ଶାହରୁଖ ଖାନଙ୍କ ବିଜୟ ରଥକୁ ରୋକିବା ପାଇଁ ସାଉଥ୍‌ରୁ ଆସୁଛି ଜବରଦସ୍ତ ଫିଲ୍ମ

ଚଳିତ ବର୍ଷ ଶାହରୁଖ ଖାନଙ୍କ 'ପଠାନ' ଏବଂ 'ଜବାନ' ଆଗରେ କୌଣସି ସାଉଥ୍‌ ସୁପରଷ୍ଟାରଙ୍କ ଚଳଚ୍ଚିତ୍ର ଉଠିପାରି ନାହିଁ। ତେବେ ରଜନୀକାନ୍ତଙ୍କ ଚଳଚ୍ଚିତ୍ର 'ଜେଲର' କିଛିଟା ଆତ୍ମବିଶ୍ୱାସ ଜାଗ୍ରତ କରିଥିଲା, କିନ୍ତୁ ଏହା ମଧ୍ୟ ଶାହରୁଖ ଖାନଙ୍କ ଷ୍ଟାରଡମ ଆଗରେ ଫିକା ପଡିଯାଇଛି।

ପ୍ରଶଂସକମାନେ ଏବେ କିଙ୍ଗ ଖାନଙ୍କ ପରବର୍ତ୍ତୀ ଚଳଚ୍ଚିତ୍ର 'ଡଙ୍କି'କୁ 'ପଠାନ' ଏବଂ 'ଜବାନ' ଅପେକ୍ଷା ଏକ ବଡ଼ ହିଟ୍ ହେବ ବୋଲି ଭାବୁଛନ୍ତି। ଏହାରି ଭିତରେ କିନ୍ତୁ ଶାହରୁଖଙ୍କ ବିଜୟ ରଥକୁ ରୋକିବା ପାଇଁ ସାଉଥ ସିନେମା ଏହାର ସୁପରଷ୍ଟାରକୁ ମଇଦାନକୁ ଛାଡିବାକୁ ପ୍ରସ୍ତୁତ ହେଉଛି। ଚଳିତ ବର୍ଷ ଡିସେମ୍ବରରେ ଶାହରୁଖଙ୍କ 'ଡଙ୍କି' ସହିତ ଏହି ଫିଲ୍ମ ସଂଘର୍ଷ କରିବ। ଏହି ସଂଘର୍ଷ 'ବଲିଉଡ୍ ବନାମ ସାଉଥ୍'ର ପ୍ରତୀକ।

'ପଠାନ' ଏବଂ 'ଜବାନ' ପରେ ପୁରା ଫର୍ମରେ ଥିବା ଶାହରୁଖ ଖାନ ଚଳିତ ବର୍ଷ ଡିସେମ୍ବରରେ ତାଙ୍କର ପରବର୍ତ୍ତୀ ଚଳଚ୍ଚିତ୍ର 'ଡଙ୍କି' ରିଲିଜ୍ କରିବାକୁ ଯାଉଛନ୍ତି। ଏହି ସମୟରେ ଦକ୍ଷିଣ ସୁପର୍‌ଷ୍ଟାର୍‌ ପ୍ରଭାସଙ୍କ ନୂଆ ଚଳଚ୍ଚିତ୍ର ‘ସାଲାର୍’ ମୁକ୍ତିଲାଭ କରିବା। ଏଥିରୁ ଜଣାଯାଉଛି ଯେ ଚଳିତ ବର୍ଷ ଡିସେମ୍ବରରେ ଘରୋଇ ବକ୍ସ ଅଫିସରେ ବଲିଉଡ ଏବଂ ସାଉଥ୍ ସିନେମା ମଧ୍ୟରେ କଡା ଟକ୍କର ହେବାକୁ ଯାଉଛି।

ଡିସେମ୍ବର ୨୨ରେ ପ୍ରଭାସଙ୍କ 'ସାଲାର' ମୁକ୍ତିଲାଭ କରିବ, ଯାହା 'ଡଙ୍କି' ସହିତ ସଂଘର୍ଷ କରିବ। 'କେଜିଏଫ୍' ନିର୍ଦ୍ଦେଶକ ପ୍ରଶାନ୍ତ ନୀଲଙ୍କ ନିର୍ଦ୍ଦେଶିତ ହୋମ୍ବଲେ ଫିଲ୍ମସ୍ ବ୍ୟାନରରେ ଏହି ଫିଲ୍ମ ନିର୍ମାଣ କରାଯାଇଛି ଯାହା ଏକ ବଡ଼ ଧରଣର ହିଟ୍ ହେବ ବୋଲି ଆଶା କରାଯାଉଛି।

ପ୍ରକାଶଥାଉ ଯେ ନିର୍ମାତା ପ୍ରଥମେ ସେପ୍ଟେମ୍ବର ୨୮ରେ 'ସାଲାର' ରିଲିଜ୍ କରିବାକୁ ଚାହୁଁଥିଲେ, କିନ୍ତୁ କୌଣସି କାରଣରୁ ଫିଲ୍ମର ରିଲିଜ୍ ତାରିଖ ସ୍ଥଗିତ ରଖାଯାଇଥିଲା। କୁହାଯାଇଥିଲା ଯେ ଫିଲ୍ମର କ୍ଲାଇମାକ୍ସକୁ ଆଉ ଥରେ ସୁଟ୍ କରାଯାଇଥିଲା।

ଶାହରୁଖ ଖାନଙ୍କ 'ଡଙ୍କି' ହେଉଛି ଚଳିତ ବର୍ଷ ମୁକ୍ତିଲାଭ କରିବାକୁ ଯାଉଥିବା ତାଙ୍କର ତୃତୀୟ ଚଳଚ୍ଚିତ୍ର, ଯାହାକୁ ନେଇ ପ୍ରଶଂସକମାନେ ଖୁବ ଉତ୍ସାହିତ ଅଛନ୍ତି। ପ୍ରସିଦ୍ଧ ନିର୍ଦ୍ଦେଶକ ରାଜକୁମାର ହିରାନୀଙ୍କ ଦ୍ୱାରା ନିର୍ଦ୍ଦେଶିତ ଏହି ଚଳଚ୍ଚିତ୍ରକୁ ନେଇ କ୍ରେଜ୍‌ ମଧ୍ୟ ବଢିବାରେ ଲାଗିଛି। ପ୍ରକାଶଥାଉ ଯେ ପୂର୍ବରୁ ରିଲିଜ୍ ହୋଇଥିବା ପ୍ରଭାସଙ୍କ କିଛି ଚଳଚ୍ଚିତ୍ର ବକ୍ସ ଅଫିସରେ ଭଲ ପ୍ରଦର୍ଶନ କରି ନ ଥିବା ବେଳେ ଶାହରୁଖ ଖାନଙ୍କ ଫର୍ମ ବହୁତ ଭଲ ରହିଛି।

ବାଣିଜ୍ୟ ବିଶ୍ଳେଷକ ତରଣ ଆଦର୍ଶ ପୂର୍ବରୁ କହିଥିଲେ ଯେ 'ସାଲାର'ର ନିର୍ମାତା ଏହାକୁ ଖ୍ରୀଷ୍ଟମାସ ଦିନ ରିଲିଜ୍ କରିବାକୁ ଚାହୁଁଛନ୍ତି। ତରଣ ଆଦର୍ଶଙ୍କ ଅନୁଯାୟୀ ପ୍ରଦର୍ଶକମାନେ ଏକ ମେଲ୍ ପାଇଥିଲେ ଯେଉଁଥିରେ ଲେଖାଥିଲା ଯେ ଡିସେମ୍ବର ୨୨ରେ 'ସାଲାର' ପ୍ରେକ୍ଷାଳୟରେ ମୁକ୍ତିଲାଭ କରିବ। ଏବେ ଦେଖିବାକୁ ବାକି ରହିଲା, ଯେ 'ଡଙ୍କି'ର ନିର୍ମାତା ରିଲିଜକୁ ସ୍ଥଗିତ ରଖିବେ ନା ୨୨ ଡିସେମ୍ବରରେ 'ସାଲାର' ସହ ସଂଘର୍ଷ ପାଇଁ ପ୍ରସ୍ତୁତ ଅଛନ୍ତି। ଅନ୍ୟପକ୍ଷରେ ଯଦି ବି ଦୁଇଟି ଫିଲ୍ମ ଏକାବେଳେ ରିଲିଜ୍ ହୁଏ, ତେବେ ସାଉଥ୍ ଫିଲ୍ମ କ’ଣ ଶାହରୁଖଙ୍କ ବିଜୟ ରଥକୁ ରୋକିପାରିବ?