ଛୁରାମାଡରେ ଭିଣୋଇ ମୃତ, ଶଳା ଗୁରୁତର

ଛୁରା ମାଡରେ ଭିଣୋଇ ମୃତ, ଶଳା ଗୁରୁତର । ଗତକାଲି ବିଳମ୍ବିତ ରାତିରେ ଏଭଳି ଏକ ଘଟଣା ଘଟିଛି କେନ୍ଦ୍ରାପଡା ଜିଲ୍ଳା ଆଳି ଥାନା ଦହିଅଣ୍ଟା ଗାଁରେ । ମୃତକ ସହିରା ଗାଁର ଅମିତ କୁମାର ପାତ୍ର ବୋଲି ଜଣାପଡିଛି ।

ଗତକାଲି ଦହିଅଣ୍ଟା ଗାଁରେ ବିଳମ୍ବିତ ରାତି ଯାଏ ହରିହାଟ କାର୍ଯ୍ୟକ୍ରମ ଚାଲିଥିଲା । ଅମିତ ଓ ତାଙ୍କ ଶଳା ସଞ୍ଜୟ ଜେନା ସେଠାକୁ ପ୍ରସାଦ ସେବନ ପାଇଁ ଯାଇଥିଲେ । ତେବେ ଫେରିବା ବେଳେ ଗାଁର ଜଣେ ବ୍ୟକ୍ତି ଦୁଇ ଜଣଙ୍କୁ ଛୁରା ମାଡ କରିଥିବା ଅଭିଯୋଗ ହୋଇଛି । ଗୁରୁତର ଅବସ୍ଥାରେ ଦୁଇ ଜଣଙ୍କୁ ପଟ୍ଟାମୁଣ୍ଡାଇ ମେଡିକାଲରେ ଭର୍ତ୍ତି କରାଯାଇଥିଲା ।

ସେଠାରେ ଅମିତଙ୍କୁ ମୃତ ଘୋଷଣା କରିଥିଲେ ଡାକ୍ତର । ଅନ୍ୟପକ୍ଷରେ ସଞ୍ଜୟ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି । ତେବେ ହତ୍ୟାକାଣ୍ଡର କାରଣ ଅସ୍ପଷ୍ଟ ଥିବା ବେଳେ ରାଜନୈତିକ ଆକ୍ରୋଶ ରଖି ହତ୍ୟା କରାଯାଇଥିବା ମୃତ ଅମିତଙ୍କ ସମ୍ପର୍କୀୟ ଅଭିଯୋଗ କରିଛନ୍ତି ।

ଅନ୍ୟପଟେ ଛୁରାମାଡ କରିଥିବା ବ୍ୟକ୍ତିକୁ ଅଟକ ରଖାଯାଇ ପଚରାଉଚରା କରାଯାଉଥିବା ପଟ୍ଟାମୁଣ୍ଡାଇ ଏସଡିପିଓ କହିଛନ୍ତି ।