ମାଫିଆଙ୍କ ଉତ୍ପାତ; ଖୋଳ କରିଦେଲେଣି କଳାପଥର, ବାଲି ଓ ମାଟି

ପାହାଡରୁ କଳାପଥର ଲୁଟ । ଖାଦାନରୁ ମାଙ୍କଡା ପଥର ଲୁଟ ଏବଂ ନଦୀରୁ ବାଲି ଏବଂ ନଦୀ ପଠାରୁ ମାଟି ଲୁଟ । ଏଭଳି ମାଫିଆଙ୍କ ଭୁସ୍ୱର୍ଗ ପାଲିଟିଛି ଯାଜପୁର ଜିଲ୍ଲା । ଯେଉଁଠି ଯେଉଁ ଭଳି ପ୍ରାକୃତିକ ସମ୍ପତି ଦେଖୁଛନ୍ତି ମାଫିଆ ପୈତୃକ ସମ୍ପତି ଭାବି ମନଇଚ୍ଛା ଲୁଟ କରୁଛନ୍ତି । ରାଜସ୍ୱ ଓ ଜଙ୍ଗଲ ଜମିରେ ବେଆଇନ ଗଛ କଟା ସହ କେଉଁଠି ପାହାଡ ଲଣ୍ଡା ହୋଇସାରିଲାଣି ତ ଆଉ କେଉଁଠି ସମତଳ ଜମିରେ ମାଙ୍କଡା ପଥର ଖାଦାନ ପୋଖରୀ ପାଲଟିଲାଣି।

ବେଆଇନ ବାଲି ଉଠାଣ କାରଣରୁ ନଦୀ ଗଭୀର ହୋଇ ହ୍ରଦ ପାଲଟି ଯାଉଥିବା ବେଳେ ଇଟା ଭାଟି ମାଟି ମାଫିଆ ନଦୀ ବନ୍ଧକୁ ଖୋଳି ଗଲେଣି । ବିକାଶ ନାମରେ ଜିଲ୍ଲାରେ ଦିନକୁ କୋଟି କୋଟି ଟଙ୍କାର ଲୁଟ ହେଉଥିଲେ ବି ରାଜ୍ୟସ୍ୱ ବିଭାଗ ଚେଇଁ ଶୋଇଥିବା ଅଭିଯୋଗ ହୋଇଛି।

ବିକାଶ ଓ ରାଜସ୍ୱ ଆଳରେ ସରକାରୀ ପ୍ରୋତ୍ସାହନରେ ଚାଲୁଥିବା ଖଣି ଖାଦାନ ବାଲି ମାଟିର ଅହେତୁକ ବ୍ୟବହାର ବୃଦ୍ଧି ହେଉଥିବା ବେଳେ ପ୍ରଶାସନ ଯାହା ରାଜସ୍ୱ ପାଉଛି, ତାର ଢେରଗୁଣ ଅର୍ଥ ଲୁଟୁଛନ୍ତି ମାଫିଆ । କେଉଁଠାରେ ତହସିଲରୁ ଖନନ ସୀକୃତି ପାଇବା ପରେ ଡିମାର୍କେସନ ଏରିଆ ବାହାରୁ ଖୋଳାଯାଉଛି ତ ଆଉ କେଉଁଠି ଦିନ ରାତି ଖୋଳି ତାଡି ମାଲାମାଲ ହେଉଛନ୍ତି ମାଫିଆ ।

ଜିଲ୍ଲାରେ କେତେ ଲଘୁ ଖଣିଜ ଅଞ୍ଚଳ ଖୋଳିବାକୁ ଅନୁମତି ମିଳିଛି ଆଉ କେତେ ଖୋଳାଯାଉଛି ସେନେଇ ପ୍ରଶାସନ ବି ତଦାରଖ କରୁନଥିବା ମନେ ହେଉଛି । ସେପଟେ ଏହିସବୁ ରୋକିବା ଲାଗି ତହସିଲଦାର ଓ ପୋଲିସକୁ ନିର୍ଦ୍ଦେଶ ଦିଆଯାଇଥିବା କହିଛନ୍ତି ଜିଲ୍ଲାପାଳ ଚକ୍ରବର୍ତ୍ତି ସିଂହ ରାଠୋର ।

ମାଫିଆଙ୍କୁ ମାଫ କରୁଛି ପ୍ରଶାସନ । ରାଜସ୍ୱ ନାମରେ ପ୍ରଶାସନ ପ୍ରାକୃତିକ ସମ୍ପତିକୁ ମାଫିଆଙ୍କ ହାତକୁ ଟେକି ଦେଇ ନୀରବ ଦ୍ରଷ୍ଟା ସାଜିଥିବାରୁ ମାଫିଆ ଆତଙ୍କରାଜ କରୁଛନ୍ତି । ତେବେ କେତେ କାର୍ଯ୍ୟାନୁଷ୍ଠାନ ହେଉଛି ତାହା ସମୟ କହିବ।

ରିପୋର୍ଟର- ଗୁଲାମ ଗସ, ସଂଜୀବ୍ ନାୟକ