LIVE TV
୧୯୯୯ର କାର୍ଗିଲ ଯୁଦ୍ଧ ସମୟରେ ଭାରତୀୟ ସେନାର ସୈନିକମାନଙ୍କ ଦ୍ୱାରା ଦିଆଯାଇଥିବା ବଳିଦାନକୁ ସମ୍ମାନ ଜଣାଇବା ପାଇଁ ପ୍ରତି ବର୍ଷ ଭାରତରେ ‘କାର୍ଗିଲ୍ ବିଜୟ ଦିବସ’ ପାଳନ କରାଯାଏ। ଏହା ଭିତରେ ଯୁଦ୍ଧକୁ ୨୪ ବର୍ଷ ବିତିଗଲାଣି। ଜାମ୍ମୁ କାଶ୍ମୀରର କାର୍ଗିଲ ସେକ୍ଟରରେ ଭାରତୀୟ ସେନା ପାକିସ୍ତାନ ବିରୋଧରେ 'ଅପରେସନ୍ ବିଜୟ' ନାମରେ ଯୁଦ୍ଧ ଲଢିଥିଲା, ଯାହା ବର୍ତ୍ତମାନ ଲଦାଖ ଅଟେ।
ପ୍ରତିବର୍ଷ ୨୬ ଜୁଲାଇରେ ‘କାର୍ଗିଲ ବିଜୟ ଦିବସ’ ପାଳନ କରାଯାଏ, କାରଣ ୧୯୯୯ ମସିହାରେ ଏହି ଦିନ ହିଁ କାର୍ଗିଲର ତୁଷାର ଶିଖରରେ ପ୍ରାୟ ତିନିମାସ ଧରି ଚାଲିଥିବା ସଶସ୍ତ୍ର ଯୁଦ୍ଧ ପରେ ଭାରତୀୟ ସୈନ୍ୟମାନେ ପାକିସ୍ତାନୀ ରେଞ୍ଜର୍ସ ଉପରେ ବିଜୟ ଘୋଷଣା କରିଥିଲେ।
କାର୍ଗିଲ ଯୁଦ୍ଧ, ଯାହା କାର୍ଗିଲ ସଂଘର୍ଷ ଭାବରେ ମଧ୍ୟ ଜଣାଶୁଣା, ଜାମ୍ମୁ କାଶ୍ମୀରର କାର୍ଗିଲ ଜିଲ୍ଲାର ମେ’ ରୁ ଜୁଲାଇ ମଧ୍ୟରେ ଲାଇନ୍ ଅଫ୍ କଣ୍ଟ୍ରୋଲ୍ (LoC) ମଧ୍ୟରେ ଲଢେଇ ହୋଇଥିଲା ଯେଉଁଥିରେ ଭାରତ ବିଜୟୀ ହୋଇଥିଲା। ତେଣୁ ଏହି ଦିନଟି କାର୍ଗିଲ ଯୁଦ୍ଧର ସହିଦମାନଙ୍କୁ ଉତ୍ସର୍ଗୀକୃତ। ଏହା କାର୍ଗିଲ ସହିଦମାନଙ୍କୁ ଶ୍ରଦ୍ଧାଞ୍ଜଳି ଦେବା ଏବଂ ଦେଶର ଅଖଣ୍ଡତାକୁ ରକ୍ଷା କରିବା ପାଇଁ ଆମର ବୀର ସୈନିକମାନଙ୍କ ଦ୍ୱାରା କରାଯାଇଥିବା ସର୍ବୋଚ୍ଚ ବଳିଦାନକୁ ମନେ ରଖିବାର ଦିନ। ଆଜିର ଏହି ସମର୍ପଣର ଦିନରେ ଆସନ୍ତୁ ଯୁଦ୍ଧକୁ ନେଇ ୫ଟି ତଥ୍ୟ ଉପରେ ନଜର ପକେଇ ନେବା।
Also Read
ଅଧିକ ପଢ଼ନ୍ତୁ: ଆଗେ ଆସିଲା ପୁଅ ସହିଦ ହେବା ଖବର, ପରେ ଆସିଲା ହାତ ଲେଖା ଚିଠି; ଲେଖାଥିଲା ରଜ ଆସୁଛି, ଘରକୁ ଯିବି...
ଜାମ୍ମୁ କାଶ୍ମୀରର କାର୍ଗିଲ ଜିଲ୍ଲାର ଲାଇନ୍ ଅଫ୍ କଣ୍ଟ୍ରୋଲ୍ (LoC) ନିକଟରେ କାର୍ଗିଲ୍ ଯୁଦ୍ଧ ହୋଇଥିଲା। ଶୀତଦିନେ ଏହି ଅଞ୍ଚଳ ଦଖଲ କରିବାକୁ ପାକିସ୍ତାନୀ ସେନା ଅନୁପ୍ରବେଶକାରୀଙ୍କ ନାମରେ ନିଜର ସୈନ୍ୟ ପଠାଇଥିଲା। ତା’ର ମୁଖ୍ୟ ଉଦ୍ଦେଶ୍ୟ ଥିଲା ଲଦାଖ ଏବଂ କାଶ୍ମୀର ମଧ୍ୟରେ ସମ୍ପର୍କ କାଟିବା ଏବଂ ଭାରତ ସୀମାରେ ଉତ୍ତେଜନା ସୃଷ୍ଟି କରିବା।
୩ ମେ ୧୯୯୯ରେ ପାକିସ୍ତାନ ଏହି ଯୁଦ୍ଧ ଆରମ୍ଭ କରିଥିଲା ଯେତେବେଳେ ପ୍ରାୟ ୫୦୦୦ ସୈନିକଙ୍କ ସହିତ କାର୍ଗିଲର ପାହାଡିଆ ଅଞ୍ଚଳରେ ଥିବା ଉଚ୍ଚ ସ୍ଥାନକୁ ଅନୁପ୍ରବେଶ କରି କବ୍ଜା କରିଥିଲା। ଯେତେବେଳେ ଭାରତ ସରକାରଙ୍କୁ ଏହାର ସୂଚନା ମିଳିଲା, ବିଶ୍ୱାସଘାତକତା କରିଥିବା ଅନୁପ୍ରବେଶକାରୀଙ୍କୁ ଘଉଡ଼ାଇବା ପାଇଁ ଭାରତୀୟ ସେନା ଦ୍ୱାରା 'ଅପରେସନ୍ ବିଜୟ' ଆରମ୍ଭ କରାଯାଇଥିଲା।
୧୯୯୮–୧୯୯୯ ମସିହାରେ ଶୀତ ସମୟରେ, ପାକିସ୍ତାନୀ ସୈନ୍ୟମାନେ ସିଆଚେନ୍ ଗ୍ଲାସିଅର୍ ଉପରେ କବ୍ଜା କରିବା ଲକ୍ଷରେ କାର୍ଗିଲ ନିକଟରେ ଗୁପ୍ତ ଭାବେ ପ୍ରଶିକ୍ଷଣ ଓ ସେନା ପଠାଇବା ଆରମ୍ଭ କରିଥିଲେ। ଅନ୍ୟପକ୍ଷରେ ପାକିସ୍ତାନୀ ସେନା କହିଥିଲା ଯେ ସେମାନେ ପାକିସ୍ତାନୀ ସୈନିକ ନୁହଁନ୍ତି ବରଂ ମୁଜାହିଦ୍ଦିନ ଥିଲେ।
ଯୁଦ୍ଧ ପଛର କାହାଣୀ: ୧୯୭୧ର ଇଣ୍ଡୋ-ପାକ୍ ଯୁଦ୍ଧ ପରେ ଅନେକ ସାମରିକ ବିବାଦ ହୋଇଥିଲା। ୧୯୯୮ରେ ଉଭୟ ଦେଶ ପରମାଣୁ ପରୀକ୍ଷଣ କରିଥିଲେ ଯାହା ଦ୍ୱାରା ଉତ୍ତେଜନା ଆହୁରି ବଢିଯାଇଥିଲା। ପରିସ୍ଥିତିକୁ ଶାନ୍ତ କରିବା ପାଇଁ ଫେବୃଆରୀ ୧୯୯୯ରେ ଉଭୟ ଦେଶ ଲାହୋର ଘୋଷଣାନାମାରେ ଦସ୍ତଖତ କରି କାଶ୍ମୀର ବିବାଦର ଶାନ୍ତିପୂର୍ଣ୍ଣ ଏବଂ ଦ୍ୱିପାକ୍ଷିକ ସମାଧାନ କରିବାକୁ ପ୍ରତିଶୃତି ଦେଇଥିଲେ।
ପରେ କିନ୍ତୁ ପାକିସ୍ତାନ ବିଶ୍ୱାସଘାତ କରିଥିଲା ଓ ପାକିସ୍ତାନୀ ସଶସ୍ତ୍ର ବାହିନୀ ସେମାନଙ୍କ ସୈନିକ ଏବଂ ସାମରିକ ବାହିନୀକୁ ନିୟନ୍ତ୍ରଣ ରେଖା ଦେଇ ଭାରତୀୟ ଅଞ୍ଚଳକୁ ସ୍ଥାନାନ୍ତର କରିବା ଆରମ୍ଭ କଲା ଏବଂ ଅନୁପ୍ରବେଶର ନାମ ଦେଲା “ଅପରେସନ୍ ବଦ୍ର”। ଏହାର ମୂଳ ଉଦ୍ଦେଶ୍ୟ ଥିଲା କାଶ୍ମୀର ଏବଂ ଲଦାଖ ମଧ୍ୟରେ ଥିବା ଲିଙ୍କ୍କୁ ଭାଙ୍ଗିବା ଏବଂ ଭାରତୀୟ ସେନାକୁ ସିଆଚେନ୍ ଗ୍ଲାସିଅରରୁ ହଟାଇବା।
ଅନ୍ୟପଟେ ପାକିସ୍ତାନ ବିଶ୍ୱାସ କରିଥିଲା ଯେ ଏହି ଆଳରେ କୌଣସି ପ୍ରକାରର ଉତ୍ତେଜନା ସୃଷ୍ଟି କଲେ କାଶ୍ମୀର ପ୍ରସଙ୍ଗକୁ ଆନ୍ତର୍ଜାତୀୟ ସ୍ତରରେ ପହଞ୍ଚାଇବାରେ ସହାୟକ ହେବ ଏବଂ ଏହାର ଶୀଘ୍ର ସମାଧାନର ବାଟ ମିଳିଯିବ।
