ଛାତ୍ରଛାତ୍ରୀଙ୍କ ଅସୁରକ୍ଷିତ ପଥ ! ସ୍କୁଲ ଯିବା ଲାଗି ଲୁହା ପ୍ଲେଟ୍ ହିଁ ଭରସା

ପାଠ ପଢିବା ପାଇଁ ବିପଦ ଶଙ୍କୁଳ ଅସ୍ଥାୟୀ ଲୁହା ପ୍ଲେଟ ଉପରେ ସ୍କୁଲ ଯାଉଛନ୍ତି କୋମଳମତି ଶିଶୁ । ଏଭଳି ଦେଖିବାକୁ ମିଳିଛି ଖୋଦ କଟକର ୨୨ ନମ୍ବର ୱାର୍ଡ଼ରେ ଥିବା ମେରିଆ ବଜାର ୟୁପି ସ୍କୁଲ ନିକଟରେ । ସିଏମସି ପକ୍ଷରୁ ଡ୍ରେନ୍ ନିର୍ମାଣ କାମ ଚାଲିଥିବାରୁ ସ୍କୁଲ ପରିସରରେ ଦେଖାଦେଇଛି ବିଭିନ୍ନ ସମସ୍ୟା । 

ସ୍କୁଲ ପରିସରକୁ ଯିବା ଲାଗି ଏହି ଲୁହା ପ୍ଲେଟ ହିଁ ଭରସା । ଡ୍ରେନ ଉପରେ ପଡିଥିବା ଲୁହା ପ୍ଲେଟ ହିଁ ପାଲିଟିଛି ଦୈନିକ ସ୍କୁଲ ପଥ । ପିଲାଙ୍କ କଥା ଛାଡନ୍ତୁ, 

ଶିକ୍ଷୟିତ୍ରୀ ବି ଭୟଭୀତ ହୋଇ ହାତ ଧରାଧରି ହୋଇ ଲୁହା ପ୍ଲେଟ ପାରିହେଉଛନ୍ତି । ଏହା କୌଣସି ଉପାନ୍ତ ଅଞ୍ଚଳର ଦୃଶ୍ୟ ନୁହେଁ, ଖୋଦ କଟକ ୨୨ ନମ୍ବର ୱାର୍ଡ ମେରିଆବଜାର ପ୍ରାଥମିକ ସ୍କୁଲ ନିକଟର ଦୃଶ୍ୟ ।

ସିଏମସି ପକ୍ଷରୁ ଏଠାରେ ନିର୍ମାଣ ହେଉଥିବା ବକ୍ସ ଡ୍ରେନ ଯୋଗୁଁ ଏଭଳି ଅବସ୍ଥା ସୃଷ୍ଟି ହୋଇଛି। ପରିସ୍ଥିତି ଏମିତି ହୋଇଛି, ପିଲାଙ୍କ ଜୀବନ ପ୍ରତି ବିପଦ ଆଶଙ୍କା କରି କିଛି ଅଭିଭାବକ ପିଲାଙ୍କୁ ଆଉ ସ୍କୁଲକୁ ଛାଡୁନାହାନ୍ତି । ସ୍କୁଲରେ ଦୁଇଟି ରୁମ ଥିବା ବେଳେ ଗୋଟିଏ ରୁମ ଡ୍ରେନ କାମ ଯୋଗୁଁ ଫାଟିଯାଇଛି । ଫଳରେ 
ଗୋଟିଏ ରୁମରେ ଚାଲୁଛି କ୍ଲାସ । ଖାଲି ସେତିକି ନୁହେଁ, ସ୍କୁଲକୁ ବିଦ୍ୟୁତ ଲାଇନ୍ ଓ ପାଣି ମଧ୍ୟ କାମ ଯୋଗୁଁ କାଟି ଦିଆଯାଇଛି । ଲାଟ୍ରିନ୍ ମଧ୍ୟ ଭାଙ୍ଗିଯାଇଛି । ଫଳରେ ଛାତ୍ରଛାତ୍ରୀଙ୍କଠାରୁ ଶିକ୍ଷକଶିକ୍ଷୟିତ୍ରୀ ନାନା ଅସୁବିଧାରେ ସମ୍ମୁଖୀନ ହୋଇଛନ୍ତି । ଆସନ୍ତା ୨୧ ତାରିଖରେ ପରୀକ୍ଷା ଥିବାରୁ ସମସ୍ତଙ୍କର ଟେନସନ ବଢିଛି।

ସ୍କୁଲ ନିକଟରେ ୧୦ ଦିନରୁ ଅଧିକ ହେଲାଣି ବକ୍ସ ଡ୍ରେନ୍ କାମ କରାଯାଉଛି । ବାରପଥର ନିକଟରୁ ନୂଆବଜାର ପର୍ଯ୍ୟନ୍ତ ବକ୍ସ ଡ୍ରେନ ନିର୍ମାଣ କରାଯାଉଛି। ପୂର୍ବରୁ ଜାଇକା ଏହି କାମ କରୁଥିବା ବେଳେ ଏଵେ ଆଉ ଏକ ଠିକା ସଂସ୍ଥା ଏହି କାମ କରୁଛି । ତେବେ କୌଣସି ବିକଳ୍ପ ବ୍ୟବସ୍ଥା ନକରି ବିପଦ ମୁହଁକୁ କୁନିକୁନି ପିଲାଙ୍କ ଜୀବନ ଠେଲିଦେବାକୁ ନେଇ ପ୍ରତିକ୍ରିୟା ପ୍ରକାଶ ପାଇଛି ।

ଏପଟେ କଟକ ମେୟର ସୁବାସ ସିଂହ କହିଛନ୍ତି, ସ୍କୁଲଟିକୁ କିଛି ଦିନ ପାଇଁ ସ୍ଥାନୀୟ ଏକ ସ୍କୁଲକୁ ସିଫ୍ଟ କରାଯାଇ ସେଠାରେ ପାଠପଢା ପାଇଁ ବ୍ୟବସ୍ଥା କରାଯିବ। ଏନେଇ ଡିଇଓଙ୍କ ସହ ଆଲୋଚନା କରି ତୁରନ୍ତ ପଦକ୍ଷେପ ନିଆଯିବ।