ଆଉ ଥରେ ରିଲିଜ୍ ହେବ 'ଭାଗ୍‌ ମିଲ୍‌ଖା ଭାଗ୍‌'; ଜାଣନ୍ତୁ କେବେ

ଫରହାନ ଅଖତର ଏବଂ ସୋନମ କପୁରଙ୍କ ଅଭିନୀତ ଚଳଚ୍ଚିତ୍ର 'ଭାଗ୍‌ ମିଲ୍‌ଖା ଭାଗ୍‌' ମୁକ୍ତିଲାଭର ୧୦ ବର୍ଷ ପୂରଣ ହୋଇଛି। ୨୦୧୩ ମସିହାରେ ରିଲିଜ୍ ହୋଇଥିବା ଏହି ଚଳଚ୍ଚିତ୍ରଟି ମିଲ୍‌ଖା ସିଂହଙ୍କ ଜୀବନୀ ଉପରେ ଆଧାରିତ ଥିଲା ଏବଂ ଦର୍ଶକ ଏହାକୁ ବହୁତ ପସନ୍ଦ କରିଥିଲେ।

ବର୍ତ୍ତମାନ ଏହି ଚଳଚ୍ଚିତ୍ର ରିଲିଜ୍ ହେବାର ଏକ ଦଶନ୍ଧି ସମାପ୍ତ ହେବା ଅବସରରେ ଫିଲ୍ମ ନିର୍ମାତା ଦର୍ଶକଙ୍କୁ ଏକ ଚମତ୍କାର ଉପହାର ଦେଇଛନ୍ତି। ଫିଲ୍ମର ନିର୍ଦ୍ଦେଶକ ରାକେଶ ଓମପ୍ରକାଶ ମେହେରା ଫିଲ୍ମକୁ ପୁଣି ଥରେ ପ୍ରେକ୍ଷାଳୟରେ ମୁକ୍ତିଲାଭ କରିବାକୁ ଘୋଷଣା କରିଛନ୍ତି।

ଏକ ସାକ୍ଷାତକାରରେ ଫିଲ୍ମ ନିର୍ଦ୍ଦେଶକ କହିଛନ୍ତି ଯେ “ମିଲ୍‌ଖା ସିଂହ ଆଉ ଆମ ଗହଣରେ ନାହାଁନ୍ତି। ସେଥିପାଇଁ ଆମେ ପୁଣି ଥରେ ପ୍ରେକ୍ଷାଳୟରେ ଏହି ଚଳଚ୍ଚିତ୍ର ରିଲିଜ୍ କରି ତାଙ୍କୁ ଶ୍ରଦ୍ଧାଞ୍ଜଳି ଦେବାକୁ ଚାହୁଁଛୁ।” ରାକେଶ ଓମପ୍ରକାଶ ମେହେର କହିଛନ୍ତି, “ଆମେ ଫିଲ୍ମର କାଷ୍ଟ, କ୍ରୁ ଏବଂ ପୂରା ଟିମ୍ ପାଇଁ ଏକ ସ୍ୱତନ୍ତ୍ର ସ୍କ୍ରିନିଂ କରିବାକୁ ଯାଉଛୁ। ମିଲ୍‌ଖା ଜୀଙ୍କ ଝିଅ ମଧ୍ୟ ଆମ ସହିତ ଯୋଗଦେବେ ଏବଂ ତାଙ୍କ ପୁଅ ଯିଏ ବର୍ତ୍ତମାନ ଲଣ୍ଡନରେ ଅଛନ୍ତି ସେ ଯୋଗଦେବାକୁ ଯଥାସମ୍ଭବ ଚେଷ୍ଟା କରିବେ। ମୁଁ ଆପଣଙ୍କୁ କହିବି, ଫିଲ୍ମର ସ୍କ୍ରିନିଂ ୨୬ ଜୁଲାଇରେ ମୁମ୍ବାଇରେ ରଖାଯାଇଛି।

ଫିଲ୍ମର ସ୍ୱତନ୍ତ୍ର ସ୍କ୍ରିନିଂ ପରେ 'ଭାଗ୍‌ ମିଲ୍‌ଖା ଭାଗ୍‌' ଅଗଷ୍ଟ ୬ରେ ପ୍ରେକ୍ଷାଳୟରେ ମୁକ୍ତିଲାଭ କରିବ। ରାକେଶ ଆହୁରି କହିଛନ୍ତି ଯେ “ଏହି ଚଳଚ୍ଚିତ୍ର ରିଲିଜ ହେବା ପରଠାରୁ ଖୁବ ଲୋକପ୍ରିୟ ହୋଇପାରିଛି। ଏହି ଚଳଚ୍ଚିତ୍ରଟି ସମସ୍ତଙ୍କ ପାଇଁ ଏକ ଭିନ୍ନ ଅର୍ଥ ରଖେ। ଏହା ଅନେକଙ୍କ ପାଇଁ ପ୍ରେରଣାର ଉତ୍ସ ମଧ୍ୟ।”

ସେ ଆହୁରି ମଧ୍ୟ କହିଛନ୍ତି, “ଏହି ଚଳଚ୍ଚିତ୍ର କେବଳ କ୍ରୀଡ଼ାବିତ୍ କି ଜିମ୍ ଯାତ୍ରୀଙ୍କୁ ନୁହେଁ, ସମସ୍ତଙ୍କୁ ପ୍ରେରଣା ଦେଇଛି। ମୁଁ ଦୁନିଆର ଏପରି ଅନେକ ଲୋକଙ୍କୁ ଭେଟିଛି, ଯେଉଁମାନେ ଚଳଚ୍ଚିତ୍ର ଦ୍ୱାରା ଅନୁପ୍ରାଣିତ ହୋଇ ଜୀବନରେ କିଛି ହାସଲ କରିଛନ୍ତି। ବର୍ତ୍ତମାନ ଏହି ଚଳଚ୍ଚିତ୍ର ମୋର ନୁହେଁ ବରଂ ଦର୍ଶକଙ୍କର।”

ନିର୍ଦ୍ଦେଶକ ରାକେଶ ଓମପ୍ରକାଶ ମେହେରଙ୍କ ପାଇଁ ତଥା ଫିଲ୍ମର ଷ୍ଟାର୍‌ କାଷ୍ଟ ପାଇଁ ଏହା ଏକ ବିଶେଷ ଚଳଚ୍ଚିତ୍ର ଥିଲା। ଏହି ଚଳଚ୍ଚିତ୍ର ସହିତ ଜଡିତ ଅନେକ କାହାଣୀ ଅଛି, କିନ୍ତୁ ଗୋଟିଏ କାହାଣୀ ଯାହା ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା। ବାସ୍ତବରେ ଏହି ଚଳଚ୍ଚିତ୍ରର ସୁଟିଂ ପାଇଁ ଅଭିନେତ୍ରୀ ସୋନମ କପୁର ମାତ୍ର ୧୧ ଟଙ୍କା ନେଇଥିଲେ। ଚଳଚ୍ଚିତ୍ର ନିର୍ଦ୍ଦେଶକ ନିଜେ ତାଙ୍କ ପୁସ୍ତକରେ ଏହା ଉଲ୍ଲେଖ କରିଛନ୍ତି।