LIVE TV
ଅଭିନେତ୍ରୀ ଅଙ୍କିତା ଲୋଖଣ୍ଡେଙ୍କର କୌଣସି ପରିଚୟର ଆବଶ୍ୟକତା ନାହିଁ। ହିଟ୍ ଟେଲିଭିଜନ ଶୋ 'ପବିତ୍ର ରିସ୍ତା' ରୁ ସେ ନିଜ ପାଇଁ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରି ପାରିଛନ୍ତି। ନିକଟରେ ତାଙ୍କୁ 'ବିଗ୍ ବସ୍ ୧୭' ରେ ମଧ୍ୟ ଦେଖିବାକୁ ମିଳିଥିଲା। ଏହି ଶୋ’ରେ ଦର୍ଶକ ତାଙ୍କୁ ବହୁତ ପସନ୍ଦ କରିଥିଲେ, କିନ୍ତୁ ଅଙ୍କିତାଙ୍କ ପାଇଁ ଏହି ଯାତ୍ରା ଆଦୌ ସହଜ ନ ଥିଲା। ନିକଟରେ ଏକ ସାକ୍ଷାତକାର ସମୟରେ ଅଙ୍କିତା ତାଙ୍କ ପୁରୁଣା ଦିନଗୁଡ଼ିକୁ ମନେପକାଇ ଭାବପ୍ରବଣ ହୋଇଥିବା ନଜର ଆସିଥିଲେ।
ଅଙ୍କିତା ଲୋଖଣ୍ଡେ ନିଜର ଅଭିନୟ ଦକ୍ଷତାରେ ଟେଲିଭିଜନ ଇଣ୍ଡଷ୍ଟ୍ରିରେ ନିଜର ନାମ ଅର୍ଜନ କରିଛନ୍ତି। ଆଜି ବି ଦର୍ଶକ ତାଙ୍କୁ ସିରିଏଲ 'ପବିତ୍ର ରିସ୍ତା'ର ‘ଅର୍ଚ୍ଚନା’ ବୋଲି ଡାକନ୍ତି। ନିକଟରେ ଏକ ସାକ୍ଷାତକାର ସମୟରେ ଅଙ୍କିତା କହିଛନ୍ତି, “ମୁଁ ଟେଲିଭିଜନ ଜଗତରେ କାମ କରିବାକୁ ଚାହୁଁ ନ ଥିଲି। ମୁଁ ଚଳଚ୍ଚିତ୍ରକୁ ଯିବାକୁ ଚାହୁଁଥିଲି। ମୁଁ ମଧ୍ୟ ଏକ ଚଳଚ୍ଚିତ୍ର ପାଇଁ ଅଡିସନ୍ ଦେଇଥିଲି ଏବଂ ମନୋନୀତ ହୋଇଥିଲି, କିନ୍ତୁ ଶେଷରେ କଥା ପକ୍କା ହେଉ ହେଉ ରହିଗଲା।”
Also Read
ଅଙ୍କିତା ଆହୁରି କହିଛନ୍ତି ଯେ “ଯେତେବେଳେ ମୁଁ ଫିଲ୍ମରେ ସାଇନ୍ କରିବାକୁ ହୋଟେଲରେ ପହଞ୍ଚିଥିଲି, ସେତେବେଳେ ଫିଲ୍ମର ନିର୍ମାତା ମୋତେ କହିଥିଲେ ଯେ ଯଦି ମୁଁ ଫିଲ୍ମରେ କାମ କରିବାକୁ ଚାହେଁ, ତେବେ ମୋତେ କିଛି ଆପୋଷ ବୁଝାମଣା କରିବାକୁ ପଡିବ। ମୁଁ ପଚାରିଲି ଆପଣ କେଉଁ ବୁଝାମଣା ବିଷୟରେ କହୁଛନ୍ତି। ତା’ପରେ ସେ କହିଲେ ଆପଣଙ୍କୁ ନିର୍ମାତାଙ୍କ ସହ ରାତି କାଟିବାକୁ ପଡ଼ିବ। ଏହା ମୋ ପାଇଁ ଅତ୍ୟନ୍ତ ଆଶ୍ଚର୍ଯ୍ୟଜନକ ବିଷୟ ଥିଲା।”
ପୁରୁଣା ଦିନଗୁଡ଼ିକୁ ମନେପକାଇ ଅଙ୍କିତା ପୁଣି କହିଛନ୍ତି ଯେ, “ମୋତେ ମାତ୍ର ୧୯ ବର୍ଷ ହୋଇଥିଲା ଏବଂ ମୁଁ କାମ ଚାହୁଁଥିଲି, କିନ୍ତୁ ମୁଁ ଚତୁରତାର ସହ କାମ କଲି। ମୁଁ ସେହି ନିର୍ମାତାକୁ ମନା କରି ସେଠାରୁ ଚାଲିଗଲି। ହଁ, ଯିବାବେଳେ ମୁଁ ଏହା କହିଥିଲି ଯେ ମୁଁ ସେହି ଝିଅମାନଙ୍କ ମଧ୍ୟରୁ ଜଣେ ନୁହେଁ, ଯେଉଁମାନେ କାମ ପାଇଁ ଆପୋଷ ବୁଝାମଣା କରିନେବେ। ଏହି ଘଟଣା ମୋତେ ବହୁତ ନିରାଶ କରିଥିଲା, କିନ୍ତୁ ମୁଁ ସାହସ ହରାଇ ନ ଥିଲି ଏବଂ କାମ ଉପରେ ଧ୍ୟାନ ଦେଇଥିଲି ଏବଂ ଆଜି ଫଳାଫଳ ସମସ୍ତଙ୍କ ସାମ୍ନାରେ। ଟେଲିଭିଜନ ମୋତେ ଏକ ଭିନ୍ନ ପରିଚୟ ଦେଇଛି।”
