ଖାଲି ଝିଅ ଜନ୍ମ କରୁଛୁ...ଗୋଟେ ଗୋଟେ କରି ୫ଟା ଝିଅ ହେଲେଣି... ବାପ ଘରୁ ଟଙ୍କା ଆଣ୍... ମୋର ଯୌତୁକ ଦରକାର... ଖାଲି କ’ଣ ଝିଅ ଜନ୍ମ କରିବାକୁ ଆସିଛୁ... ୪ଟା ଝିଅ ସିନା ନାହାନ୍ତି, ହେଲେ ଏବେ ତ ଜଣେ ଅଛି... ପୁଣି କୁଆଡେ ଏବେ ଝିଅ ହେବ ବୋଲି ଶୁଣିଲିଣି... ଆଉ ଏମିତି ହୋଇପାରିବନି... ଏବେ ମୋର ଯୌତୁକ ଦରକାର... ଏ ୬ ନମ୍ବର ପିଲାଟା ଯଦି ଝିଅ ହେଲା ତା’ ହେଲେ ତୁ ଦେଖିବୁ...

ଏମିତି କୁଆଡ଼େ ବାରମ୍ବାର ନାଲି ଆଖି ଦେଖାଇ ଧମକ ଦେଉଥିଲା ସ୍ବାମୀ । ଶାଶୁଘର ଲୋକ ବି ଅକଥନୀୟ ନିର୍ଯାତନା ଦେଉଥିଲେ । ଦୁଃଖ ସହି ସହି ଆଖିର ଲୁହ ପିଇ କଟୁଥିଲା ତନୁସୂୟାଙ୍କ ଦିନ। ଆଉ ଏବେ ସେହି ତନୁସୂୟା ଶବ ପାଲଟିଯାଇଛନ୍ତି । ଏପରି ଏକ ଅଭିଯୋଗ କାମାକ୍ଷାନଗର ଥାନା ଅଞ୍ଚଳରୁ ଆସିଥିବାବେଳେ ସ୍ଥାନୀୟ ସବୁଠି ବେଶ୍ ଚର୍ଚ୍ଚାର ବିଷୟ ପାଲଟିଛି ।

ଅଧିକ ପଢ଼ନ୍ତୁ: ଯୌତୁକ ପାଇଁ ବଧୂ ହତ୍ୟା ! ପୋଲିସ ସହ ଧସ୍ତାଧସ୍ତି, ମୃତ ମହିଳାଙ୍କ ଶାଶୁଙ୍କୁ ଘୋଷାଡ଼ିଲେ

ମୃତକ ବିବାହିତା ମହିଳା ଜଣକ ଗୋଡିସାହି ଗାଁର ରାଜେଶ ରାଉତଙ୍କ ୨୮ ବର୍ଷୀୟ ପତ୍ନୀ ତନୁସୂୟା ରାଉତ l ୯ ବର୍ଷ ତଳେ ବିଜାଡ଼ିହି ଗାଁ ଗୋଡ଼ିସାହିର ବିକଳ ରାଉତଙ୍କ ପୁଅ ମାନଙ୍କୁ ତନୁସୂୟା ବିବାହ କରିଥିଲେ l ମାନ ଓ ତନୁସୂୟାଙ୍କ ଗୋଟିଏ ଝିଅ ଥିବାବେଳେ ତନୁସୂୟା ପୁନଃ ଗର୍ଭବତୀ ହୋଇଥିଲେ l ପୂର୍ବରୁ ତନୁସୂୟାଙ୍କ ଚାରୋଟି ଝିଅ ଜନ୍ମ ହୋଇ ମୃତ୍ୟୁବରଣ କରିଛନ୍ତି । ହେଲେ ଏବେ ଆଉ ଏକ ଝିଅ ଜନ୍ମହେବା ନେଇ ସ୍ୱାମୀ, ସ୍ତ୍ରୀ କୌଣସି ସୂଚନା ପାଇବା ପରେ ଏପରି କାଣ୍ଡ ଘଟିଥିବା କୁହାଯାଉଛି

ଝିଅର ମୃତ୍ୟୁ ନେଇ ସ୍ଥାନୀୟ ଲୋକଙ୍କଠୁ ଖବର ପାଇବା ପରେ ଘଟଣାସ୍ଥଳରେ ପରିବାର ଲୋକ ପହଞ୍ଚିଥିଲେ । ପରିବାର ଲୋକ ଯୌତୁକ ପାଇଁ ତନୁସୂୟାଙ୍କ ହତ୍ୟା କରିଥିବା ଅଭିଯୋଗ କରିଛନ୍ତି। ପୋଲିସ ପହଞ୍ଚି ତଦନ୍ତ କରୁଥିବାବେଳେ, ସ୍ୱାମୀ ମାନ ରାଉତ ଘରୁ ଫେରାର ହୋଇଯାଇଥିବାରୁ ହତ୍ୟା ସନ୍ଦେହକୁ ଆହୁରି ଦୃଢ଼ୀଭୂତ କରୁଛି l

ଅଧିକ ପଢ଼ନ୍ତୁ: କଟକରେ ବଧୂ ହତ୍ୟା ! ବିବାହର ୭ ବର୍ଷ ପରେ ଶାଶୁ - ଦିଅର ଦେଉଥିଲେ ଯୌତୁକ ନିର୍ଯାତନା