Disha Patani Residence Firing: ଦିଶା ପଟାନୀଙ୍କ ଘରକୁ ଗୁଳିମାଡ଼ ଘଟଣା: ପୋଲିସ ଏନକାଉଣ୍ଟରରେ ପଞ୍ଚମ ଅଭିଯୁକ୍ତ ଆହତ

ଦିଶା ପଟାନୀଙ୍କ ଘରେ ଗୁଳିକାଣ୍ଡ ଘଟଣାରେ ବରେଲି ପୋଲିସ ପଞ୍ଚମ ଅଭିଯୁକ୍ତ ରାମନିବାସ ଓରଫ ଦୀପୁକୁ ଏନକାଉଣ୍ଟର କରି ଗିରଫ କରିଛି। ଗୁଳିକାଣ୍ଡରେ ୧୯ ବର୍ଷୀୟ ରାମନିବାସ ଆହତ ହୋଇଛି। ସେ ରାଜସ୍ଥାନର ବେୱାର ଜିଲ୍ଲାର ଜୈତରନ ଥାନା ଅଞ୍ଚଳର ବାସିନ୍ଦା ଏବଂ ତା ଉପରେ ୨୫ ହଜାର ଟଙ୍କାର ପୁରସ୍କାର ରାଶି ଥିଲା।

ଶାହି ଥାନା ଅଞ୍ଚଳର ବିହାରୀପୁର ନଦୀ ସେତୁ ନିକଟରେ ଏହି ଏନକାଉଣ୍ଟର ହୋଇଥିଲା। ଅଭିଯୁକ୍ତଠାରୁ ନମ୍ବର ପ୍ଲେଟ୍ ନଥିବା ଏକ ସ୍ପ୍ଲେଣ୍ଡର ପ୍ଲସ୍ ମୋଟରସାଇକେଲ ମଧ୍ୟ ଜବତ କରାଯାଇଛି।

ଏହା ପୂର୍ବରୁ ବଲିଉଡ୍ ଅଭିନେତ୍ରୀ ଦିଶା ପଟାନୀଙ୍କ ବରେଲି ସ୍ଥିତ ଘର ବାହାରେ ଗୁଳିକାଣ୍ଡ ଘଟଣାରେ ସମ୍ପୃକ୍ତ ଥିବା ରୋହିତ ଗୋଦାରା-ଗୋଲଡି ବ୍ରାର ଗ୍ୟାଙ୍ଗର ଦୁଇ ସଦସ୍ୟ ବୁଧବାର ଗାଜିଆବାଦର ଟ୍ରୋନିକା ସିଟି ନିକଟରେ ଏକ ଏନକାଉଣ୍ଟରରେ ନିହତ ହୋଇଥିଲେ। ଦିଲ୍ଲୀ ପୋଲିସର ସ୍ପେଶାଲ୍ ସେଲ୍, ଉତ୍ତର ପ୍ରଦେଶ ପୋଲିସର ସ୍ପେଶାଲ୍ ଟାସ୍କ ଫୋର୍ସ (STF) ଏବଂ ହରିୟାଣା ସ୍ପେଶାଲ୍ ଟାସ୍କ ଫୋର୍ସ (STF) ର ମିଳିତ ଅପରେସନରେ ଏହି ଏନକାଉଣ୍ଟର ହୋଇଥିଲା।

ସେପ୍ଟେମ୍ବର ୧୨ ତାରିଖରେ ବରେଲିର ସିଭିଲ୍ ଲାଇନ୍ସ ଅଞ୍ଚଳରେ ଥିବା ଦିଶା ପାଟନୀଙ୍କ ଘରେ ଭୋର ପ୍ରାୟ ୩:୪୫ ସମୟରେ ଗୁଳି ଚାଳନା କରାଯାଇଥିଲା। ଅଭିନେତ୍ରୀଙ୍କ ବାପା, ଅବସରପ୍ରାପ୍ତ ସିଓ ଜଗଦୀଶ ସିଂହ ପଟାନୀ, ତାଙ୍କ ମାଆ ଏବଂ ବଡ଼ ଭଉଣୀ ଖୁସ୍ବୁ ସେହି ସମୟରେ ଘରେ ଉପସ୍ଥିତ ଥିଲେ। ଏହି ଘଟଣାରେ କେହି ଆହତ ହୋଇ ନଥିଲେ, କିନ୍ତୁ ଏହି ଗୁଳିଚାଳନା ଅଞ୍ଚଳରେ ଆତଙ୍କ ସୃଷ୍ଟି କରିଥିଲା।

ଅଧିକ ପଢ଼ନ୍ତୁ: ଆଉ ଗୋଟିଏ ଗ୍ୟାଙ୍ଗ ଆଡ୍ଡା ଉପରେ ଗୁଳିମାଡ଼ କଲା ଲରେନ୍ସ ଗ୍ୟାଙ୍ଗ, ରହିଛି ପାକିସ୍ତାନ ଆଙ୍ଗଲ୍