• Facebook
  • Twitter
  • Instagram
  • LinkedIn
  • Youtube
  • Telegram
  • Koo
  • Read in English
Otv Khabar Bureau

ବିଶ୍ୱ ଐତିହ୍ୟ ପର୍ଯ୍ୟଟନ ସ୍ଥଳ କୋଣାର୍କରେ ବାଲି ମାଫିଆଙ୍କ ଦୌରାତ୍ମ୍ୟ । ରାତି ହେଲେ ଚାଲୁଛି ଶହ ଶହ ଟ୍ରକ୍ ବାଲି ଚୋରା ଚାଲାଣ । ସରକାରୀ ବାବୁ ଓ ମାଫିଆଙ୍କ ମଧୁଚନ୍ଦ୍ରିକାରେ ଲୁଟ୍ ଚାଲିଥିବା ଅଭିଯୋଗ ସ୍ଥାନୀୟ ବାସିନ୍ଦା କରିଛନ୍ତି । କୋଣାର୍କର ବେଳାଭୂମିଠୁ ହେଲିପ୍ୟାଡ୍ ପର୍ଯ୍ୟନ୍ତ ଏମିତି କି ବାଲୁଖଣ୍ଡ ଅଭୟାରଣ୍ୟ ମଧ୍ୟ ଏଥିରୁ ବାଦ୍ ପଡ଼ିନାହିଁ । ଆଉ ଏ ଚୋରା କାରବାର ଧରାପଡିଛି ଓଟିଭି କ୍ୟାମେରାରେ । ସତ ସାମ୍ନାକୁ ଆସିବା ପରେ ତହସିଲଦାରଙ୍କୁ ଅତିରିକ୍ତ ଜିଲ୍ଲାପାଳ ତଦନ୍ତ ଦାୟିତ୍ୱ ଦେଇଛନ୍ତି ।

ବେଳାଭୂମିରେ ବାଲି ମାଫିଆଙ୍କ ରାଜ୍ । ରାତି ହେଲେ ବେଧଡ଼କ ଚାଲୁଛି ଚୋରା ଚାଲାଣ । କିଟି ମିଟି ଅନ୍ଧାର ଭିତରେ ଚାଲିଛି କୋଟି କୋଟିରେ ଖେଳ । ରାତି ସହ ଶୋଇ ଯାଉଛି ପ୍ରଶାସନ, ଆଉ ଲୁଟ୍ ହେଉଛି ହଜାର ହଜାର ବାଲି ଟ୍ରକ । ଓଟିଭି କ୍ୟାମେରାରେ କଏଦ ହୋଇଥିବା ଚିତ୍ର, ବିଶ୍ୱ ଐତିହ୍ୟ ପର୍ଯ୍ୟଟନ ସ୍ଥଳ କୋଣାର୍କର ବାଲି ଚୋରା ଚାଲାଣର ଲାଇଭ୍ ଫୁଟେଜ । ବେଳାଭୂମିରେ ଲାଗିଛି ଏକାଧିକ ଟ୍ରକ ଆଉ ଟ୍ରକ୍ ଅନବରତ ବାଲି ଲୋଡ୍ କରିବାରେ ଲାଗିଛି । କୋଣାର୍କ ଥାନା ଅତିରିକ୍ତ ତହସିଲଦାର କାର୍ଯ୍ୟାଳୟର ଅତି ନିକଟରେ ଏହି ଚାଲାଣ ଚାଲିଛି ।

ଏହି କାମକୁ ନେଇ ପ୍ରଶ୍ନ ଉଠାଇଲେଣି ଗ୍ରାମବାସୀ । ସରକାରୀ ଅଧିକାରୀ ଓ ମାଫିଆଙ୍କ ମଧୁଚନ୍ଦ୍ରିକାରେ ଦିନରାତି ବାଲି ଚୋରାଚାଲାଣ ହେଉଥିବା ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା । ସ୍ଥାନୀୟ ଅଞ୍ଚଳରେ ନିର୍ମାଣ ହେଉଥିବା ରାସ୍ତାରେ ଏହି ବାଲି ବ୍ୟବହାର ହେଉଥିବା ଅଭିଯୋଗ ହୋଇଛି ।

 

ସୂର୍ଯ୍ୟ ମନ୍ଦିର ଉତ୍ତରରେ ବାଲିବନ୍ତ, କୋଣାର୍କ ହେଲିପ୍ୟାଡଠୁ ଆରମ୍ଭ କରି ବେଳାଭୂମି ଏମିତି କି ବାଲୁଖଣ୍ଡ ଅଭୟାରଣ୍ୟ ବି ବାଦ୍ ପଡିନି ଏହି ଲୁଟ୍‌ରୁ । ବାଲୁଖଣ୍ଡ ଅଭୟାରଣ୍ୟ ଏବଂ ବାଲିବନ୍ତ ଅଞ୍ଚଳର ବାଲି ଖୋଳା ହେବା ଫଳରେ ବଡ ବଡ ଗାତ ସୃଷ୍ଟି ହୋଇଛି, ଗଛ ମଧ୍ୟ ଉପୁଡି ପଡିଛି । ପ୍ରକୃତି ଉପରେ ଏହାର କୁପ୍ରଭାବ ପଡୁଥିବାରୁ ତୁରନ୍ତ କାର୍ଯ୍ୟାନୁଷ୍ଠାନ ଦାବି କରିଛନ୍ତି ପରିବେଶବିତ୍ ଦିଲୀପ ଶ୍ରୀଚନ୍ଦନ ।

ସତ ସାମ୍ନାକୁ ଆସିବା ପରେ ବାଲି ଚୋରା ଚାଲାଣ ହେଉଥିବା ସ୍ୱୀକାର କରିବା ସହ ପରିବେଶ ଓ ଜୀବଜନ୍ତୁଙ୍କ ଉପରେ ଏହାର ପ୍ରଭାବ ପଡୁଥିବା କହିଛନ୍ତି କୋଣାର୍କ ରେଞ୍ଜର । ଅନ୍ୟପଟେ ଚୋରାଚାଲାଣ ହେଉଥିବା ସ୍ଥାନରେ କୌଣସି ବାଲି ଘାଟ ନିଲାମ ଦିଆଯାଇନଥିବାରୁ ଘଟଣାର ତଦନ୍ତ ପାଇଁ ଗୋପ୍ ତହସିଲଦାରଙ୍କୁ ନିର୍ଦ୍ଦେଶ ଦେଇଛନ୍ତି ପୁରୀ ଅତିରିକ୍ତ ଜିଲ୍ଲପାଳ ।