ରିଲିଜ୍ ହୋଇନି ଶାହରୁଖଙ୍କ ଫିଲ୍ମ 'ଜୱାନ୍'; ରୋଜଗାର କଲାଣି କୋଟି କୋଟି

ଶାହରୁଖଙ୍କ ଫିଲ୍ମ ହେଇଥିବ ଆଉ ଚର୍ଚ୍ଚା ନଥିବ, ତାହା କ’ଣ କେବେ ସମ୍ଭବ। ‘ପଠାନ୍’ର ଜଲ୍‌ୱା ଯାଇ ନଥିବା ବେଳେ ଏବେ ଶାହରୁଖଙ୍କ ଆଉ ଏକ ଫିଲ୍ମ ଦର୍ଶକଙ୍କ ଉତ୍ସାହକୁ ବଢେଇ ଦେଲାଣି। ଶାହରୁଖ ଖାନ, ନୟନତାରା ଏବଂ ବିଜୟ ସେତୁପତିଙ୍କ ଆଗାମୀ ଚଳଚ୍ଚିତ୍ର ‘ଜୱାନ’ଙ୍କ ପାଇଁ ପ୍ରଶଂସକମାନେ ଉତ୍ସାହର ସହିତ ଅପେକ୍ଷା କରିଛନ୍ତି। ଏହି ଚଳଚ୍ଚିତ୍ର ଚଳିତ ବର୍ଷ ଦର୍ଶକଙ୍କ ସାମ୍ନାକୁ ଆସିବ। କିନ୍ତୁ ଫିଲ୍ମ ରିଲିଜ୍ ପୂର୍ବରୁ ମଧ୍ୟ ରୋଜଗାରରେ ରେକର୍ଡ ସୃଷ୍ଟି କରୁଛି।

ପ୍ରକାଶଥାଉ ଯେ, ଏହି ଚଳଚ୍ଚିତ୍ରର ସଙ୍ଗୀତ କୋଟି କୋଟି ଟଙ୍କାରେ ବିକ୍ରି ହୋଇଛି। ରିପୋର୍ଟ ଅନୁଯାୟୀ, ଏକ ସଂଗୀତ କମ୍ପାନୀ ‘ଜୱାନ’ର ମ୍ୟୁଜିକ୍ ଲେବଲ୍‌କୁ ୩୬ କୋଟିରେ କିଣିଛି। ଏଭଳି ପରିସ୍ଥିତିରେ ଶାହାରୁଖ ଖାନ ପୁଣି ଥରେ ବକ୍ସ ଅଫିସରେ ହଇଚଇ ସୃଷ୍ଟି କରିବେ ବୋଲି ଜଣାପଡିଛି।

Boxofficeworldwide.com ରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, 'ଜୱାନ'ର ସଙ୍ଗୀତ ଅଧିକାର ମ୍ୟୁଜିକ୍ ଲେବଲ୍ ୩୬ କୋଟିରେ ବିକ୍ରି ହୋଇଛି। ବଲିଉଡ୍ ଲାଇଫ୍ ରିପୋର୍ଟ ଅନୁଯାୟୀ, ଏହି ଚଳଚ୍ଚିତ୍ରର ସଙ୍ଗୀତ ଅଧିକାର କିଣିବା ପାଇଁ ଅନେକ କମ୍ପାନୀ ମଧ୍ୟରେ ଏକ ବିରାଟ ପ୍ରତିଯୋଗିତା ହୋଇଥିଲା।

ରିପୋର୍ଟରେ କୁହାଯାଇଛି ଯେ ଏଭଳି ରେକର୍ଡ ସେଟ କରିବା ଭଳି ଡିଲ୍ ପୂର୍ବରୁ କେବେ ହୋଇ ନାହିଁ। ଏବେ ଯଦି ଏହି ଦାବିକୁ ବିଶ୍ୱାସ କରାଯାଏ, ତେବେ ବିଭିନ୍ନ ଦିଗରେ ଏହି ଫିଲ୍ମ ରିଲିଜ୍‌ ହେବା ପୂର୍ବରୁ ଏହାର ବଜେଟର ଅଧା ରୋଜଗାର କରିନେବ। ପ୍ରକାଶଥାଉ ଯେ ଏହି ଫିଲ୍ମ ପାଇଁ ପାଖାପାଖି ୨୦୦ କୋଟି ଟଙ୍କା ଖର୍ଚ୍ଚ ହୋଇଛି।

ଶାହରୁଖ ଖାନଙ୍କ ଏହି ଫିଲ୍ମ ଅନେକ କ୍ଷେତ୍ରରେ ଖୁବ ନିଆରା। ପ୍ରଥମ କଥା ହେଉଛି ଶାହରୁଖ ଖାନ ଏହି ଚଳଚ୍ଚିତ୍ରରେ ଦକ୍ଷିଣ ତାରକା ନୟନ୍ତରାଙ୍କ ସହ ରୋମାନ୍ସ କରିବାକୁ ଯାଉଛନ୍ତି। ଏହା ସହିତ ସେ ବିଜୟ ସେତୁପତି ଙ୍କୁ ସିଧାସଳଖ ପରଦାରେ ସାମ୍ନା କରିବେ। ଏଥି ସହିତ ଏହି ଚଳଚ୍ଚିତ୍ରର ନିର୍ଦ୍ଦେଶକ ଏଟଲୀ କୁମାର ପ୍ରଥମ ଥର ପାଇଁ ଶାହରୁଖ ଖାନଙ୍କ ସହ ଏକ ବଡ ପ୍ରୋଜେକ୍ଟରେ କାମ କରୁଛନ୍ତି। କୁହାଯାଇଛି ଯେ ଏହି ଫିଲ୍ମ ଚଳିତ ବର୍ଷ ସେପ୍ଟେମ୍ବର ୭ରେ ରିଲିଜ୍ ହେବ।

'ଜୱାନ୍' ଏକ ଆକ୍ସନ୍ ଥ୍ରୀଲର୍ ଫିଲ୍ମ। ଏଥିରେ ଶାହରୁଖଙ୍କୁ ଜବରଦସ୍ତ ଆକ୍ସନ୍ ମୁଡ୍‌ରେ ଦେଖିବାକୁ ମିଳିବ। ଏହାପୂର୍ବରୁ ଶାହରୁଖ ଖାନଙ୍କ ଥ୍ରୀଲର ସସ୍‌ପେନ୍ସ ଫିଲ୍ମ 'ପଠାନ'କୁ ମଧ୍ୟ ଲୋକମାନେ ପସନ୍ଦ କରିଥିଲେ। ଏହାର ନିର୍ଦ୍ଦେଶନା ଦେଇଥିଲେ ସିଦ୍ଧାର୍ଥ ଆନନ୍ଦ। ଏହି ଚଳଚ୍ଚିତ୍ର ବିଶ୍ୱ ସ୍ତରରେ ୧୦୫୩ କୋଟି ଟଙ୍କା ରୋଜଗାର କରିଥିଲା। 'ପଠାନ' ମାଧ୍ୟମରେ ଶାହରୁଖ ଖାନ ପୂରା ୪ ବର୍ଷ ପରେ ବଲିଉଡ୍‌କୁ ଫେରି ଦର୍ଶକଙ୍କ ମଧ୍ୟରେ ଛାଇଗଲେ।

ଫିଲ୍ମ 'ଜୱାନ' ପରେ ଶାହାରୁଖ ଖାନ ଫିଲ୍ମ 'ଡଙ୍କି'ରେ ମଧ୍ୟ ନଜର ଆସିବେ। ଏହି ଚଳଚ୍ଚିତ୍ରରେ ସେ ଅଭିନେତ୍ରୀ ତାପସୀ ପନ୍ନୁଙ୍କ ସହ ରୋମାନ୍ସ କରିବାକୁ ଯାଉଛନ୍ତି। ଏହି ଫିଲ୍ମ ମାଧ୍ୟମରେ ବଲିଉଡ ପୁଣି ଥରେ ଏକ ନୂଆ ଯୋଡି ପାଇବ। ଏହି ଯୋଡିଙ୍କୁ ଏକାଠି କରି ରାଜକୁମାର ହିରାନୀ ହିନ୍ଦୀ ସିନେମାରେ ଇତିହାସ ଲେଖିବାକୁ ଯାଉଛନ୍ତି।