ପେଟ୍ରୋଲ ପମ୍ପରେ ଚୋରି, ସିସିଟିଭିରେ କଏଦ ହେଲା ଦୃଶ୍ୟ !

ବାଲିଗୁଡା(ଅଜିତ ନାୟକ): ପେଟ୍ରୋଲ୍‌ ପମ୍ପରୁ ଚୋରି । ପେଟ୍ରୋଲ ପମ୍ପରେ ତେଲ ପକାଇବା ବେଳେ ରୁହନ୍ତୁ ଟିକିଏ ସତର୍କ । ନଚେତ ଆଖି ପିଛୁଳାକେ ଚୋରି ହୋଇଯିବ ଆପଣଙ୍କ ଗାଡ଼ିରେ ଥିବା ମୋବାଇଲ । ଆଉ ଆପଣ ମଧ୍ୟ ଏଭଳି ଚୋରିର ଶିକାର ହୋଇପାରନ୍ତି । ଏମିତି ଏକ ଚୋରିର ଚିତ୍ର ଏବେ ସିସିଟିଭିରେ କଏଦ ହୋଇଛି । କନ୍ଧମାଳ ଜିଲ୍ଲା ଦାରିଙ୍ଗବାଡ଼ିର ଏକ ପେଟ୍ରୋଲ ପମ୍ପରେ ଜଣେ ଚୋର ଦିନ ଦ୍ଵିପହରରେ ଗାଡି ଭିତରେ ଥିବା ମୋବାଇଲକୁ ଅତି ସତର୍କତାର ସହ ଚୋରି କରି ଚମ୍ପଟ ମାରୁଥିବାର ଦେଖିବାକୁ ମିଳିଛି ।

ସୂଚନା ଅନୁସାରେ, ଦାରିଙ୍ଗବାଡ଼ି ଅଞ୍ଚଳର ଶିବାଜୀ ମଲିକ ନାମକ ଜଣେ ଡ୍ରାଇଭର ଏକ ଡାଲା ଗାଡ଼ିରେ ତେଲ ପକାଇବା ପାଇଁ ପେଟ୍ରୋଲ ପମ୍ପରେ ପହଞ୍ଚିଥିଲେ। ଗାଡିରୁ ଓଲ୍ହାଇ ସେ ତେଲ ଭରୁଥିଲେ । ସେହି ସମୟରେ ହଠାତ୍ ଜଣେ ଚୋର ବାଇକରେ ଆସି ଗାଡି ଭିତରେ ଥିବା ମୋବାଇଲକୁ ଚୋରି କରି ଆଖି ପିଛୁଳାକେ ଚମ୍ପଟ ମାରି ଘଟଣା ସ୍ଥଳରୁ ଚାଲି ଯାଇଥିଲା । ଡ୍ରାଇଭର ଜଣକ ଚାହିଁଥିଲେ ମଧ୍ୟ କିଛି କରିପାରିନଥିଲେ ।

ଚୋରି ଘଟଣା ପରେ ଡ୍ରାଇଭର ଜଣକ ସିସିଟିଭିରେ ଚୋରି ସମୟର ଦୃଶ୍ୟ ଦେଖିଥିଲେ । ଯାହାକୁ ନେଇ ସେ ଦାରିଙ୍ଗବାଡ଼ି ଥାନାରେ ଅଭିଯୋଗ କରିଥିଲେ ମଧ୍ୟ ବର୍ତ୍ତମାନ ସୁଦ୍ଧା ପୋଲିସ ସମ୍ପୃକ୍ତ ଚୋରକୁ ଧରିବାରେ ସକ୍ଷମ ହୋଇନାହିଁ । ଅନ୍ୟପଟେ ଡ୍ରାଇଭର ଜଣକ ଦିନ ରାତି ବହୁ ପରିଶ୍ରମ କରି ୧୦ ହଜାର ଟଙ୍କା ଦେଇ ଗୋଟିଏ ସ୍ମାର୍ଟ ଫୋନ କିଣିଥିଲେ । ଆଉ ଏବେ ତାଙ୍କର ମୋବାଇଲ ଚୋରି ହୋଇଯିବା ଫଳରେ ସେ ବହୁତ ମନ ଦୁଃଖରେ ଅଛନ୍ତି । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଏକ ପ୍ରକାରର ଚୋରି ହେବା ଭୟର ବାର୍ତ୍ତାବରଣ ଦେଖିବାକୁ ମିଳିଛି ।