LIVE TV
ପ୍ରଶ୍ନପତ୍ରରେ ବଡ଼ ବିଭ୍ରାଟ ପରେ ଶେଷରେ ପରୀକ୍ଷା ବାତିଲ କଲେ ଓଡ଼ିଶା ଷ୍ଟାଫ୍ ସିଲେକ୍ସନ୍ କମିଶନ(OSSC)। ଗତକାଲି ନଗର ଉନ୍ନୟନ ବିଭାଗର ଜୁନିୟର ଆକାଉଣ୍ଟାଣ୍ଟ ପଦବି ପାଇଁ ପ୍ରିଲିମିନାରୀ ପରୀକ୍ଷା ପ୍ରଶ୍ନପତ୍ରରେ ସାଂଘାତିକ ତ୍ରୁଟି ଦେଖିବାକୁ ମିଳିଥିଲା । ପୁଣି କେବେ ପରୀକ୍ଷା ହେବେ ସେ ନେଇ ପରୀକ୍ଷାର୍ଥୀ ଚିନ୍ତାରେ ଥିବା ବେଳେ, କମିଶନଙ୍କ ଦାୟିତ୍ବହୀନତା ପାଇଁ ଏଭଳି ବିଭ୍ରାଟ ହୋଇଥିବା ଶିକ୍ଷାବିତ କହିଛନ୍ତି । ସେପଟେ କମିଶନ ଅଧ୍ୟକ୍ଷ କିନ୍ତୁ ପୁରା ଘଟଣାରେ ନିରବ।
ଓଡ଼ିଶା ଷ୍ଟାଫ୍ ସିଲେକସନ କମିଶନ(OSSC)ଙ୍କ ନୂଆ ଓଡ଼ିଆ ପ୍ରଶ୍ନପତ୍ର ଦେଖିଲେ ଆପଣଙ୍କ ମୁଣ୍ତ ବୁଲାଇଦେବ । ଏମିତିକି ପ୍ରଶ୍ନପତ୍ର ଦେଖି ପରୀକ୍ଷାର୍ଥୀଙ୍କ ମୁଣ୍ତ ବୁଲାଇ ଦେଉଛି । ଗତ କାଲି ନଗର ଉନ୍ନୟନ ବିଭାଗର ଜୁନିୟର ଆକାଉଣ୍ଟାଣ୍ଟ ପଦବି ପାଇଁ ପରୀକ୍ଷା ହୋଇଥିଲା । ଯାହାକି ଷ୍ଟାଫ ସିଲେକ୍ସନ କମିଶନଙ୍କ ଜରିଆରେ ୬୬ଟି ପଦବି ପାଇଁ କରାଯାଇଥିଲା । ହେଲେ ପ୍ରଶ୍ନ ପତ୍ରରେ ଏଭଳି ସାଂଘାତିକ ଓଡ଼ିଆ ଦେଖି ପରୀକ୍ଷାର୍ଥୀ ତାଜୁବ। ଉତ୍ତର ଲେଖିବା ତ ଦୂରର କଥା ପ୍ରଶ୍ନ କ’ଣ ଆସିଛି ତାହା ବୁଝିବାକୁ ଦୁଇଘଣ୍ଟା ଚାଲିଗଲା।
Also Read
ଏଭଳି ତ୍ରୁଟିର ଶିକାର ହୋଇଥିବା ପରୀକ୍ଷାର୍ଥୀ ଷ୍ଟାଫ ସିଲେକ୍ସନ କମିଶନଙ୍କୁ ଜଣାଇବା ପାଇଁ ଯାଇଥିଲେ । ଦାବି କରିଥିଲେ ଭବିଷ୍ୟତରେ ଏଭଳି ସମସ୍ୟା ଏଡାଇବା ପାଇଁ କମିଶନ୍, ଓଡିଆ ଇଂରାଜୀ ଅଲଗା ଅଲଗା ବଦଳରେ ଗୋଟିଏ ପ୍ରଶ୍ନପତ୍ରରେ ଉଭୟ ଭାଷାରେ ପ୍ରଶ୍ନ ପ୍ରସ୍ତୁତ କରନ୍ତୁ ।
ସେପଟେ ତ୍ରୁଟିଯୁକ୍ତ ପ୍ରଶ୍ନପତ୍ର ପାଇଁ ଗତକାଲି ହୋଇଥିବା ପ୍ରିଲିମିନାରୀ ପରୀକ୍ଷାକୁ ବାତିଲ କରିଛନ୍ତି କର୍ତ୍ତୃପକ୍ଷ। ପରବର୍ତ୍ତୀ ସମୟର ପରୀକ୍ଷା ପାଇଁ ତାରିଖ ଘୋଷଣା ହେବ । ବଡ଼ ପ୍ରଶ୍ନ ହେଲା, ବର୍ଷ ବର୍ଷ ଧରି ଚାକିରି ଆଶାରେ ବସିଥିବା ଛାତ୍ରଛାତ୍ରୀଙ୍କ ଭବିଷ୍ୟତ ସହ ଏ ଖେଳ କାହିଁକି? କିଏ ଏଥି ପାଇଁ ଦାୟୀ ? ପରୀକ୍ଷା କେନ୍ଦ୍ରକୁ ପ୍ରଶ୍ନପତ୍ର ଯିବା ପୂର୍ବରୁ ଯାଞ୍ଚ ହେଉ ନାହିଁ କି ? ଅଧିକାରୀଙ୍କ ଅବହେଳା ପାଇଁ କାହିଁକି ଦଣ୍ଡ ପାଇବେ ପରୀକ୍ଷାର୍ଥୀ ? ଏ ସଂପର୍କରେ କିନ୍ତୁ ଚୁପ୍ ଷ୍ଟାଫ୍ ସିଲେକସନ କମିଶନ୍ କର୍ତ୍ତୃପକ୍ଷ । ଏମିତି ପ୍ରତିକ୍ରିୟା ପାଇଁ ପଚାରିବାରୁ କାର କାଚ ମଧ୍ୟ ଖୋଲିନଥିଲେ କମିଶନ ଅଧ୍ୟକ୍ଷ।
- Reported by:
- GAUTAM PANDA , SOUMYA RANJAN SAHOO
