ବିଶ୍ୱର ୧୫୦ ଶ୍ରେଷ୍ଠ ବିଶ୍ୱବିଦ୍ୟାଳୟ ମଧ୍ୟରେ IIT ବମ୍ବେ, କେତେ ତମ ସ୍ଥାନରେ IIT ଭୁବନେଶ୍ୱର ?

ଶିକ୍ଷା କ୍ଷେତ୍ରରେ ଅନେକ କିର୍ତ୍ତୀମାନ ସୃଷ୍ଟି କରିଥିବା ଆଇଆଇଟି ବମ୍ବେକୁ ଆଉ ଏକ ସଫଳତା । ବିଶ୍ୱର ୧୫୦ଟି ଶ୍ରେଷ୍ଠ ବିଶ୍ୱ ବିଦ୍ୟାଳୟ ମଧ୍ୟରେ ସ୍ଥାନ ପାଇଛି ଆଇଆଇଟି ବମ୍ବେ । ଚଳିତବର୍ଷ ବିଶ୍ୱର ୨୯୦୦ ବିଶ୍ୱ ବିଦ୍ୟାଳୟର ପ୍ରଦର୍ଶନକୁ ବିଚାରକୁ ନିଆଯାଇଥିଲା। ତାଲିକାରେ ଏବର୍ଷ ୪୫ଟି ଭାରତୀୟ ବିଶ୍ୱ ବିଦ୍ୟାଳୟ ସ୍ଥାନ ପାଇଛନ୍ତି ।

ସେମାନଙ୍କ ମଧ୍ୟରେ ଆଇଆଇଟି ବମ୍ବେ ସବୁଠାରୁ ଉପରେ ୧୪୯ତମ ସ୍ଥାନରେ ରହିଛି । ଗତ ବର୍ଷ ଆଇଆଇଟି ବମ୍ବେର ରାଙ୍କିଙ୍ଗ୍ ୧୭୭ତମ ସ୍ଥାନରେ ରହିଥିଲା । ଚଳିତବର୍ଷ ଏହା ୨୬ଟି ସ୍ଥାନ ଉପରକୁ ଉଠିଛି । ଭୁବନେଶ୍ୱର ଆଇଆଇଟି ୫୭୧ତମ ରାଙ୍କରେ ରହିଛି । QSର ପ୍ରତିଷ୍ଠାତା ତଥା ସିଇଓ ନୁନଜିଓ କ୍ୱାକକୁରେଲି ବିଶ୍ୱର ଶ୍ରେଷ୍ଠବିଶ୍ୱ ବିଦ୍ୟାଳୟ ମାନଙ୍କ ତାଲିକା ଘୋଷଣା କରିଛନ୍ତି ।

ଆମେରିକାର ମାସାଚୁସେଟସ୍ ଇନଷ୍ଟିଚ୍ୟୁଟ୍ ଅଫ୍ ଟେକନୋଲୋଜି ବିଶ୍ୱର ସବୁଠାରୁ ଶ୍ରେଷ୍ଠ ବିଶ୍ୱବିଦ୍ୟାଳୟର ମାନ୍ୟତା ପାଇଛି । ଗତ ୧୨ ବର୍ଷ ଧରି ଏମଆଇଟି ଶୀର୍ଷରେ ରହି ଆସୁଛି । ୟୁକେର କେମ୍ବ୍ରିଜ୍ ୟୁନିଭର୍ସିଟି ଦ୍ୱିତୀୟ ଓ ଅକ୍ସଫୋର୍ଡ ୟୁନିଭର୍ସିଟି ତୃତୀୟ ସ୍ଥାନରେ ରହିଛନ୍ତି। ସିଙ୍ଗାପୁରର ନ୍ୟାସନାଲ ୟୁନିଭର୍ସିଟି ପ୍ରଥମ ଥର ପାଇଁ ଏସୀୟ ବିଶ୍ୱ ବିଦ୍ୟାଳୟ ଭାବେ ଶ୍ରେଷ୍ଠ ୧୦ଟି ବିଶ୍ୱ ବିଦ୍ୟାଳୟ ତାଲିକାରେ ରହିଛି ।

ଗତ ୨୦ବର୍ଷ ଧରି QS ୟୁନିଭର୍ସିଟି ରାଙ୍କିଙ୍ଗ୍ ପ୍ରକାଶ ପାଇ ଆସୁଛି। ଏଥିପାଇଁ ନିରନ୍ତର ପ୍ରଗତି, ନିଯୁକ୍ତି ସୁଯୋଗ ଓ ଆନ୍ତର୍ଜାତିକ ସନ୍ଦର୍ଭ ଉପରେ ଗୁରୁତ୍ବ ଦିଆଯାଇଥିଲା । ...