• Facebook
  • Twitter
  • Instagram
  • LinkedIn
  • Youtube
  • Telegram
  • Koo
  • Read in English
Satyendu Shekher Mishra

ଏହା କିଭଳି ମାନସିକତା । ଏମିତି ମାନସିକତା ରଖୁଥିବା ଲୋକ ଏହି ସମାଜ ପାଇଁ ଖୁବ୍‌ ବିପଦ କହିଲେ ଅତ୍ୟୁକ୍ତି ହେବ ନାହିଁ । ଆପଣ ଭାବୁଥିବେ ଆମେ କାହା କଥା କହୁଛୁ । କ’ଣ କହୁଛୁ । କେଉଁ ମାନସିକତା କଥା କହୁଛୁ । ପୁନେରେ ଜଣେ ମହିଳା ଥାନାରେ ଏକ ସାଂଘାତିକ ଅଭିଯୋଗ କରିଛନ୍ତି । ଯାହା ଶୁଣିଲେ ସୁସ୍ଥ ସମାଜର କୌଣସି ବି ବ୍ୟକ୍ତି ଆଶ୍ଚର୍ଯ୍ୟ ଏବଂ ଚିନ୍ତିତ ହେବ ।

ମହିଳାଙ୍କ ଅଭିଯୋଗ ଅନୁଯାୟୀ, ତାଙ୍କ ପେଟରେ ଛୁଆ ରହିବା ପାଇଁ ଶାଶୁ ଘର ଲୋକ ତାଙ୍କୁ ମଣିଷ ହାଡ଼ ଗୁଣ୍ଡ ଖାଇବାକୁ ବାଧ୍ୟ କରିଛନ୍ତି । ଏହି ଘଟଣା ଏବେ ପୁରା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ଯିଏ ବି ଶୁଣିଛି ସିଏ ଆଶ୍ଚର୍ଯ୍ୟ ହେଉଛି । ଜଣେ ଗୁଣିଆଙ୍କ କଥାରେ ପଡ଼ି ଶାଶୁ ଘର ଲୋକ ଏଭଳି କରିଥିବା କୁହାଯାଉଛି । ତେବେ ଆଜିର ଏହି ବିଜ୍ଞାନ ଯୁଗରେ ବି ଲୋକେ ଗୁଣି ଗାରେଡ଼ି ଉପରେ ବିଶ୍ୱାସ ରଖୁଛନ୍ତି ତାହା ଏହି ମଣିଷ ସମାଜ ପାଇଁ ଅତ୍ୟନ୍ତ ଦୁଃଖ ଦାୟକ ନିଶ୍ଚୟ ।

ତେବେ ମହିଳାଙ୍କ ଏଭଳି ଅଭିଯୋଗ ପାଇବା ପରେ ପୋଲିସ, ସ୍ୱାମୀ ସମେତ ଶାଶୁଘରର ୭ ଜଣଙ୍କ ନାଁରେ ମାମଲା ରୁଜୁ କରିଛି । ସେମାନଙ୍କ ବିରୋଧରେ ୪୯୮ ଏ, ୩୨୩, ୫୦୪, ୫୦୬ ଦଫା ଲଗାଇଛି ପୋଲିସ । ମିଳିଥିବା ସୂଚନା ଅନୁଯାୟୀ, ମହିଳା ଜଣକ ପ୍ରଥମେ ଅଭିଯୋଗ କରିଥିଲେ ଯେ, ତାଙ୍କୁ ଶ୍ୱଶୁର ଘର ଲୋକ ଯୌତୁକ ଜନିତ ନିର୍ଯାତନା ଦେଉଛନ୍ତି । ଟଙ୍କା, ସୁନା, ରୂପା ଆଦି ବାପ ଘରୁ ଆଣିବା ପାଇଁ ବାଧ୍ୟ କରୁଛନ୍ତି । ଏହାପରେ ଦ୍ୱିତୀୟ ଥର ଅଭିଯୋଗ କରିଥିଲେ ଯେ, ପେଟରେ ଛୁଆ ରହିବା ପାଇଁ ମଣିଷ ହାଡ଼ ଗୁଣ୍ଡ ଖାଇବାକୁ ବାଧ୍ୟ କରିଛନ୍ତି ଶାଶୁ ଘର ଲୋକ । ଦୁଇଟି ଘଟଣାରେ ପୋଲିସ ପୃଥକ ପୃଥକ ମାମଲା ରୁଜୁ କରିଛି ।

ସ୍ଥାନୀୟ ଡିସିପି କହିଛନ୍ତି ଯେ, ମହିଳାଙ୍କୁ ମହାରାଷ୍ଟ୍ରର କୌଣସି ଏକ ନିର୍ଜନ ସ୍ଥାନକୁ ନିଆଯାଇଥିଲା । ସେଠାରେ ଏକ ଝରଣା ତଳେ ତାଙ୍କୁ ବସାଯାଇଥିଲା । ଆଉ ସେହିଠାରେ ହିଁ ତାଙ୍କୁ ମଣିଷ ହାଡ଼ ଗୁଣ୍ଡ ଖାଇବାକୁ କୁହାଯାଇଥିଲା ।