ସ୍ୱାମୀ ଗାଳି କରିବାରୁ ଦୁଇ ଝିଅଙ୍କୁ ହତ୍ୟା, ତା’ପରେ ମୃତଦେହ ଉପରେ ବେଡସିଟ ଘୋଡ଼ାଇ ପାଖରେ ଶୋଇଲା ମା’

ରାଗରେ ଅନ୍ଧ ହୋଇ ପିଶାଚୀ ସାଜିଲା ମା’ । ସ୍ୱାମୀ ସହ ଝଗଡ଼ା କରିବା ପରେ ନିଜର ଦୁଇ ଝିଅକୁ ପୋଖରୀରେ ବୁଡ଼ାଇ ମାରିଲା । ସ୍ୱାମୀସ୍ତ୍ରୀଙ୍କ ମଧ୍ୟରେ ଝଗଡ଼ା ହେବା ସାଧାରଣ କଥା । ହେଲେ ସେହି ରାଗ ପାଇଁ ନିଜ ଜନ୍ମକଲା ଝିଅଙ୍କ ଜୀବନ ଯେ ଜଣେ ମା’ ନେଇଯିବ ବିଶ୍ୱାସ କରିବା ଅସମ୍ଭବ । ଆସାମର ସିଲଚର ସହରରେ ଏପରି ଅଭାବନୀୟ ଘଟଣା ଘଟିଛି ।

ଅଭିଯୁକ୍ତ ମହିଳା ଜଣକ ହେଲେ ଆଜମେରା ବେଗମ । ଏଭଳି ନୃଶଂସ କାଣ୍ଡ ଘଟାଇବା ପରେ ଦୁଇ ଝିଅ ରଜିନା ବେଗମ୍ ଲସ୍କର(୩ବର୍ଷ), ଫାତିମା ବେଗମ ଲସ୍କର(୧୮ମାସ)ଙ୍କ ମୃତଦେହ ଆଣି ବେଡ୍ ଉପରେ ଶୁଆଇ ଦେଇଥିଲା ମା’ । ତା’ପରେ ବେଡସିଟ୍ ଘୋଡ଼ାଇ ପାଖରେ ଶୋଇ ପଡ଼ିଥିଲା ।

ଅବେଳରେ ଆଜମେରା ବେଗମଙ୍କ ଶୋଇଥିବା ଦେଖି ପରିବାର ଲୋକ ତାଙ୍କୁ ଉଠାଇଥିଲେ । ହେଲେ ସେ ଉଁ କି ଚୁଁ ନକରି ସେ ଖଟରେ ଗାଲେଇ ପଡ଼ି ରହିଥିଲେ । ଦୀର୍ଘ ସମୟ ପର୍ଯ୍ୟନ୍ତ ସେ ଉତ୍ତର ନଦେବାରୁ ପରିବାର ସଦସ୍ୟ କମ୍ବଳ ଖୋଲି ପିଲାମାନଙ୍କ ପୋଷାକ ଓଦା ହୋଇଥିବା ଦେଖିଥିଲେ । ପ୍ରଥମେ କିଛି ବୁଝି ପାରିନଥିଲେ ମଧ୍ୟ ଉଠାଇବା ପରେ ପିଲାମାନେ କିଛି ଉତ୍ତର ନଦେବାରୁ ସେମାନେ ମରିଯାଇଥିବା ଜାଣି ପାରିଥିଲେ । ଆଉ ତା’ପରେ ତୁରନ୍ତ ପୋଲିସକୁ ଫୋନ୍ କରି ଏସମ୍ପର୍କରେ ସୂଚନା ଦେଇଥିଲେ ।

ସୂଚନା ପାଇ ପୋଲିସ ଘରେ ପହଞ୍ଚି ଆଜମିରାଙ୍କ ଗିରଫ କରିଛି । ଆଉ ତା’ପରେ ଦୁଇ କୁନି ଝିଅଙ୍କ ମୃତଦେହକୁ ଶବ ବ୍ୟବଚ୍ଛେଦ ପାଇଁ ସିଲଚର ମେଡିକାଲ କଲେଜ ଏବଂ ଡାକ୍ତରଖାନାକୁ ପଠାଇ ଦେଇଛି ।

ପରିବାର ଲୋକଙ୍କ କହିବା ଅନୁସାରେ, ଆଜି ସକାଳେ କୌଣସି କାରଣକୁ ନେଇ ସ୍ୱାମୀସ୍ତ୍ରୀଙ୍କ ମଧ୍ୟରେ ଝଗଡ଼ା ହୋଇଥିଲା । ଆଜମିରାଙ୍କ ସ୍ୱାମୀ ତାଙ୍କୁ ଗାଳି କରିବା ସହ ତାଙ୍କ ଘରୁ ବାହାର କରିଦେବା ପାଇଁ ଧମକ ଦେଇଥିଲେ । ଆଉ ସେଇଥି ପାଇଁ ରାଗ ଶୁଝାଇବାକୁ ଯାଇ ନିଜ ଦୁଇ ପିଲାଙ୍କୁ ହିଁ ମାରି ପକାଇଛି ମା । ସେପଟେ ଏଘଟଣା ସମ୍ପର୍କରେ ଆଜମିରାଙ୍କ ସ୍ୱାମୀ କିଛି ଜାଣିନାହାନ୍ତି ।