LIVE TV
ବୋର୍ଡ ପରୀକ୍ଷାରେ ଆସିପାରେ ସଂସ୍କାର । ମାଟ୍ରିକ କି ପ୍ଲସ ଟୁ ବୋର୍ଡ ବଦଳରେ ନବମରୁ ଯୁକ୍ତ ଦୁଇ ଯାଏ ସେମିଷ୍ଟର ପରୀକ୍ଷା କରିବାକୁ ଯୋଜନା । ନାସନାଲ୍ ଏଜୁକେଶନ କରିକୁଲମ୍ ଫ୍ରେମ୍ ୱର୍କ୍ ପକ୍ଷରୁ ଏନେଇ ଡ୍ରାଫ୍ଟ ପଲିସି କରାଯାଇଛି । ତେବେ ବିଭିନ୍ନ ବର୍ଗରୁ ମତା ମତ ଆସିବା ପରେ NCERT ଚୂଡାନ୍ତ ନିଷ୍ପତ୍ତି ନେବ ।
ପିଲାଙ୍କ ଉପରୁ ହଟିବ ଚାପ। ପରୀକ୍ଷା ହେବ ସରଳ। ସେମିଷ୍ଟର ଆକାରରେ ପିଲେ ଦେବେ ବୋର୍ଡ ପରୀକ୍ଷା। ଉଭୟ ଦଶମ ଓ ଦ୍ବାଦଶ ବୋର୍ଡରେ ଆସିପାରେ ଏଭଳି ସଂସ୍କାର । ନୂଆ ଜାତୀୟ ଶିକ୍ଷା କରିକୁଲମ୍ ଫ୍ରେମୱାର୍କ ପକ୍ଷରୁ ଏନେଇ ଡ୍ରାଫ୍ଟ ପଲିସି ପ୍ରସ୍ତୁତ ହୋଇଛି । ଏଭଳି ହେଲେ ମାଟ୍ରିକ୍ ବୋର୍ଡ ପରୀକ୍ଷା ଭଳି ଗୋଟିଏ ପରୀକ୍ଷା ନରହିପାରେ । ନବମରୁ ଯୁକ୍ତ ଦୁଇ ପର୍ଯ୍ୟନ୍ତ ପରୀକ୍ଷା ବ୍ୟବସ୍ଥାରେ ବ୍ୟାପକ ପରିବର୍ତ୍ତନ ପାଇଁ ପ୍ରସ୍ତାବ ଦିଆଯାଇଛି ।
ପ୍ରସ୍ତାବ ଅନୁସାରେ ନବମରୁ ଦ୍ୱାଦଶ ଶ୍ରେଣୀ ଯାଏଁ ୮ଟି ସେମିଷ୍ଟାର ପରୀକ୍ଷା ହେବ, କିମ୍ବା ୮ଟି ବୋର୍ଡ ପରୀକ୍ଷା ହେବ । ଅର୍ଥାତ୍ ନବମରୁ ଦ୍ୱାଦଶ ଯାଏଁ ପ୍ରତ୍ୟେକ ଶ୍ରେଣୀରେ ଛାତ୍ରଛାତ୍ରୀଙ୍କୁ ୨ଟି ପରୀକ୍ଷା ଦେବାକୁ ହେବ । ନୂଆ ଜାତୀୟ ଶିକ୍ଷା କରିକୁଲମ୍ ଫ୍ରେମୱାର୍କ ପ୍ରସ୍ତାବ ଅନୁସାରେ ଯଦି ଗୋଟିଏ ସେମିଷ୍ଟାର ବା ବୋର୍ଡ ପରୀକ୍ଷାରେ ଛାତ୍ରଛାତ୍ରୀ ଖରାପ କରନ୍ତି, ତେବେ ତାକୁ ସୁଧାରିବା ପାଇଁ ଆଗାମୀ ସେମିଷ୍ଟର ପରୀକ୍ଷାରେ ସୁଯୋଗ ରହିବ । କିନ୍ତୁ ଉଭୟ ସେମିଷ୍ଟରର ନମ୍ବରକୁ ମିଶାଇ ଚୁଡାନ୍ତ ଫଳ ପ୍ରକାଶ କରାଯିବ ।
Also Read
ଜାତୀୟ ଶିକ୍ଷା ନୀତି ୨୦୨୦କୁ ଦୃଷ୍ଟିରେ ଚିଠା ପ୍ରସ୍ତାବରେ ଉଲ୍ଲେଖ ରହିଛି ଯେ, କଳା, ବାଣିଜ୍ୟ ଓ ବିଜ୍ଞାନ ଭଳି ପାଠ୍ୟକ୍ରମ ନିର୍ଦ୍ଦିଷ୍ଟ ବିଷୟରେ ସୀମିତ ରହିବ ନାହିଁ । ଛାତ୍ରଛାତ୍ରୀ ୩ଟି ଷ୍ଟ୍ରିମ ର ଯେକୌଣସି ବିଷୟ ପଢିପାରିବେ । ଏହି ପ୍ରସ୍ତାବକୁ କେନ୍ଦ୍ର ସରକାରଙ୍କ ଦ୍ୱାରା ନିଯୁକ୍ତ ନାସନାଲ ଷ୍ଟିୟରିଂ କମିଟି ପ୍ରସ୍ତୁତ କରିଛି । ଏହାର ମୁଖ୍ୟ ଅଛନ୍ତି ଇଣ୍ଡିଆନ୍ ସ୍ପେଶ୍ ରିସର୍ଚ୍ଚ ଅର୍ଗାନାଇଜେସନ- ଇସ୍ରୋର ପୂର୍ବତନ ମୁଖ୍ୟ କେ. କସ୍ତୁରୀରଙ୍ଗନ ।
ଚିଠା ପ୍ରସ୍ତାବ ଜାରି କରି NCERT ଛାତ୍ରଛାତ୍ରୀ, ଶିକ୍ଷକ, ଅଭିଭାବକ ଓ ବୁଦ୍ଧିଜୀବୀଙ୍କ ପରାମର୍ଶ ଲୋଡିଛି । ରାଜ୍ୟ ସରକାରମାନେ ଏଦିଗରେ ମଧ୍ୟ ମତାମତ ରଖିବେ । ବୋର୍ଡ ପରୀକ୍ଷାର ଚାପ କମ୍ କରିବା ପାଇଁ ଆସିଥିବା ଏହି ପ୍ରସ୍ତାବ କେତେ ଶୀଘ୍ର ଲାଗୁ ହେଉଛି ତା ଉପରେ ନଜର ।
ବାଲେଶ୍ୱରରୁ ରଶ୍ମିରଞ୍ଜନ ଦାସ ଓ ଭୁବନେଶ୍ୱରରୁ ଜଗଦୀଶ ଦାସଙ୍କ ରିପୋର୍ଟ, ଓଟିଭି
