LIVE TV
ବଲିଉଡରେ ନିଜ ହାତକୁ ଅଢେଇ କିଲିଆ ପ୍ରମାଣ କରିଥିବା ଅଭିନେତା ସନି ଦେଓଲ୍ ଆଜିକାଲି ରିଲିଜ୍ ହୋଇଥିବା ଫିଲ୍ମ 'ଗଦର ୨' ପାଇଁ ଖୁବ୍ ଚର୍ଚ୍ଚାରେ। ଅନିଲ ଶର୍ମାଙ୍କ ଦ୍ୱାରା ନିର୍ଦ୍ଦେଶିତ ଏହି ଚଳଚ୍ଚିତ୍ରଟି ସିନେ ପ୍ରେମୀଙ୍କ ପ୍ରଶଂସା ସାଉଁଟିବାରେ ଲାଗିଛି। ୨୨ ବର୍ଷ ପରେ, ରୂପେଲି ପରଦାରେ ତାରା ସିଂହ ଏବଂ ସକିନାଙ୍କ ଆଇକନିକ୍ ଯୋଡିକୁ ଦେଖି ଦର୍ଶକମାନଙ୍କ ଖୁସି କହିଲେ ନ ସରେ।
ଅଗଷ୍ଟ ୧୧ରେ ପ୍ରେକ୍ଷାଳୟରେ ମୁକ୍ତିଲାଭ କରିଥିବା ଏହି ଫିଲ୍ମ ବକ୍ସ ଅଫିସରେ ରେକର୍ଡ ଭାଙ୍ଗୁଛି। 'ଗଦର ୨' ଅଷ୍ଟମ ଦିନରେ ବକ୍ସ ଅଫିସରେ ୧୯.୫ କୋଟି ରୋଜଗାର କରିଛି। ଏହା ସହିତ ମୋଟ ଉପରେ ଫିଲ୍ମ ୩୦୦ କୋଟିର ଅଙ୍କ ଅତିକ୍ରମ କରିଛି।
ଏହି ସମୟରେ, ସନି ଦେଓଲଙ୍କ ଏକ ଭିଡିଓ ଇଣ୍ଟରନେଟରେ ଖୁବ୍ ଭାଇରାଲ୍ ହେବାରେ ଲାଗିଛି। ଭାଇରାଲ୍ ହେଉଥିବା ଏହି ଭିଡିଓରେ 'ଗଦର'ର 'ତାରା ସିଂହଙ୍କୁ' ବିମାନବନ୍ଦରରେ ଦେଖିବାକୁ ମିଳିଛି। ତାଙ୍କର ଜଣେ ପ୍ରଶଂସକ ତାଙ୍କୁ 'ଗଦର ୨'ର ସଫଳତା ପାଇଁ ଅଭିନନ୍ଦନ ଜଣାଇବା ଏବଂ 'ଗଦର ୩' ବିଷୟରେ ପଚାରୁଥିବାର ନଜର ଆସିଛନ୍ତି, ଯେଉଁଥିରେ ସନି ଦେଓଲ କହିଛନ୍ତି ଯେ 'ଗଦର ୩' ଖୁବ୍ ଶୀଘ୍ର ଆସିବ।
Also Read
ଅଭିନେତାଙ୍କ ଏହି ଉତ୍ତର ପରେ 'ଗଦର ୩' କୁ ନେଇ ପ୍ରଶଂସକଙ୍କ ହୃଦୟ ଅସ୍ଥିର ହେବାରେ ଲାଗିଛି। 'ଗଦର ୨'ର ଭୂତ ଏପର୍ଯ୍ୟନ୍ତ ତାରା ସିଂହଙ୍କ ପ୍ରଶଂସକଙ୍କ ମୁଣ୍ଡରୁ ଓହ୍ଲାଇ ନଥିବା ବେଳେ 'ଗଦର ୩' ପ୍ରତି ସନିଙ୍କ ଇସାରା ତାଙ୍କ ପ୍ରଶଂସକଙ୍କୁ ଅଧିକ ଉତ୍ସାହିତ କରିଦେଇଛି।
ଅନିଲ ଶର୍ମାଙ୍କ ନିର୍ଦ୍ଦେଶିତ ‘ଗଦର ୨’ ରେ ସନି ଦେଓଲ, ଅମିଷା ପଟେଲ, ଉତ୍କର୍ଷ ଶର୍ମା, ମନୀଷ ବାଧୱା ମୁଖ୍ୟ ଭୂମିକାରେ ଅଭିନୟ କରିଥିବା ବେଳେ ସିମରତ କୌର୍, ଗୌରବ ଚୋପ୍ରା ଏବଂ ଲଭ ସିହ୍ନା ସହାୟକ ଭୂମିକାରେ ନଜର ଆସିଛନ୍ତି। ଏହି ଚଳଚ୍ଚିତ୍ରଟି ବକ୍ସ ଅଫିସରେ ଅକ୍ଷୟ କୁମାର, ପଙ୍କଜ ତ୍ରିପାଠୀ ଏବଂ ୟାମି ଗୌତମଙ୍କ 'ଓଏମ୍ଜି ୨' ସହିତ ସଂଘର୍ଷ କରୁଛି।
