ନିବୁଜ ଘରୁ ମହିଳା ଉଦ୍ଧାର, ପାଞ୍ଚବର୍ଷ ଧରି ଶବ ସହ ଥିଲେ ବନ୍ଦ...ପୋଲିସ ଦେଖି ହେଲା ଆଶ୍ଚର୍ଯ୍ୟ  

ମୃତଦେହ ସହ ୫ ବର୍ଷ । ଆଶ୍ଚର୍ଯ୍ୟ କଲେ ବି ଏହା ସତ୍ୟ ଘଟଣା । ଅଷ୍ଟ୍ରେଲିଆରୁ ଏହି ଆଶ୍ଚର୍ଯ୍ୟଜନକ ଖବର ଆସିଛି । ଏଠାରେ ଜଣେ ମହିଳା ଗତ ପାଞ୍ଚ ବର୍ଷ ଧରି ନିଜ ଭାଇର ମୃତଦେହ ସହିତ ରହୁଥିଲେ ଓ ଏ ବିଷୟରେ କାହାରି ପାଖରେ ସୂଚନା ମଧ୍ୟ ନଥିଲା । ଯେତେବେଳେ ପୋଲିସ ଘରର କବାଟ ଭାଙ୍ଗିଲା, ଭିତର ଦୃଶ୍ୟ ଦେଖି ସେମାନେ ଆଶ୍ଚର୍ଯ୍ୟ ହୋଇଗଲେ । ଅଧିକାରୀମାନେ ମହିଳାଙ୍କ ଘରକୁ ଅଳିଆ ଆବର୍ଜନାରେ ପରିପୂର୍ଣ୍ଣ ଓ ଘର ସାରା ମୂଷା ପରିପୂର୍ଣ୍ଣ ଥିବା ଦେଖିବାକୁ ପାଇଥିଲେ ।
 

ଏହି ହୃଦୟ ବିଦାରକ ଘଟଣା ଭିକ୍ଟୋରିଆ ଷ୍ଟେଟ୍‌ର ଏକ ପୋସ୍ ଅଞ୍ଚଳ ରସେଲ୍ ଷ୍ଟ୍ରିଟ୍‌ରେ ଘଟିଛି । ମହିଳା ଜଣଙ୍କୁ ମାନସିକ ରୋଗୀ ବୋଲି କୁହାଯାଉଛି । ତେବେ ଘର ଭିତରେ ଅଳିଆ ଗଦା ମଧ୍ୟରେ ରକ୍ତରେ ଭିଜାଯାଇଥିବା ଜଣେ ପୁରୁଷ କଙ୍କାଳ ମିଳିବା ପରେ ମହିଳାଙ୍କୁ ଗିରଫ କରାଯାଇଥିଲା । କୁହାଯାଉଛି ଯେ ମହିଳାଙ୍କ ଭାଇ ବହୁ ବର୍ଷ ପୂର୍ବେ ନିଖୋଜ ହୋଇଯାଇଥିଲେ ।

ଭିକ୍ଟୋରିଆ ପୋଲିସ କହିଛି ଯେ ଯେତେବେଳେ ସେମାନେ ଯାଞ୍ଚ ପାଇଁ ମହିଳାଙ୍କ ଘରେ ପହଞ୍ଚିଥିଲେ ସେତେବେଳେ ସେ କବାଟ ଖୋଲିବାକୁ ମନା କରିଦେଇଥିଲେ । କିନ୍ତୁ ସନ୍ଦେହରେ ଯେତେବେଳେ ଅଧିକାରୀମାନେ ଜବରଦସ୍ତ ଘରେ ପ୍ରବେଶ କଲେ, ସେମାନେ ଭିତରର ଦୃଶ୍ୟ ଦେଖି ଆଶ୍ଚର୍ଯ୍ୟ ହୋଇଗଲେ । ଜଣେ ପୁରୁଷ କଙ୍କାଳ ବ୍ୟତୀତ ଅଧିକାରୀମାନେ ଚଟାଣରୁ ଛାତ ପର୍ଯ୍ୟନ୍ତ ଗଦା ଗଦା ଆବର୍ଜନା ପାଇଥିଲେ । ଏହା ବ୍ୟତୀତ ପଚା ଗନ୍ଧ ସହ ମୂଷା ସବୁଆଡ଼େ ଚାଲୁଥିଲେ ।

 ଏକ ରିପୋର୍ଟ ଅନୁଯାୟୀ, ମହିଳାଙ୍କ ବିରୋଧରେ ପଡ଼ୋଶୀମାନଙ୍କ ଠାରୁ ଅନେକ ଅଭିଯୋଗ ଆସିଥିଲା, ଯାହା ପରେ ଭିକ୍ଟୋରିଆ ପୋଲିସ ୨୮ ଡିସେମ୍ବର ୨୦୨୨ରେ ରାତି ପ୍ରାୟ ୬ଟା ସମୟରେ ଯାଞ୍ଚ ପାଇଁ ରସେଲ୍‌ ଛକରେ ପହଞ୍ଚିଥିଲା । ପୋଲିସ ମୁଖପାତ୍ର କହିଛନ୍ତି ଯେ ମହିଳାଙ୍କ ଘରୁ ଉଦ୍ଧାର ହୋଇଥିବା ମୃତ ଦେହ ତାଙ୍କ ଭାଇର । ଏହା ପରେ ତାଙ୍କୁ ଗିରଫ କରାଯାଇଥିଲା ।

 ରସେଲ ଷ୍ଟ୍ରିଟ୍‌ର ବାସିନ୍ଦା ଏହାକୁ ଭୟଙ୍କର ଘର ବୋଲି କହିଛନ୍ତି । ମହିଳାଙ୍କ ପଡୋଶୀ ନିକୋଲ୍‌ ଷ୍ଟାଟନ୍ କହିଛନ୍ତି ଯେ ଅଳିଆ ଗଦା ହେତୁ ବୋଧହୁଏ ତାଙ୍କ ଭାଇଙ୍କ ମୃତ ଦେହର ଗନ୍ଧ ଜଣା ପଡୁ ନଥିଲା ।  ନିକୋଲ କହିଛନ୍ତି, ଘରୁ ଏକ ଦୁର୍ଗନ୍ଧ ଆସୁଥିଲା କିନ୍ତୁ ଆମେ ଭାବୁଥିଲୁ ଏହା ଏକ ଅଳିଆ ଆବର୍ଜନାର ଗନ୍ଧ ବୋଲି । କିନ୍ତୁ ସେ ଜାଣି ନଥିଲେ ଯେ ସେ ବର୍ଷ ବର୍ଷ ଧରି ଏକ ମୃତ ଶରୀର ସହିତ ରହୁଥିଲେ ।

ଅନ୍ୟ ଜଣେ ପଡ଼ୋଶୀ କହିଛନ୍ତି ଯେ ମହିଳାଙ୍କ ବିରୋଧରେ ଅନେକ ଥର ଅଭିଯୋଗ କରାଯାଇଥିଲା । କିନ୍ତୁ ଯେତେବେଳେ ବି ଗୃହ କର୍ମଚାରୀମାନେ ଯାଞ୍ଚ କରିବାକୁ ଆସନ୍ତି, ସେ କବାଟ ଖୋଲନ୍ତି ନାହିଁ । ଅନ୍ୟ ଜଣେ ବାସିନ୍ଦା ଏହି ପ୍ରସଙ୍ଗରେ କର୍ତ୍ତୃପକ୍ଷଙ୍କ ଉଦାସୀନ ମନୋଭାବକୁ ନେଇ ଅଭିଯୋଗ କରିଛନ୍ତି । ଅଭିଯୋଗ ପରେ ମହିଳାଙ୍କ ବିରୋଧରେ ଏକ ବର୍ଷ ପର୍ଯ୍ୟନ୍ତ କୌଣସି ତଦନ୍ତ କରାଯାଇ ନଥିଲା ବୋଲି ସେ କହିଛନ୍ତି । ଯଦି କର୍ତ୍ତୃପକ୍ଷ ତତ୍ପରତା ଦେଖାଇଥାନ୍ତେ, ବୋଧହୁଏ ଏହା ପୂର୍ବରୁ ଘଟଣା ବିଷୟରେ ଜଣା ପଡ଼ିଯାଇଥାନ୍ତା ।