LIVE TV
ବଲିଉଡ୍ ଅଭିନେତା ବିଦ୍ୟୁତ୍ ଜାମୱାଲ ନିଜ ଅଭିନୟ ସହିତ ଆକ୍ସନ ପାଇଁ ବେଶ ଜଣାଶୁଣା। ଆଜିକାଲି ବିଦ୍ୟୁତ୍ ତାଙ୍କ ଚଳଚ୍ଚିତ୍ର 'ଖୁଦା ହାଫିଜ୍ ଚାପ୍ଟର୍ ୨: ଅଗ୍ନିପରୀକ୍ଷା'ର ପ୍ରମୋସନରେ ବ୍ୟସ୍ତ ଅଛନ୍ତି। ଏହି ସମୟରେ, ଏକ ସାକ୍ଷାତକାର ସମୟରେ ଯେତେବେଳେ ତାଙ୍କୁ ହ୍ରିତିକ ରୋଶନ, ଟାଇଗର ଶ୍ରଫ୍ ଏବଂ ଆଦିତ୍ୟ ରୟ କାପୁରଙ୍କ ସହ ତୁଳନା କରାଯାଇଥିଲା, ସେତେବେଳେ ସେ ଏହାକୁ ନେଇ ମନଛୁଆଁ ମତ ଦେଇଥିଲେ।
ଚଳଚ୍ଚିତ୍ରର ପ୍ରମୋସନ ସମୟରେ ବିଦ୍ୟୁତ ଜାମୱାଲଙ୍କୁ ପଚରାଯାଇଥିଲା ଯେ ସେ ନିଜକୁ ଅନ୍ୟ ଆକ୍ସନ୍ ଷ୍ଟାର୍ ହ୍ରିତିକ୍ ରୋଶନ୍, ଟାଇଗର ଶ୍ରଫ୍ ଏବଂ ଆଦିତ୍ୟ ରୟ କାପୁରଙ୍କଠାରୁ ଅଲଗା କରିବା ପାଇଁ କ’ଣ କରନ୍ତି। ଏହି ପ୍ରଶ୍ନର ଉତ୍ତରରେ ବିଦ୍ୟୁତ କହିଛନ୍ତି ଯେ “ଯେଉଁସବୁ ଭଦ୍ରଲୋକଙ୍କ ନାମ ତୁମେ ନେଲ ସେମାନେ ସମସ୍ତେ ଖୁବ୍ ଭଲ ଆକ୍ସନ୍ ଷ୍ଟାର୍। କିନ୍ତୁ ମୁଁ ଦୁନିଆର ଟପ୍ ମାର୍ଶଲ ଆର୍ଟିଷ୍ଟ। ମୁଁ ଶୋଇଥାଏ କି ଜାଗ୍ରତ ଥାଏ ମୁଁ ସବୁବେଳେ ଆନୁଷ୍ଠାନିକ ଭାବରେ କାମ କରିବାକୁ ପସନ୍ଦ କରେ। ମୁଁ ସବୁବେଳେ ମୋର ଦକ୍ଷତାକୁ ବୃଦ୍ଧି କରେ ଏବଂ ସଚେତନ ରୁହେ।
ବିଦ୍ୟୁତ୍ ଆହୁରି ମଧ୍ୟ କହିଛନ୍ତି ଯେ “ଅନେକ ଲୋକ ମୋତେ ଜ୍ୟାକି ଚୈନ୍ ଏବଂ ଟୋନୀ ଜାଙ୍କ ଭଳି କିମ୍ବଦନ୍ତୀଙ୍କ ସହିତ ତୁଳନା କରନ୍ତି, ଯାହା ମତେ ବହୁତ ଖୁସି ଦିଏ। ଅନ୍ତର୍ଜାତୀୟ ସ୍ତରରେ ମଧ୍ୟ ଲୋକେ ଜାଣନ୍ତି ଯେ ଭାରତରେ ବିଦ୍ୟୁତ ଜାମୱାଲ ନାମକ ଜଣେ ଯୁବକ ଅଛନ୍ତି, ଯିଏ ଦମଦାର ଆକ୍ସନ କରନ୍ତି। ସେହିପରି ଅନେକ ଲୋକ କୁହନ୍ତି ଯେ ଯେତେବେଳେ ବିଦ୍ୟୁତ ଡ୍ୟାନ୍ସ କରନ୍ତି, ସେତେବେଳେ ସେ ମାଇକେଲ ଜ୍ୟାକ୍ସନ୍ ପରି ଦେଖାଯାଆନ୍ତି। ଏତେ ପ୍ରଶଂସା ପରେ ବି ସବୁବେଳେ ସତର୍କ ରହିବା ଆବଶ୍ୟକ।
ବିଦ୍ୟୁତ ଜାମୱାଲଙ୍କ ଫିଲ୍ମ 'ଖୁଦା ହାଫିଜ ଚାପ୍ଟର୍ ୨: ଅଗ୍ନିପରୀକ୍ଷା' ଜୁଲାଇ ୮ରେ ମୁକ୍ତିଲାଭ କରିବ। ଏହି ଚଳଚ୍ଚିତ୍ରଟି ୨୦୨୦ରେ ଆସିଥିବା 'ଖୁଦା ହାଫିଜ୍'ର ଏକ ସିକ୍ୱେଲ୍ ଅଟେ। ଏହି ଚଳଚ୍ଚିତ୍ରରେ ଶିବାଲିକା ଓବରାୟ ମୁଖ୍ୟ ଭୂମିକାରେ ଅଭିନୟ କରୁଛନ୍ତି। ଏହା ବ୍ୟତୀତ ସେ ଫିଲ୍ମ 'IB71' ଏବଂ 'ଶେର ସିଂହ ରାଣା'ରେ ମଧ୍ୟ ନଜର ଆସିବେ।
