ଆଜିକୁ ଠିକ୍ ୪ ବର୍ଷ ପୂର୍ବେ ଶତ୍ରୁମାନେ ପୁଲୱାମାରେ ଆକ୍ରମଣ କରି ଦେଶର ମନୋବଳ ଭାଙ୍ଗିବାକୁ ଷଡଯନ୍ତ୍ର କରିଥିଲେ। ଦେଶ କିନ୍ତୁ ଏପରି ଉପଯୁକ୍ତ ଉତ୍ତର ଦେଇଥିଲା ଯେ, ଶତ୍ରୁଦେଶ ଆଉ ମୁଣ୍ଡ ଉଠାଇ ପାରିଲା ନାହିଁ। ୧୪ ଫେବୃଆରୀ ୨୦୧୯ରେ CRPF ଶିବିର ଉପରେ ହୋଇଥିବା ଆକ୍ରମଣ ଦେଶର ଅସ୍ମିତା ଉପରେ ସିଧାସଳଖ ଆକ୍ରମଣ ଥିଲା।
ଏହି ଆକ୍ରମଣରେ ଦେଶ ୪୦ ବୀରଙ୍କୁ ହରାଇଥିଲା, କିନ୍ତୁ ଏହା ପରେ ସମଗ୍ର ବିଶ୍ୱ ଦେଖିଲା ଦେଶର କରାମତି। ପୁଲ୍ୱାମା ପରେ ଦେଶ ଏମିତି ଜବାବ ଦେଇଥିଲା ଯେ ଆତଙ୍କବାଦୀମାନେ ଆଉ ଥରେ ଦେଶ ପ୍ରତି ଏଭଳି ଭାବନା ଆଣିବାକୁ ଚେଷ୍ଟା କରିବା ପୂର୍ବରୁ ଚିନ୍ତା କରିବେ। ଆମର ସୁରକ୍ଷା ବାହିନୀ ପ୍ରମାଣ କରିଦେଇଥିଲେ ଭାରତ ଏହାର ସୀମା ତଥା ସାର୍ବଭୌମତ୍ୱ ରକ୍ଷା କରିବା ପାଇଁ ଆବଶ୍ୟକ ହେଲେ ଘରେ ପଶି ଶତ୍ରୁକୁ ନିପାତ କରିପାରେ।
ଅଧିକ ପଢ଼ନ୍ତୁ: ପୁଲୱାମା ଘଟଣାକୁ ୪ ବର୍ଷ : ସେଦିନ ଗୋଲାପ ନୁହେଁ ରକ୍ତରେ ଲାଲ୍ ହୋଇଥିଲା ଭାରତ
ଲୱାମା ଆକ୍ରମଣର ୧୨ ଦିନ ମଧ୍ୟରେ ଭାରତ ମଧ୍ୟ ପ୍ରତିଶୋଧ ନେଇଥିଲା। ବାୟୁସେନା ପାକିସ୍ତାନରେ ଥିବା ବାଲାକୋଟ୍ରେ ଆତଙ୍କବାଦୀ ଲୁଚି ରହିଥିବା ସ୍ଥାନ ଉପରେ ସର୍ଜିକାଲ୍ ଷ୍ଟ୍ରାଇକ୍ କରି ସେମାନଙ୍କୁ ଧ୍ୱଂସ କରିଦେଇଥିଲା। ଏହି ଆକ୍ରମଣ ଜୈଶର କ୍ୟାଡରକୁ ବହୁ ପରିମାଣରେ ନଷ୍ଟ କରିଦେଇଥିଲା ଏବଂ ପ୍ରାୟ ୩୦୦ ଆତଙ୍କବାଦୀ ନିହତ ହୋଇଥିଲେ। ଏହା ପରେ ମଧ୍ୟ ଆମର ସୁରକ୍ଷା ବାହିନୀ ଅଟକି ନଥିଲେ ଏବଂ କାଶ୍ମୀରରେ ଲୁଚି ରହିଥିବା ଷଡଯନ୍ତ୍ରରେ ଜଡିତ ଆତଙ୍କବାଦୀଙ୍କୁ ଖୋଜି ଖୋଜି ସଫା କରାଯାଇଥିଲା।
Also Read
ଆତଙ୍କ ପରେ ନିଆଯାଇଥିବା ନିର୍ଣ୍ଣାୟକ ନିଷ୍ପତ୍ତି ଯୋଗୁଁ ଆତଙ୍କବାଦୀଙ୍କୁ ସମର୍ଥନ କରୁଥିବା ବିଚ୍ଛିନ୍ନତାବାଦୀମାନେ ଆଜି କାଶ୍ମୀରରେ ଆଉ କେଉଁଠାରେ ଦେଖିବାକୁ ମିଳନ୍ତି ନାହିଁ। କେବଳ ଏତିକି ନୁହେଁ, ବର୍ତ୍ତମାନ ଦେଶଭକ୍ତିର ସ୍ଲୋଗାନ କାଶ୍ମୀରର ରାସ୍ତାରେ ପ୍ରତିଧ୍ୱନିତ ହେଉଥିବା ଦେଖିବାକୁ ମିଳେ।
ଏମିତି ଥିଲା ପୁଲ୍ୱାମା ଆକ୍ରମଣ:
ଜୈଶ ନେତା ମାସୁଦ ଅଜହର ପାକିସ୍ତାନର ନିର୍ଦ୍ଦେଶରେ ଭାରତ ଉପରେ ଆକ୍ରମଣ କରିବାକୁ ଷଡଯନ୍ତ୍ର କରିଥିଲା ଏବଂ ଫେବୃଆରୀ ୧୪, ୨୦୧୯ରେ ଏକ CRPF ଶିବିରକୁ ସିଧାସଳଖ ବିସ୍ଫୋରକ ବୋଝେଇ କାର୍ ଧକ୍କା ଦେଇଥିଲା। ଏହି ବିସ୍ଫୋରଣରେ ଦେଶର ୪୦ ବୀର ଶହୀଦ ହୋଇଯାଇଥିଲେ।
୧୨ ଦିନରେ ଭାରତର ଜବାବ:
ଏୟାର ଷ୍ଟ୍ରାଇକ୍ ପାଇଁ ଭାରତୀୟ ବାୟୁସେନା ମିରାଜ୍ -୨୦୦୦କୁ ଫେବୃଆରୀ ୨୫, ୨୦୧୯ ମଧ୍ୟରାତ୍ରି ପରେ ଗ୍ୱାଲିଅର୍ ଏୟାରବେସ୍ରୁ ଉଡ଼ାଣ କରିଥିଲା। ଭାରତର ୧୨ ମିରାଜ -୨୦୦୦ ବିମାନ ଫେବୃଆରୀ ୨୬ ସକାଳ ୩ଟାରେ ପାକିସ୍ତାନ ସୀମାରେ ପ୍ରବେଶ କରି ବାଲାକୋଟ୍ରେ ଜୈଶ ଆତଙ୍କବାଦୀ ଲୁଚି ରହିଥିବା ସ୍ଥାନ ଉପରେ ବୋମା ପକାଇଥିଲା। ଏହି ଏୟାର ଷ୍ଟ୍ରାଇକ୍ରେ ଜୈଶର ଆତଙ୍କବାଦୀ ଶିବିର ଧ୍ୱଂସ ହୋଇଯାଇଥିଲା।
ଏୟାରଷ୍ଟ୍ରାଇକ୍ ପ୍ରଭାବ:
ପୁଲୱାମା ପରେ ଭାରତ ସୁରକ୍ଷା ବାହିନୀ ଆତଙ୍କବାଦ ବିରୋଧରେ ଏକ ନିର୍ଣ୍ଣାୟକ ଲଢେଇ ଆରମ୍ଭ କରିଥିଲା ଏବଂ ଏହାର ପ୍ରଭାବରେ କାଶ୍ମୀରରେ ଆତଙ୍କବାଦ ବର୍ତ୍ତମାନ ଶେଷ ନିଶ୍ୱାସକୁ ଗଣନା କରୁଛି। ଆତଙ୍କବାଦୀଙ୍କ ଭିତ୍ତିଭୂମି ବର୍ତ୍ତମାନ ନଷ୍ଟ ହୋଇଯାଇଛି। ପୁଲୱାମା ଷଡଯନ୍ତ୍ରରେ ଜଡିତ ଆତଙ୍କବାଦୀ ସଂଗଠନର ଜୈଶ-ଏ-ମହମ୍ମଦର ଶୀର୍ଷ କ୍ୟାଡର ଏକ ମାସ ମଧ୍ୟରେ ସୁରକ୍ଷା ବାହିନୀ ଦ୍ୱାରା ନଷ୍ଟ ହୋଇଯାଇଥିଲା। ଏୟାରଷ୍ଟ୍ରାଇକ୍ ଏହାର ମେରୁଦଣ୍ଡକୁ ଭାଙ୍ଗି ଦେଇଥିଲା। ଆଜି ପର୍ଯ୍ୟନ୍ତ ଏହାର ପୁନରୁଦ୍ଧାର ହୋଇପାରି ନାହିଁ ଏବଂ ବର୍ତ୍ତମାନ ଚେହେରା ଲୁଚାଇବାକୁ ପଡୁଛି। ପୁଲୱାମା ପରେ ଆଜି ପର୍ଯ୍ୟନ୍ତ କୌଣସି ଆତଙ୍କବାଦୀ ଆକ୍ରମଣ ହୋଇ ନାହିଁ।
ପୁଲୱାମାର ଶହୀଦମାନଙ୍କୁ ଭୁଲିବନି ଦେଶ:
୪ ବର୍ଷ ପରେ ବି ଦେଶ ସେହି ସୈନିକମାନଙ୍କୁ ସଲାମ କରୁଛି। ଏହି ବୀର ଶହୀଦମାନଙ୍କ ସ୍ମୃତିରେ ପୁଲୱାମାରେ ଏକ ସ୍ମାରକ ନିର୍ମାଣ କରାଯାଇଛି। ଏହି ସ୍ମାରକ ପାଇଁ ଶହୀଦମାନଙ୍କ ଗାଁରୁ ମାଟି ଅଣାଯାଇଥିଲା।