ଶାହରୁଖ୍‌ଙ୍କ ସହ ଫିଲ୍ମ କରିବାକୁ ସାମନ୍ଥାଙ୍କ ଇଚ୍ଛା

ଶାହରୁଖ୍‌ଙ୍କ ସହ ଫିଲ୍ମ କରିବାର ସ୍ୱପ୍ନ ଦେଖୁଛନ୍ତି ସାଉଥ୍‌ ଅଭିନେତ୍ରୀ ସାମନ୍ଥା । ଏଭଳି ଏକ ମନ୍ତବ୍ୟ ଦେଇ ଏବେ ଚର୍ଚ୍ଚାରେ ଆସିଛନ୍ତି ସାଉଥ୍ ସୁନ୍ଦରୀ ସାମ୍‌ । ନିକଟରେ ଏକ ଇଣ୍ଟରଭ୍ୟୁରେ ସେ ଏଭଳି କହିଥିବା ଜଣାପଡିଛି ।
ପୂର୍ବରୁ ମଧ୍ୟ ସାମ୍ 'ଦି ଫ୍ୟାମିଲି ମ୍ୟାନ୍: ସିଜନ୍ ୨' ସହିତ ବଲିଉଡରେ ଧମାକାଦାର୍‌ ଡେବ୍ୟୁ କରିସାରିଛନ୍ତି। ଯେଉଁଥିରେ ତାଙ୍କୁ ବହୁ ପ୍ରଶଂସା ମଧ୍ୟ ମିଳିଛି । କେବଳ ଏତିକି ନୁହେଁ ଲୋକପ୍ରିୟ ୱେବସିରିଜ୍‌ ‘The Family Man 2’ରେ ତାଙ୍କର ଦମ୍‌ଦାର ପ୍ରଦର୍ଶନ ପାଇଁ ସେ ଆହୁରି ଲୋକପ୍ରିୟ ହୋଇପାରିଛନ୍ତି ।

ବଲିଉଡ୍‌ରେ ସାମନ୍ଥାଙ୍କ ଅଧିକ ଫିଲ୍ମ ପାଇଁ ଫ୍ୟାନ୍ସ ଉତ୍କଣ୍ଠାର ସହ ଅପେକ୍ଷା କରିଥିବାବେଳେ ସାମନ୍ଥା ବଲିଉଡ୍‌ ବାଦ୍‌ଶାହ ଶାହରୁଖ ଖାନଙ୍କ ସହ କାମ କରିବାକୁ ଇଚ୍ଛା ପ୍ରକାଶ କରିଛନ୍ତି । ବହୁ ଦିନରୁ ସାମନ୍ଥାଙ୍କୁ ବଲିଉଡ୍‌ ଫିଲ୍ମରେ ଦେଖିବାକୁ ଚାହୁଁଥିବା ଦର୍ଶକଙ୍କ ଇଚ୍ଛା ଏବେ ପୂରଣ ହୋଇପାରେ।

ନିକଟରେ ଏକ ଇଣ୍ଟରଭ୍ୟୁରେ ସାମନ୍ଥାଙ୍କୁ ବିଭିନ୍ନ ପ୍ରଶ୍ନ ପଚରାଯାଇଥିଲା । ଏଥିରେ ତାଙ୍କୁ ପଚରାଯାଇଥିଲା ଯେ, ସେ କେଉଁ ୩ ଜଣ ସହ-କଳାକାରଙ୍କ ସହ କାମ କରିବାକୁ ଚାହୁଁଛନ୍ତି ? ଏହି ପ୍ରଶ୍ନର ଉତ୍ତରରେ ସାମନ୍ଥା ୩ ଜଣ ସୁପରଷ୍ଟାର୍‌ଙ୍କ ନାମ କହିଥିଲେ । ଯେଉଁଥିରେ ସେ ମହେଶ୍ ବାବୁ, ସୁର୍ଯ୍ୟା ଓ ଶାହରୁଖ୍‌ ଖାନ୍‌ଙ୍କ ନାଁ କହିଛନ୍ତି ।

ସେ ଆହୁରି ମଧ୍ୟ କହିଛନ୍ତି ଯେ, ‘ମୁଁ ଶାହରୁଖ୍‌ ଖାନଙ୍କ ସହ କାମ କରି ନାହିଁ। ମୋତେ ଶାହରୁଖଙ୍କ ସହ କାମ କରିବାକୁ ପଡିବ । ନଚେତ୍ ମୋର ସ୍ୱପ୍ନର କିଛି ଅଂଶ ଅଧୁରା ରହିଯିବ ।’

ତେବେ ହୁଏତ ସାମନ୍ଥା ଶାହରୁଖ୍‌ଙ୍କ ସହ ଫିଲ୍ମ କରିବାକୁ ଗଭୀର ଇଚ୍ଛା ପ୍ରକାଶ କରିପାରିଛନ୍ତି । ହେଲେ ଏକ ସଫଳ ଚଳଚ୍ଚିତ୍ର ପାଇଁ ସାମନ୍ଥାଙ୍କୁ କୌଣସି ସହ-କଳାକାରଙ୍କ ଆବଶ୍ୟକ ନାହିଁ ।