ଅନ୍ତବସ୍ତ୍ର ପିନ୍ଧି, ମୁହଁକୁ ଢାଙ୍କି ଚୋରି କରୁଥିଲେ, ଧରାପଡ଼ିଲା ଗଞ୍ଜି-ଚଡ୍ଡି ଗ୍ୟାଙ୍ଗ

ହାପ୍ ପ୍ୟାଣ୍ଟ, ଗଞ୍ଜି, ଆଉ ମୁହଁରେ ମାସ୍କ...ପ୍ରଥମେ ରେକି ଓ ପରେ ଗ୍ୟାଙ୍ଗ ଧରି ଲୁଟ୍। ରାଜଧାନୀ ଭୁବନେଶ୍ୱରରେ ଆତଙ୍କ ଖେଳାଇଥିବା, ଏକାଧିକ ଥାନାର ପୋଲିସକୁ ନାକେଦମ୍ କରିଥିବା ଦୁର୍ଦ୍ଦାନ୍ତ ଚୋର ଗ୍ୟାଙ୍ଗ ଶେଷରେ ଧରାପଡ଼ିଛି । ଦିନରେ ରାଜଧାନୀର ବିଭିନ୍ନ ଛକରେ ବୁଲି ରାତି ହେଲେ ଘରେ ପଶି ଏମାନେ କଳାକନା ବୁଲାଇବାରେ ମାହିର୍ ।

ଧଉଳିରୁ ଇନଫୋସିଟି ଥାନା ଯାଏଁ ୧୬ରୁ ଅଧିକ କେସ୍ ରହିଛି ଏମାନଙ୍କ ନାଁରେ। ଗୋଟିଏ ରାତିରେ ଦୁଇରୁ ତିନିଟି ଘରେ ପଶି ଚୋରି କରନ୍ତି। କିନ୍ତୁ ଚୋରିର ତରିକା ବେଶ୍ ରୋଚକ। ଚୋରି ବେଳେ ଏମାନେ ଗଞ୍ଜି-ଚଡ୍ଡି ପିନ୍ଧନ୍ତି, ମୁଣ୍ଡ ଓ ମୁହଁକୁ ଘୋଡ଼ାଇ ଏଘରୁ ସେ ଘରକୁ ବୁଲନ୍ତି। ଘରେ କେହି ନଥିବା ବେଳେ ଟଙ୍କା, ଅଳଙ୍କାର, ସୌଖୀନ ସାମଗ୍ରୀ ଯାହା ହାତରେ ପଡ଼ିଲା ସବୁ ଧରି ଚଂପଟ୍ ମାରନ୍ତି।

ଅପରାଧୀମାନେ ରାଜସ୍ଥାନର ମୂଳ ନିବାସୀ । କେହି ଯେପରି ଏମାନଙ୍କୁ ଚିହ୍ନି ପାରିବନି, ସେଥିପାଇଁ ରେଳ ଷ୍ଟେସନ୍, ବସଷ୍ଟାଣ୍ଡ, ଓଭରବ୍ରିଜ୍ ତଳେ ଆଶ୍ରୟ ନେଇଥାନ୍ତି।...ପ୍ରଥମେ ଚୋରି ପାଇଁ ଫୁଲପ୍ରୁଫ୍ ପ୍ଲାନ୍ ପ୍ରସ୍ତୁତ ହୁଏ। ହାଇୱେ କିମ୍ବା ମୁଖ୍ୟ ରାସ୍ତାକୁ ସୁବିଧାରେ ପହଞ୍ଚି ପାରୁଥିବା ଘରକୁ କରିଥାନ୍ତି ଟାଗେର୍ଟ । ଚୋରି ବିଦ୍ୟାରେ ଏମାନେ ଏତେ ଧୁରନ୍ଦର ଯେ, ମାତ୍ର ଗୋଟିଏ ମିନିଟରେ ଝରକା ତାଡ଼ି ଘରେ ପଶି ପାରନ୍ତି ଆଉ ଏଥିପାଇଁ ବ୍ୟବହାର କରନ୍ତି ସ୍ୱତନ୍ତ୍ର ଯନ୍ତ୍ରପାତି । ଧଉଳି ଅଞ୍ଚଳରେ ବି ସିରିଜ୍ ଚୋରି ଓ ଲୁଟପାଟ ମାମଲାରେ ଏମାନେ ସଂପୃକ୍ତ ଥିଲେ। ଆଗକୁ ଆଉ କିଛି ଚୋରି କରିବା ପୂର୍ବରୁ ସେମାନଙ୍କୁ ବାନ୍ଧିବାରେ ସଫଳ ହୋଇଛି ପୋଲିସ୍।

ଏହା ପୂର୍ବରୁ ରାଜଧାନୀରୁ ଚନ୍ଦା ଗ୍ୟାଙ୍ଗ, ଡେଙ୍ଗା-ଗେଡ଼ା, ବାୱରିଆ, ଈରାନୀ ଭଳି ବିଭିନ୍ନ ଚୋର ଗ୍ୟାଙ୍ଗ ପୋଲିସ ହାତରେ ଧରାପଡ଼ିଥିଲେ। ଆଉ ଏବେ ପାଳି ଗଞ୍ଜି-ଚଡ୍ଡି ଗ୍ୟାଙ୍ଗର ।....