକପ୍ରିୟ ବ୍ୟକ୍ତିତ୍ୱ । ଭାରତରେ ସ୍ୱାଧୀନତା, ଗର୍ବ, କଲ୍ୟାଣ ଏବଂ ପ୍ରଗତି ପାଇଁ ସଂଗ୍ରାମ କରିଥିବା ବାପୁଙ୍କୁ ଶ୍ରଦ୍ଧାଜ୍ଞଳି ଜଣାଇବା ଉଦ୍ଦେଶ୍ୟରେ ତାଙ୍କ ତିରୋଧାନ ଦିବସ ଜାନୁଆରୀ ୩୦ ତାରିଖକୁ ସର୍ବଭାରତୀୟ ସ୍ତରରେ ‘ସହିଦ ଦିବସ’ ଭାବେ ପାଳନ କରାଯାଉଛି।
ଅଧିକ ପଢ଼ନ୍ତୁ: କେବେ ଠାରୁ ଭାରତୀୟ ମୁଦ୍ରାରେ ସ୍ଥାନ ପାଇଲା ଗାନ୍ଧିଜୀଙ୍କ ଫଟୋ ?
Also Read
ଜାନୁଆରୀ ୩୦, ୧୯୪୮ ବର୍ଷ ... ଏହି ଦିନ ଦେଶର ଇତିହାସ ପାଇଁ କଳା ଦିନ କହିଲେ ଚଳେ । ଏହି ଦିନ ମହାତ୍ମା ଗାନ୍ଧୀଙ୍କୁ ୭୮ ବର୍ଷ ବୟସରେ ଦିଲ୍ଲୀର ବିର୍ଲା ହାଉସ୍ କମ୍ପ୍ଲେକ୍ସରେ ହତ୍ୟା କରିଥିଲେ ନାଥୁରାମ ଗଡସେ । ଭାରତର ସ୍ୱାଧୀନତା ପାଇଁ ବାପୁଙ୍କ ଅବଦାନକୁ କିଏ ବା ଭୁଲିପାରିବ । ସେତେବେଳେ ମହାତ୍ମାଗାନ୍ଧୀ ଦୁନିଆର ଜଣେ ପ୍ରଭାବଶାଳୀ ନେତା ଥିଲେ ।
ଏହି କାରଣରୁ ତାଙ୍କ ମୃତ୍ୟୁ ବାର୍ଷିକୀ ଭାରତରେ ଶହୀଦ ଦିବସ ଭାବରେ ପାଳନ କରାଯାଏ । ପ୍ରତିବର୍ଷ ଜାନୁଆରୀ ୩୦ ରେ ରାଷ୍ଟ୍ରପତି, ଉପରାଷ୍ଟ୍ରପତି, ପ୍ରଧାନମନ୍ତ୍ରୀ, ପ୍ରତିରକ୍ଷା ମନ୍ତ୍ରୀ ଏବଂ ତିନି ସେବା (ସେନା, ବାୟୁସେନା ଏବଂ ନୌସେନା) ର ମୁଖ୍ୟମାନେ ଦିଲ୍ଲୀର ରାଜଘାଟରେ ମହାତ୍ମା ଗାନ୍ଧୀଙ୍କ ସମାଧି ସ୍ଥଳରେ ଶ୍ରଦ୍ଧାଞ୍ଜଳି ଅର୍ପଣ କରନ୍ତି ।
ଆଜି ବାପୁ ଆମ ଗହଣରେ ନଥିଲେ ସୁଦ୍ଧା ତାଙ୍କର ବିଚାର ଆମ ଭିତରେ ସବୁଦିନ ପାଇଁ ସ୍ମୃତିରେ ରହିଛି, ଯାହା ଦେଶବାସୀଙ୍କୁ ସାହସ ଓ ସଫଳତା ପଥରେ ଆଗେଇବା ନେବା ପାଇଁ ପ୍ରେରଣା ଯୋଗାଉଛି ।
