LIVE TV
ବିଧୁ ବିନୋଦ ଚୋପ୍ରାଙ୍କ ‘୧୨ଶ ଫେଲ୍’ ୨୦୨୩ର ଅନ୍ୟତମ ସଫଳ ଚଳଚ୍ଚିତ୍ର ମଧ୍ୟରୁ ଗୋଟିଏ। ତେବେ ରିଲିଜ୍ ସମୟରେ ଏହି ଚଳଚ୍ଚିତ୍ର ଭାରତରେ ଅଧିକ ରୋଜଗାର କରି ନଥିଲା, ପରେ କିନ୍ତୁ ଏହା ସମସ୍ତଙ୍କ ହୃଦୟରେ ଜିତିଥିଲା। ବର୍ତ୍ତମାନ ଏହି ଚଳଚ୍ଚିତ୍ର ଦେଶ ବାହାରେ ମଧ୍ୟ ଧମାଲ୍ କରିବାକୁ ପ୍ରସ୍ତୁତ। ଫିଲ୍ମ ଚାଇନାରେ ଏକ ବଡ଼ ଧରଣର ରିଲିଜ୍ ପାଇଁ ପ୍ରସ୍ତୁତ ହେଉଛି ଯାହା ନିଶ୍ଚିତ ଭାବରେ ଏହାର ଲାଭକୁ ଦ୍ୱିଗୁଣିତ କରିବ।
ନିକଟରେ ଏକ ସାକ୍ଷାତକାରରେ ଏହି ଚଳଚ୍ଚିତ୍ରରେ ମୁଖ୍ୟ ଭୂମିକାରେ ଅଭିନୟ କରିଥିବା ଅଭିନେତା ବିକ୍ରାନ୍ତ ମାସେ କହିଛନ୍ତି ଯେ ତାଙ୍କ ଚଳଚ୍ଚିତ୍ର ଚୀନ୍ର ୨୦ ହଜାର ପରଦାରେ ମୁକ୍ତିଲାଭ କରିବ।
ବିକ୍ରାନ୍ତ କହିଛନ୍ତି, “କିଛି ମାସ ହେଲା ଏହା ଉପରେ କାମ ଚାଲିଛି, କିନ୍ତୁ ଶେଷରେ ଖବର ଆସିଛି ଏବଂ ସମସ୍ତେ ଜାଣିବା ଦରକାର ଯେ ଫିଲ୍ମ ଚାଇନାରେ ମୁକ୍ତିଲାଭ କରୁଛି। ଚାଇନାରେ ହିନ୍ଦୀ ସିନେମା ହେଉ କି ଭାରତୀୟ ସିନେମା ପାଇଁ ବହୁତ ଚାହିଦା ଅଛି। ‘୧୨ଶ ଫେଲ୍’ ଚଳଚ୍ଚିତ୍ର ୨୦,୦୦୦ରୁ ଅଧିକ ପରଦାରେ ପ୍ରଦର୍ଶିତ ହେବ।”
Also Read
ଅଧିକ ପଢ଼ନ୍ତୁ: ଆସୁଛି ରଜନୀକାନ୍ତଙ୍କ ନୂଆ ଫିଲ୍ମ; ଖତରନାକ ହୋଇ ଆସୁଛନ୍ତି ରାଣା ଦଗ୍ଗୁବାତୀ
ସେ ଆହୁରି କହିଛନ୍ତି ଯେ “ଚୀନ୍ ପ୍ରକୃତରେ ମନୋରଞ୍ଜନ କ୍ଷେତ୍ରକୁ ପୂରଣ କରେ ଏବଂ ବର୍ତ୍ତମାନ ‘୧୨ଶ ଫେଲ୍’ର ନିର୍ମାତା ମଧ୍ୟ ମାଲାମାଲ୍ ହେବାକୁ ଯାଉଛନ୍ତି।” ଯେତେବେଳେ ବିକ୍ରାନ୍ତଙ୍କୁ ପଚରାଯାଇଥିଲା ଯେ ଫିଲ୍ମକୁ ପ୍ରଚାର କରିବା ପାଇଁ ସେ କ’ଣ ଚୀନ୍ ଯିବେ କି? ଏହାରର ଉତ୍ତରରେ ସେ କହିଛନ୍ତି ଯେ “ ଏବେ ଏ ବିଷୟରେ କଥା ହେବା ବହୁତ ଶୀଘ୍ର ହୋଇଯିବ, କିନ୍ତୁ ମୁଁ ବାସ୍ତବରେ ସେଠାରେ ଫିଲ୍ମକୁ ପ୍ରମୋଟ୍ କରିବାକୁ ବହୁତ ଉତ୍ସାହିତ, କାରଣ ଦୀର୍ଘ ଦିନ ପରେ ଏମିତି କିଛି ହେଉଛି।”
ପ୍ରକାଶଥାଉ ଏହି ଫିଲ୍ମ ଭାରତରେ ବ୍ୟାପକ ଭାବେ ରିଲିଜ୍ ହୋଇ ନଥିଲା ଏବଂ ଘରୋଇ ବଜାରରେ ୫୬.୭୫ କୋଟି ଟଙ୍କା ରୋଜଗାର କରିବାରେ ସଫଳ ହୋଇଥିଲା। ସୂଚନା ମୁତାବକ ଫିଲ୍ମ ଏହାର ଓପେନିଂ ଦିନରେ ସମଗ୍ର ଭାରତରେ ପ୍ରାୟ ୧,୩୪୭ ଶୋ’ ଥିଲା। ତେବେ ଏହାର ସାମାନ୍ୟ ବଜେଟ୍କୁ ଦୃଷ୍ଟିରେ ରଖି ଏହା ଚଳଚ୍ଚିତ୍ର ପାଇଁ ଏକ ବଡ଼ ସଫଳତା ଭାବରେ ଦେଖାଯାଇଥିଲା।
କିଛି ଦିନ ପରେ, ଫିଲ୍ମ ଷ୍ଟ୍ରିମିଂ ପ୍ଲାଟ୍ଫର୍ମ ହଟ୍ଷ୍ଟାରରେ ମୁକ୍ତିଲାଭ କରିଥିଲା ଏବଂ ସୋସିଆଲ ମିଡିଆରେ ବହୁ ପ୍ରଶଂସା ଲାଭ କରିଥିଲା | ରିଲିଜ୍ ହେବାର ୨୫ ସପ୍ତାହ ପରେ ମଧ୍ୟ ଏହି ଚଳଚ୍ଚିତ୍ର ଭାରତର ପ୍ରେକ୍ଷାଳୟରେ ଅଛି ଏବଂ ବର୍ତ୍ତମାନ ୨୦ କୋଟି ଟଙ୍କା ବଜେଟ୍ର ଏହି ଫିଲ୍ମ ମଧ୍ୟ ଚାଇନାରେ ପ୍ରାଧାନ୍ୟ ବିସ୍ତାର କରିବାକୁ ଯାଉଛି।
ସୂଚନାଯୋଗ୍ୟ ଯେ ପୂର୍ବରୁ ଦଙ୍ଗଲ, ସିକ୍ରେଟ୍ ସୁପରଷ୍ଟାର ଏବଂ ପି.କେ ଭଳି ଚଳଚ୍ଚିତ୍ର ଚାଇନାରେ ଅବିଶ୍ୱସନୀୟ ବ୍ୟବସାୟ କରିଛି। ସୂଚନା ମୁତାବକ ଚାଇନାରେ ମୁକ୍ତିଲାଭ କରିବା ପରେ ଦଙ୍ଗଲ ୧୯୬.୮୯ ମିଲିୟନ ଡଲାର, ସିକ୍ରେଟ ସୁପରଷ୍ଟାର ୧୧୮.୨୪ ମିଲିୟନ ଡଲାର ଏବଂ ପି.କେ ୧୧୬.୬ ମିଲିୟନ ଡଲାର ରୋଜଗାର କରିଥିଲା।
ତେବେ ଦୁଃଖର କଥା ଯେ ଦୁଇ ଦେଶ ମଧ୍ୟରେ ତିକ୍ତତା ବୃଦ୍ଧି ପାଇବା ପରେ ୨୦୨୦ରେ ଚାଇନାରେ ଭାରତୀୟ ଚଳଚ୍ଚିତ୍ର ରିଲିଜ୍ ଉପରେ ପ୍ରତିବନ୍ଧକ ଲଗାଯାଇଥିଲା।
ତେବେ ୨୦୨୨ ମସିହାରେ ସୁଶାନ୍ତ ସିଂହ ରାଜପୁତ-ଷ୍ଟାରର୍ ‘ଛିଛୋରେ’ ଚୀନ୍ ରିଲିଜ୍ ସହିତ ଏହି ପ୍ରତିବନ୍ଧକକୁ ହଟାଇ ଦିଆଯାଇଥିଲା ଏବଂ ବର୍ତ୍ତମାନ ଭାରତୀୟ ନିର୍ମାତାମାନେ ସେଠାରେ ସେମାନଙ୍କର ଚଳଚ୍ଚିତ୍ର ରିଲିଜ୍ କରିବାକୁ ସ୍ୱାଧୀନ ହୋଇଛନ୍ତି।
