ଯୌତୁକରେ ବାଇକ୍ ମାଗିଥିଲା ବର ! ଏବେ କାନ୍ଦି କାନ୍ଦି କ୍ଷମା ମାଗୁଛି...

ବର ଯୌତୁକରେ ବାଇକ୍ ମାଗିଲା ବୋଲି ବାହାଘର ପରଦିନ ହିଁ ବାପଘରକୁ ପଳାଇ ଆସିଥିବା ଦେବକୀଙ୍କୁ ମନାଇବା ପାଇଁ ଶ୍ୱଶୂର ଘରେ ପହଞ୍ଚିଲେ ବର ଅର୍ଜୁନ ଦିଗାଲ । ଦେବକୀଙ୍କୁ ବୁଝା ସୁଝା କରିବା ପାଇଁ ସେ ଚେଷ୍ଟା କରିଛନ୍ତି । ସେ କହିଛନ୍ତି, ଯୌତୁକ ମାଗିବା ମୋର ବଡ଼ ଭୁଲ୍ ଥିଲା । ସ୍ତ୍ରୀକୁ ଘରକୁ ନେବି, ତାକୁ ସୁଖ ଶାନ୍ତିରେ ରଖିବି । ଏବେ ଦୁଇ ପକ୍ଷ ମଧ୍ୟରେ ଆପୋଷ ସମାଧାନ ପାଇଁ ଆଲୋଚନା ଚାଲିଛି ।

କନ୍ଧମାଳ ତୁମୁଡିବନ୍ଧ ଥାନା ସାରୁପାଟାର ଦେବକୀ ଦିଗାଲ ଓ ବାଲିଗୁଡ଼ା ଥାନା ବରକିଆରେ ଅର୍ଜୁନ ଦିଗାଲଙ୍କ ବାହାଘର ହୋଇଥିଲା ଗତ ୯ ତାରିଖରେ । ବିବାହ ପର ଦିନ କନ୍ୟା ପକ୍ଷ ଲୋକେ ଝିଅ ଛାଡିବାକୁ ବର ଘରକୁ ଆସିଥିବା ସମୟରେ ଯୌତୁକରେ ବାଇକ ଦେବାକୁ ବର ଦାବି କରିଥିଲେ । ଏହାକୁ ବିରୋଧ କରି ମଙ୍ଗଳସୂତ୍ର ଓ ଶଙ୍ଖା ଚୁଡ଼ି ଖୋଲି ବାପ ଘରକୁ ପଳାଇ ଆସିଥିଲେ ଦେବକୀ ।

ପୁରା କାହାଣୀଟି ହେଲା...

ଦୁର୍ଗମ ଅଞ୍ଚଳରେ ରହୁଥିଲେ ବି ସେ ଶିକ୍ଷିତ ଆଉ ସଚେତନ । ସେ ଆଜି ସମସ୍ତଙ୍କ ପାଇଁ ଏକ ଉଦାହରଣ । ତାଙ୍କ ପାଇଁ ପୁରା ଅଞ୍ଚଳବାସୀ ଆଜି ଗର୍ବିତ । ଆମେ କହୁଛୁ ଏମିତି ଜଣେ ଯୁବତୀଙ୍କ କଥା, ଯାହା ଶୁଣିବା ପରେ ଆପଣ ବି କହିବେ ତାଙ୍କ ସାହସକୁ ମାନିବାକୁ ପଡ଼ିବ । ଯୌତୁକ ପ୍ରଥାକୁ ସଭ୍ୟ ସମାଜଠାରୁ ଆରମ୍ଭ କରି ବିଭିନ୍ନ ମହଲରେ ବିରୋଧ କରାଯାଉଛି । ସମସ୍ତେ ଯୌତୁକ ପ୍ରଥା ବିରୋଧରେ ମନ୍ତବ୍ୟ ଦେଉଛନ୍ତି । ଏମିତିକି ଏହାକୁ ରୋକିବାକୁ ଅନେକ ଚେଷ୍ଟା କରାଯାଇଥିଲେ ମଧ୍ୟ ସବୁ ବିଫଳ ହେଉଛି । ଏବେ ବି ସମାଜରେ ଯୌତୁକ ପ୍ରଥା ରହିଛି ।

ସେହି ଯୌତୁକ ପ୍ରଥାକୁ ବିରୋଧ କରି ଏବେ ଚର୍ଚ୍ଚାରେ ଦୁର୍ଗମ ଇଲାକାର ଝିଅ ଦେବକୀ ଦିଗାଲ । ଯୌତୁକରେ ବର ବାଇକ ମାଗିବାରୁ ବିବାହର ପର ଦିନ ସମସ୍ତଙ୍କ ସାମ୍ନାରେ ମଙ୍ଗଳ ସୂତ୍ର ଓ ଶଙ୍ଖା ଚୁଡ଼ି ଖୋଲି ଦେଇ ବାପା ଘରକୁ ଫେରିଆସିଥିଲେ ନବ ବିବାହିତା କନ୍ୟା ଦେବକୀ । ଏହି ଘଟଣା ଏବେ ବାଲିଗୁଡା ଅଂଚଳରେ ଚର୍ଚ୍ଚାର ବିଷୟ ପାଲଟିଥିଲା । କନ୍ୟା ପକ୍ଷ ଲୋକେ ବର ଘରକୁ ଆସିଥିବା ସମୟରେ ଯୌତୁକରେ ବାଇକ ଦେବାକୁ ବର ଦାବି କରିଥିଲା । ଆଉ ଏହି ସମୟରେ ନବବଧୂ ଯୌତୁକକୁ ବିରୋଧ କରିବା ସହ ସଭା ମଧ୍ୟରେ ମଙ୍ଗଳ ସୂତ୍ର ସହ ଶଙ୍ଖା ଚୁଡ଼ି ଖୋଲି ବାପ ଘରକୁ ଫେରିଯାଇଥିଲେ ।

ଦୁର୍ଗମ ଇଲାକାରେ ବସବାସ କରୁଥିବା ଝିଅର ଏଭଳି ନିଷ୍ପତି ସହ ତାର ସାହସକୁ ନେଇ ଏବେ ସେ ଚର୍ଚ୍ଚାରେ ରହିଛନ୍ତି । ଅନ୍ୟପଟେ ବର ଘର ଲୋକେ ଯୌତୁକରେ ବାଇକ ମାଗିବା ଘଟଣା ମିଛ ବୋଲି କହିଥିଲେ । କିନ୍ତୁ ଏବେ ବର ନିଜେ କ୍ଷମା ପ୍ରାର୍ଥନା କରିବା ସହ ପତ୍ନୀଙ୍କୁ ସସମ୍ମାନେ ନିଜ ଘରକୁ ଫେରାଇ ନେବାକୁ ଶ୍ୱଶୁର ଘରକୁ ଆସିଛନ୍ତି । ଉଭୟ ପକ୍ଷ ମଧ୍ୟରେ ଆଲୋଚନା ଚାଲିଛି। ଏହି ଘଟଣା ଏବେ ସାରା ରାଜ୍ୟରେ ଚର୍ଚ୍ଚାର ବିଷୟ ହୋଇଛି।